Կարինե Դավոյան. «Շատ բարձր իմիջ ունեցող երկիր կունենանք՝ շատերն են գալու Հայաստան»

Զբոսաշրջության ոլորտի վերաբերյալ մտահոգություններն այս օրերին շարունակում են արդիական մնալ: Զուգահեռ, սակայն, Հայաստանի փողոցներում տեսնում ենք մեր քաղաքացիներից ոչ պակաս ոգևորված զբոսաշրջիկների, ովքեր անգամ քաղաքացիական անհնազանդության մասնակից են դառնում: Հայաստանի ներգնա տուրօպերատորների միության նախագահ Կարինե Դավոյանի հետ զրույցում փորձեցինք հասկանալ, թե հեղափոխությունն ի՞նչ ազդեցություն կունենա զբոսաշրջության ոլորտի վրա, երկրի իմիջը որքանո՞վ կբարձրանա:

«Ցանկացած երկրի իմիջ առաջին հերթին ասոցացվում է այն հանգամանքի հետ, թե տվյալ երկրի հասարակությունն ինչպիսին է, կառավարման համակարգը ժողովրդավարակա՞ն է, թե՝ ոչ: Առհասարակ, զբոսաշրջության ոլորտի ներկայացուցիչներս շատ հաճախ Վրաստանի օրինակն ենք բերում: Մասնավորապես, թե ինչպիսի երկիր է, որքան զբոսաշրջիկներ են այցելում և այլն: Մենք բարի նախանձով ենք համեմատական անցկացնում ու նշում, որ այնտեղ զարգանում է զբոսաշրջությունը: Բայց մենք շատ կարևոր փաստ ենք մոռանում. ե՞րբ եղավ այդ զարգացումը: Զարգացում եղավ հեղափոխությունից հետո, երբ Սահակաշվիլին արմատախիլ արեց կոռուպցիան, ստեղծվեցին ժողովրդավարական համակարգեր, անցկացվեցին նորմալ ընտրություններ: Այսինքն՝ նա այդ քայլերով երկրի իմիջը շատ բարձրացրեց»,- Past.am-ի հետ զրույցում ասաց Կարինե Դավոյանը:

Նրա խոսքով՝ զբոսաշրջությունը, առհասարակ, մարդակենտրոն ոլորտ է. «Ժողովրդավարության կիզակետում ևս մարդն է: Այսինքն՝ շատ կարևոր է հումանիստ լինելը: Երբ խոսում ենք այն մասին, թե ինչպես կարող ենք Հայաստանը գրավիչ դարձնել զբոսաշրջիկների համար, այստեղ պետք է ընդգծել այն հարցադրումը, թե զբոսաշրջիկն ինչպե՞ս է իրեն զգում մեր երկրում: Հիմա մենք առանց բռնության շարժման ականատես եղանք: Մենք հիանում ենք մեր ժողովրդի միասնությամբ, համախմբվածությամբ: Մեր ժողովուրդը ոչինչ չվնասեց: Ես հիշեցի 1988 թվականը, երբ ծառի ճյուղ անգամ չէին վնասում և հոգատար էին միմյանց հանդեպ: Երբ զբոսաշրջիկը տեսնում է սա, նա, բնականաբար, շատ բարձր կարծիք է կազմում մեր ժողովրդի վերաբերյալ: Վրաստանում զբոսաշրջությունը զարգացավ ժողովրդավարական համակարգեր հաստատելուց հետո, համոզված եմ՝ նույնը կլինի նաև Հայաստանում»:

Մեր զրուցակիցն ընդգծեց, որ այս օրերին, բնականաբար, կլինեն դժվարություններ, որոնց մասին նաև տուրիստական ընկերություններն են բարձրաձայնել:

«Իրենց ավտոբուսները շրջաններում կանգնել են, զբոսաշրջիկներին ժամերով չեն կարողացել տանել նախաճաշի և այլն: Ներողություն եմ խնդրում մեր զբոսաշրջիկներից և տուրիստական ընկերություններից, բայց սա պայքար է բոլորիս համար: Այս օրերը մենք պետք է կարողանանք հպարտությամբ և արժանապատիվ կերպով հաղթահարել: Ես հարյուր տոկոսով համոզված եմ, որ ամռանը մենք շատ բարձր իմիջ ունեցող երկիր կունենանք և հպարտությամբ կխոսենք Հայաստանի մասին: Պատահական չէր, որ նշեցի 1988 թվականը: 90-ականներին շատ ծանր իրավիճակում էինք, պատերազմ էր: Բայց երբ արտերկրում շփվում էի օտարերկրացիների հետ, հպարտությամբ էի ասում, որ Հայաստանից եմ: Մեզ հիացական հայացքով էին նայում, որովհետև գիտեին, որ մենք մի երկիր ու ժողովուրդ ենք, որը կարողացել է պայքարել, հաղթահարել պատերազմ ու դժվարություններ: Շատ կարևոր է, որ մեզ չնայեն որպես խեղճ ժողովրդի: Ես անձամբ ճանաչում եմ Նիկոլ Փաշինյանին: Նա բավականին կիրթ է, խելացի և իր գաղափարների նվիրյալն է: Եթե ժողովուրդն ինքն է մեկին ընտրում, ապա ժողովրդի ընտրյալը իրեն միշտ հաշվետու է զգում ընտրողների առաջ: Եթե մարդն ընտրված չէ, միշտ արհամարհանքով է նայում քաղաքացուն: Ինչպե՞ս կարող է չընտրվածը 5000 դրամ շպրտել քաղաքացու առջև, հետո հարգել նրան ու լսել նրա պահանջները»,- ասաց նա:

Կարինե Դավոյանի դիտարկմամբ՝ եթե այս օրերը հաղթահարենք, շատ կարճ ժամանակ է հարկավոր հպարտորեն ոտքի կանգնելու համար. «Շատ ու շատ մարդիկ են գալու Հայաստան, որ տեսնեն, թե սա ինչ երկիր է, ինչ ժողովուրդ է: Հիմա ամբողջ աշխարհն է մեզ հետևում, որի հնարավորությունը չունեինք ո՛չ 1988-ին, ո՛չ էլ՝ նույնիսկ, 2008-ին, երբ ողջ ժողովուրդը ոտքի էր կանգնել: Այսօր հնարավորություն ունենք ցույց տալու, թե մենք ինչպիսի քաղաքացիներ ենք: Հնարավորություն ունենք ցույց տալու, որ մեր պայքարը ոչ մեկի դեմ չէ, որ այն հանուն ժողովրդավարության, մարդու իրավունքների, արժանապատվության պայքար է, որ մարդիկ իրավունք ունեն իրենց ձայնը բարձրացնելու և այդ ձայնը պետք է լսելի լինի բոլորի կողմից»:

 

Աննա Բադալյան