Մոտ 140 հազար դրամ՝ խնամատար ընտանիք դառնալու դեպքում

 

 

2008 թ. մինչ օրս ՀՀ-ում շուրջ 80 երեխա խնամվել է խնամատար ընտանիքներում, սակայն բացակայում են խնամատար ծնողների վերապատրաստման և ընտանիքներում խնամվող երեխաների խնամքի նկատմամբ մշտադիտարկման մեխանիզմները, սահմանված չեն խնամատարության տեսակներն ու ժամկետները, ինչպես նաև խնամատար ընտանիքին դրամական միջոցների վճարման կարգը և չափը:

Պետական, տեղական ինքնակառավարման մարմինների, ինչպես նաև միջազգային կազմակերպությունների կողմից մատնանշվել է Հայաստանում երեխաներին խնամատար ընտանիք հանձնելու վերաբերյալ օրենսդրության վերանայման և բարեփոխման անհրաժեշտությունը:

Ինչպես Իրավական ակտերի նախագծերի հրապարակման միասնական կայքից տեղեկացավ Past.am-ը՝ կսահմանվի խնամատար ծնողին երեխայի խնամքի և դաստիարակության համար տրամադրվող միջոցների և երեխայի խնամքի և դաստիարակության դիմաց տրվող վարձատրության կարգը և չափը:

Այս տարվա պետական բյուջեով 90 խնամատար ընտանիքներում 94 երեխաների խնամքն ու դաստիարակությունն իրականացնելու նպատակով նախատեսվել է հատկացնել՝ 152 միլիոն 828 հազար 400 դրամ, որից 70 միլիոն 452 հազար դրամը երեխայի խնամքի համար: Մեկ երեխայի մեկ ամսվա միջին ծախսը կազմում է 62 հազար 500 դրամ: Երեխայի խնամքի համար ծնողին տրվող վարձատրությունն էլ կկազմի 82 միլիոն 376 հազար դրամ: Խնամատար ծնողին տրվող վարձատրության մեկ ամսվա միջին ծախսը հաշվարկվել է 76 հազար 300 դրամ:

Գործող կարգով խնամատար ընտանիքին մեկ երեխային պահելու համար տրվող ամսական դրամական միջոցները կազմում են մանկատներում մեկ երեխայի խնամքի համար նախատեսված գումարի չափ, երկու երեխայի համար` մեկ երեխայի համար հաշվարկված գումարի 150%-ի, իսկ երեք և ավելի երեխաների համար` 200%-ի չափով: Մեկ երեխայի խնամքի և դաստիարակության համար խնամատար ծնողներից մեկին տրամադրվում է վարձատրություն նվազագույն ամսական աշխատավարձի չափով, երկու երեխայի համար` 150%-ի, երեք և ավելի երեխաների համար` 200%-ի չափով:

Առաջարկվող որոշման նախագծով երեխայի խնամքի և դաստիարակության համար տրամադրվող ֆինանսական միջոցների չափը մասնագիտացված և ընդհանուր տիպի խնամատար ընտանիքներում նախատեսվում է սահմանել մեկ երեխայի հաշվարկով մեկ ամսվա համար 60 հազար 800 դրամ կամ մեկ օրվա համար 2 հազար դրամ:

Երեխայի խնամքի և դաստիարակության դիմաց տրվող վարձատրության չափերը առաջարկվել է տարանջատել ըստ մասնագիտացված և ընդհանուր բնույթի խնամատար ընտանիքների՝

Ընդհանուր խնամատար ընտանիքներում խնամվող յուրաքանչյուր երեխայի խնամքի և դաստիարակության դիմաց տրվող վարձատրության ամսական չափը կազմում է 76 հազար դրամ կամ մեկ օրվա չափը կազմում է 2500 դրամ: Մասնագիտացված խնամատար ընտանիքներում խնամվող յուրաքանչյուր երեխայի խնամքի և դաստիարակության դիմաց տրվող վարձատրության ամսական չափը կազմում է 97 հազար 500 դրամ կամ մեկ օրվա համար 3200 դրամ:

Ընդհանուր խնամատար ընտանիքներում երեխայի խնամքի և դաստիարակության դիմաց վարձատրության չափը հաշվարկվել է հիմք ընդունելով նվազագույն աշխատավարձի մասին օրենքով սահմանված չափը, ներառյալ գործող հարկերը՝ առավելագույն չափը՝ 77 հազար 778 դրամ, իսկ նվազագույնը՝ 72 հազար 727: Մասնագիտացված խնամատար ընտանիքներում երեխայի խնամքի և դաստիարակության դիմաց վարձատրության չափը հաշվարկվել է 30%-ով ավելի:

Հավելենք, որ մեկ օրվա չափի սահմանման անհրաժեշտությունը պայմանավորված է խնամատար ընտանիքներում ոչ լրիվ ամիս երեխաների խնամքն ու դաստիարակության դիմաց վճարումներն իրականացնելու հանգամանքով:

 

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ