Կարապետ Ռուբինյանը` ոստիկանության սադրանքների և Նիկոլ Փաշինյանի քայլերի մասին

ԱԺ նախկին փոխնախագահ, «Հանուն Հայաստան պետության» ճակատի ներկայացուցիչ Կարապետ Ռուբինյանը, գնահատելով այս պահին երկրում տեղի ունեցող իրադարձությունները, «Փաստ»–ի հետ զրույցում նշեց, որ պայքարը շարունակվում է, իսկ նահանջի նշաններ ինքը չի տեսնում:

«Մոտեցումը ստեղծագործական է, ինչը հույսեր է ներշնչում: Կարծում եմ ամեն ինչ ճիշտ է արվում, և վաղ, թե ուշ, հուսով եմ`  Սերժ Սարգսյանը կհասկանա, կըմբռնի այն իրողությունը, որ նա չի կարող շարունակել իշխանավարել այս երկրում: Ատելությունը իր արածների նկատմամբ հասել է այն աստիճանի, որ նա պարզապես չի կարող շարունակել իշխանավարել»,– ասաց Կ. Ռուբինյանը:

Հարցին, թե կիսո՞ւմ է տեսակետը, թե այս օրերին տեղի ունեցող ակցիաները նպատակ ունեն դուրս մղել կուտակված բացասական էներգիան: Եվ երբ մի քանի օրից այն վերջնականապես պարպվի, ամեն ինչ կհանդարտվի և կվերադառնա իր բնականոն հուն, քաղաքական–հասարակական գործիչն ասաց. «Դա տեսակետ չի: Դա հանցախմբի հույսն է, որ այդպես կլինի: Բայց կարծում եմ, որ այդ հույսը չի արդարանա»,– ասաց Կ. Ռուբինյանը:

Խոսելով ոստիկանության գործելաոճի մասին, նա նշեց, որ նրանք, ինչպես միշտ, չեն կարողանա իրենց կաղապարից դուրս գործել:

«Դա ոստիկանություն չի: Բռնապետության տարիներին նրանց պատրաստել, ռեֆորմացրել են որպես իշխանության բութ գործիք և հենց այդտեղ էլ նրանք կպարտվեն»,– ասաց Կ. Ռուբինյանը:

Խոսելով օրերս Թումանյան–Մաշտոց փողոցների խաչմերուկի մոտակայքում մի խումբ երիտասարդների կողմից պետական գույքը կոտրելու դեպքի մասին, երբ թեև բազմաթիվ տեսախցիկներ արձանագրել են և հստակ երևում է, թե ով ով է, և ինչ է անում, բայց ոստիկանությունը, զարմանալիորեն, այդպես էլ չի կարողանում նրանց «հայտնաբերել», Կ. Ռուբինյանն ասաց, որ ի սկզբանե հայտարարվել էր, որ այդ անձինք ցուցարարների հետ որևէ կապ չունեն և դա սադրանք է:

«Տարբեր անուններ են նշում՝ Շմայսի բրիգադ, Սարի թաղի Մհերի բրիգադ: Եթե հիշում եք, ցույցի ժամանակ նույնպես մի այդպիսի միջադեպ եղավ: Խանգարողներ կային, և ակնհայտ էր, որ այդպիսի տարօրինակ վարքագծով տարօրինակ խմբեր կան: Ասեմ ավելին, առավոտյան ես ականատես եղա մի սադրանքի, երբ Օսիպյանը «Ֆրանսիայի» հրապարակի կողմից մի խումբ ոստիկաններով եկավ Բաղրամյան պողոտայի ոստիկանական պատնեշի մոտ, խրոխտ քայլերով մոտեցան, մայթեզրի գազոնից ինչ–որ փայտի, երկաթի կտորներ գտան, անմիջապես մի կասկածելի արտաքինով երիտասարդ հայտնվեց և ասաց, որ դա իրենն է: Եվ շատ տարօրինակ ձևով, նրան իբր բերման ենթարկեցին: Ամբողջ սադրանքը նրանում էր, որ ուզում էին ներկաներին հրահրել, որպեսզի երիտասարդները խառնվեին, պաշտպանեին այն երիտասարդին: Նման պրիմիտիվ պլաններ անընդհատ մշակում և իրականացնում է ոստիկանությունը, բայց ճշմարտությունը շատ շուտ բացահայտվում է: Եվ այդ մասին էլ ոստիկանության կողմից որևէ հայտարարություն չեղավ և պարզ դարձավ, որ դա հերթական սադրանքն է, որին, ի պատիվ մեր երիտասարդների, որտեղ մոտ 10–15–ը գտնվում էին իմ նշած դեպքի վայրում, չարձագանքեցին: Այսինքն, ոստիկանությունը հերթական զուր ջանքերը գործադրեց, բայց ոչնչի չհասավ: Հուսանք, որ մինչև վերջ իմաստուն քայլեր կձեռնարկվեն և Սերժ Սարգսյանն, ի վերջո, կհասկանա, որ երկիրը փակուղի է մտցրել և այդ պատճառով ինքը նույնպես հայտնվել է այդ փակուղում և պետք է հրաժարական տա»,– ասաց Կ. Ռուբինյանը:

Նա դատարկ քննադատություն համարեց քաղաքագիտական շրջանակներից հնչեցվող այն տեսակետները, թե շարժումը քաղաքական օրակարգ չունի: Կ. Ռուբինյանի կարծիքով սա նախընտրական պայքար չէ, որ բուկլետով մարդկանց քաղաքական ուժի ծրագիր բաժանվի, այլ շարժում է, որին մասնակցում է ողջ ժողովուրդը:

«Այս շարժումն իր առջև խնդիր է դրել, որպեսզի երկիրը բռնապետական ճանապարհից վերադարձնի նորմալ, ժողովրդավարական զարգացման ուղի: Եվ եթե դա տեղի ունենա, ապա պետք է նաև տեղի ունենան օրինական արդար ընտրություններ, որի ժամանակ քաղաքական ուժերն իրենց ծրագրերը կներկայացնեն: Հիմա ինչ է, ուզում են, որ այս ամբողջ ժողովուրդը միասնական քաղաքական պլատֆորմով իրենց ներկայանա՞: Դրանք դատարկ խոսակցություններ են»,– ասաց Կ. Ռուբինյանը:

Հասարակական–քաղաքական գործիչը նաև նշեց, որ մինչ այս պահը Նիկոլ Փաշինյանը միայն հարգանքի է արժանի փայլուն առաջնորդի դերը կատարելով: Եվ իր գործունեությամբ ու իր քայլերով ցույց է տվել մնացածների անվճռականությունը և հարմարվողականությունը:

Արմինե Գրիգորյան