Սարո Սարոյան. «Կա դատարկություն, որը ոչ մի կերպ չի լցվում»

Ապրիլին ընդառաջ քաղաքական դաշտում որոշակի տրամադրություններ են նշմարվում: Որոշ քաղաքական ուժեր փորձում են օրակարգ ստեղծել, զուգահեռ՝ իշխանությունն այն որակում է որպես նախընտրական կեղծ օրակարգ:

Քաղաքագետ Սարո Սարոյանի խոսքով՝ այսօր Հայաստանում մի օրակարգ կա:

«Առաջինը ՀՀ նախագահի ընտրություններն են, ապա վարչապետի ընտրություններն Ազգային ժողովում: Այդ օրակարգի հեղինակը գործող վարչախումբն է: Այլ օրակարգ առայժմ չի նշմարվում: Հայտարարություններ կան հատկապես «Ելք» դաշինքի կողմից: Ասում են, որ ի դեմս իշխանության ներկայիս կրողների շարունակականությունն ապահովող միջոցառումների, իրենք ինչ-որ լուրջ ընդվզում կամ դիմադրություն են ցույց տալու: Բայց առայժմ ոչինչ դեռ չի խոսում այն մասին, որ դա Հայաստանի համար օրակարգ է: Դրա համար կոնկրետ քայլեր են պետք, որոնք չեն երևում: Սա է պատկերը: Կա վարչախմբի քաղաքական դաշտում ներմուծած օրակարգը և ամեն ինչ տեղի է ունենում այս ամենի շուրջ»,-Past.am-ի հետ զրույցում ասաց քաղաքագետը:

Իսկ թե ինչ քայլեր են պետք իրապես քաղաքական օրակարգ ձևավորելու համար, Ս. Սարոյանն ընդգծեց, որ հարցը պետք է քաղաքական գործիչներին տալ. «Եթե նշում են օրակարգի մասին, ապա այն գործողություն դարձնելու համար իրենք պետք է մտածեն: Ես որպես քաղտեխոնոլոգ չեմ ցանկանա գուշակություններ անել հատկապես այն դեպքում, երբ գործ ունենք այնպիսի մարդկանց հետ, ովքեր ընդհանրապես անտաղանդ են որևէ քայլեր իրականացնելու առումով: Վերջին տարիներին քաղաքական գործիչներն այնքան անտաղանդ են գտնվել, որ ոչ մի վերլուծաբան զուտ վերլուծական փաստերի ու փաստարկների հիման վրա չի կարող փորձել ինչ-որ նորություն կամ արդյունք տեսնել այդ գործընթացներում: Ես չեմ պատկերացնում, որ իրենք կարող են որևէ քայլ անել: Իրենց քայլերը ես տեսել եմ միայն հայտարարությունների ու հանրահավաքների տեսքով: Իսկ երբ որևէ արդյունք չկա, դրանք արդեն ոչ թե քայլեր, այլ միջոցառումներ են, որոնք անում է նաև վարչախումբն իր օրակարգը լցնելու համար: Դա պայքար չէ, պայքարի իմիտացիա է»:

Սարո Սարոյանի խոսքով՝ քաղաքական դաշտում ոչ թե լճացում, այլ դատարկություն է:

«Ավելի քան մեկ տարի է այդ դատարակությունը գոյություն ունի քաղաքական դաշտում: Այդ դատարկությունը ոչ մի կերպ չի լցվում և ըստ իս առաջիկայում ևս չի լցվի: Լցվելու միակ տարբերակը վարչախմբի ներսում ինչ-որ քաղաքական գործընթացների այլ հունով ընթանալու արդյունքում ընդդիմադիր դաշտում ակտիվություն տեսնելն է: Բայց ընդդիմադիր շրջանակների կողմից ինքնուրույն հանդես գալու տեսանկյունից դեռևս չի երևում, թե այդ դատարակությունն ինչպես է լցվելու: Իհարկե, սա չի նշանակում, որ ՀՀ-ում քաղաքական գործընթացներ չեն լինելու: Այդ դատարկությունը շատ ավելի շուտ և արագ կարող է լցվել, քան երբևէ, բայց ոչ վերջին քսան տարիների համար արդեն ավանդական դարձած ձևերով. հանրահավաքներ, հայտարարություններ, հետո ժողովրդին ուղարկել տուն ու նորից հրավիրել»,-շեշտեց մեր զրուցակիցը:

Ինչ վերաբերում է ապրիլին ընդառաջ սպասվելիք փոփոխություններին , քաղաքագետն ընդգծեց, որ վերջին մեկ ամսվա ընթացքում Հայաստանում քաղաքական գործընթացներն ընթացել են այն տրամաբանությամբ, ըստ որի Սերժ Սարգսյանն է լինելու ՀՀ վարչապետը:

«Նախագահի հարցում ամեն ինչ հստակ է: Ըստ էության, ոչ մի խոչընդոտ չկա և ընդամենը 2-3 օրից այդ հարցը լուծում կստանա: Ամեն դեպքում առայժմ թեթև մի ինտրիգ է մնում վարչապետի անձի ով լինելու հետ կապված: Քննարկումներում երբեմն նկատվում է այն տրամաբանությունը, որ այդ ինտրիգը պահելու համար է, որ ՀՀԿ-ն չի ասում, թե ով է լինելու վարչապետի թեկնածուն: Ինչ-որ առումով դա հասկանալի է: Ըստ էության՝ նախագահի ընտրությունից հետո այդ հայտարարությունը կարվի: Եթե Սերժ Սարգսյանն է լինելու վարչապետը, փոխվարչապետերի հարցն է առաջ գալիս: Այստեղ էլ Կարեն Կարապետյանն է, ով առաջին փոխվարչապետի թեկնածուն է դառնալու: Այլ վերադասավորումների հետ կապված ասելու ոչինչ չկա: Վերջին ամսվա քաղաքական գործընթացի տրամաբանությունը ցույց է տալիս, որ նորություններ, հնարավոր է, չլինեն»,-եզրափակեց քաղաքագետը:

Աննա Բադալյան