Ազատության ձգտող քաղաքական ուժի ղեկավարը կիլոմետրով հեռու է ազատությունից էլ, դեմոկրատիայից էլ

Այն, որ «Ազատ դեմոկրատներ» կուսակցությունը բավականին անազատ է իր շփումներում, պարզ էր դեռ խորհրդարանական ընտրություններից առաջ: Ու թեև նրանք փորձում էին ամեն կերպ դա քողարկել, սակայն պարզից էլ պարզ էր, որ նրանք ԱԺ անցնելու առանձնապես շանս չեն ունենա:

Մեր ակնարկը, սակայն, ոչ թե կուսակցության կեցվածքին է վերաբերում, այլ՝ լրագրողների հետ շփվելու ցանկության բացակայությունը:

Թե՛ ընտրություններից առաջ, թե՛ հիմա կուսակցության առաջնորդ Խաչատուր Քոքոբելյանը բավականին «զբաղված» է և ամենևին էլ ժամանակ չունի լրագրողներին պատասխանելու համար: Եվ եթե խոսքը պահպանողական որևէ կուսակցության լիդերի մասին լիներ, ինչ-որ տեղ նրա որդեգրած մարտավարությունը գուցեև հասկանալի լիներ, սակայն մի քիչ դժվար է պատկերացնել, որ ազատության ձգտող քաղաքական ուժի առաջնորդն այդքան անազատ է լրագրողների հետ իր շփումների մեջ:

Դե յուրե գրանցված, սակայն դե ֆակտո քաղաքական կյանքից բացակա այս քաղաքական ուժի առաջնորդը, բարեբախտաբար, այս ընթացքում խիզախել է 1in.am-ի հարցերին պատասխանել, որտեղ ասել է.

«ՀՀ քաղաքացիներից բաց աճուրդով իշխանություն գնած քաղաքական համակարգը մինչև ապրիլի երկուսը կանի առավելագույնը, որպեսզի իշխանական համակարգի տրանսֆորմացիան լինի թույլատրելի չափի: Այս քաղաքական համակարգը հաշվետու է միայն ինքն իրեն, այլ ոչ թէ ՀՀ քաղաքացիներին, ավելին՝ անգամ  պատրաստակամություն չի էլ ցուցաբերում լուծել այն կարևորագույն ներքին մարտահրավերներն ու խնդիրները, որոնք ծառացած են ՀՀ քաղաքացիների առջև»,- ընդգծել է ԱԴԿ նախագահը:

Նա ասել է նաև, որ Հայաստանում կան  բոլոր այն նպաստավոր պայմանները, որպեսզի քաղաքական գործընթացները  զարգանան այնպիսի ուղղությամբ, որ այսօրվա համակարգը կանգնի անխուսափելի քաղաքական կրախի առջև:

«Ամենայն պատասխանատվությամբ հայտարարում եմ՝  ՀՀ-ում այս իրավիճակը չի փոխվի, մինչև  քաղաքական այս համակարգը  հիմնովին չկազմաքանդվի: Այն քաղաքական համակարգը (այդ թվում նաև իշխանությանը սպասարկող քաղաքական ուժերը), որը ապահովում է այսօրվա իշխանության բազմաչարչար երկարատևությունը»,- ասել է Քոքոբելյանը:

Խոսելով ՀՀ չորրորդ նախագահի թեկնածուի մասին Սերժ Սարգսյանի հայտնի հայտարարության մասին, որ՝ ՀՀ 4-րդ նախագահը պետք է լինի չքաղաքականացված անձնավորություն, ԱԴԿ նախագահը ասել է.

«Ոչ միայն նոնսենս է, այլ դե ֆակտո ցանկություն կա, որ Հայաստանում կարևորագույն պաշտոնը լինի ապաքաղաքական: Կարծում եմ, Սերժ Սարգսյանը բացթողում է արել՝ նախագահի թեկնածուն ապաքաղաքական լինելուց բացի սեփական կարծիք էլ չպետք է ունենա, այդ դեպքում ամբողջական բուկետ կլիներ, վստահ եմ՝ հանրապետականներն էլ  դժգոհ չէին լինի»:

Այս մի քանի պարբերության մեջ արտահայտած մտքերից ծնվող առնվազն 5 և ավել հարցի պատասխան ստանալու համար Past.am-ը տևական ժամանակ փորձում էր կապ հաստատել «Ազատ դեմոկրատներ» կուսակցության առաջնորդի հետ, սակայն մի քանի շաբաթ սպասելուց հոգնած, ստիպված եղանք արձանագրել, որ ազատության ձգտող քաղաքական ուժի ղեկավարն այնուամենայնիվ, կիլոմետրով հեռու է ազատական և դեմոկրատական գաղափարախոսությունից: Հակառակ դեպքում մի քանի շաբաթվա ընթացքում ոչ միայն ընդամենը 10 րոպե ժամանակ կգտներ լրագրողների հետ շփվելու համար: Մնում է հասկանալ, որ եթե կուսակցությունն ընտրությունների ժամանակ հաղթեր, ինչպես էր ժամանակ գտնելու ԱԺ նիստերին մասնակցելու և ժողովրդի համար աշխատելու:

Արմինե Գրիգորյան