Սարո Սարոյան. «Հիմա հնարավոր չէ հին ձևերով խաբել, ստել և դրա վրա նոր քաղաքական իրավիճակ ստեղծել»

Քաղաքագետ Սարո Սարոյանը պատասխանել է Past.am-ի հարցերին:

-Պարո՛ն Սարոյան, ՀՀԿ-ն հայտարարել է, որ աջակցելու է խորհրդարանի 1/3 կողմից առաջադրված թեկնածուին: Այդուհանդերձ՝ Նիկոլ Փաշինյանի անունը միայն անհատական կարծիքների մակարդակով է հնչում: Մայիսի 8-ին ընդառաջ ՀՀԿ-ին չվստահելու հանգամանքներ կա՞ն:

-ՀՀԿ-ին չվստահել միշտ է պետք, որովհետև այդ կուսակցությունը, և ընդհանրապես, ամբողջ ռեժիմը մինչև հիմա հիմնված է եղել կեղծիքի և ստի վրա: Եվ այս ողջ համաժողովրդական շարժման ձևավորման պատճառը հենց նույն կեղծիքն ու սուտն է եղել: Սերժ Սարգսյանի կողմից իր խոստումը չկատարելու արդյունքում է, որ մենք ունենք այս պայքարն ու հեղափոխությունը: Սուտն ու կեղծիքը անբաժան են ՀՀԿ-ից: Սոցիալական ցանցերում նկատած կլինեք՝ միշտ էլ կա այդ կասկածը: Մի խոսք կա՝ «որտե՞ղ են մեզ ուզում գցել»: Դա պատահական չէ՝ նման խոսք է հնչում հենց այդ կուսակցության բնույթի պատճառով: Բայց՝ մի խնդիր է, որ նրանք մշտապես գցելու ցանկություն ունեն, մեկ այլ խնդիր՝ կկարողանա՞ն իրականացնել այդ ցանկությունը, թե՝ ոչ:
Այս օրերին չկարողացան և չեն կարողանալու: Անընդհատ փորձել են ինչ-որ խաղեր ձեռնարկել, բայց մշտապես պարտվել են: Ժողովուրդն ամեն անգամ շատ ավելի արմատական դիրքորոշում է ցուցաբերել: Սա է այն պրոցեսը, որը կատարվում է Հայաստանում: Հեղափոխությունն առաջին հերթին հենց մարդկանց ուղեղներում, գիտակցության ու մտածողության մեջ է տեղի ունեցել: Եվ հիմա հնարավոր չէ հին ձևերով խաբել, ստել և դրա վրա ինչ-որ նոր քաղաքական իրավիճակ ստեղծել: Իհարկե, իրենք մինչև վերջին պահն էլ հույս են ունենալու, որ կկարողանան իրավիճակն իրենց ուզած ճանապարհով տանել, բայց հնարավոր չէ:

-Կա համոզմունք, ըստ որի՝ հեղափոխությունն իր ավարտին հասցնելու համար արտահերթ խորհրդարանական ընտրությունների անցկացումը միանշանակ է, և ՀՀԿ-ն չպետք է մեծամասնություն ունենա ԱԺ-ում: Քաղաքական առումով ընտրություններ անցկացնելու հնարավորություն այս պահին տեսնո՞ւմ եք:

-Հեղափոխությունը վերջնականապես ամրագրելու համար պետք են արտահերթ խորհրդարանական ընտրություններ: Որևէ կասկած չկա, որ այդ հունով էլ ընթանալու է այս հեղափոխությունը: Այլ ճանապարհով չի կարող ընթանալ: Ուրիշ բան, որ գործընթացը կարող է մի քիչ դանդաղ ընթանալ: Այսինքն՝ տեմպերի, ընթացքի ու արագության խնդիր կա: Այն, ինչ պարտված վարչախմբի բեկորները փորձելու են անել, ընդամենը կարողանալու են ժամանակի մեջ մի քիչ ձգձգել ընտրական գործընթացի սկզբնավորումը: Բայց, ի վերջո, այն տեղի է ունենալու, և ոչ ոք որևէ կասկած չի կարող ունենալ: Իրենց կողմից դրված արգելքները միայն դանդաղեցնելու են գործընթացը, բայց չեն կանգնեցնելու և չեն կարող կանգնեցնել այն: Ըստ էության, մի քանի օրից գործընթացը մի քիչ ավելի կարագանա, որովհետև կառավարման լծակներն արդեն կամաց-կամաց նախկին ռեժիմի ներկայացուցիչների ձեռքից դուրս են գալու և հայտնվելու են բոլորովին այլ մարդկանց ձեռքում:

-Նշեցիք, որ բոլոր գործընթացները դեպի արտահերթ ընտրություններ են տանելու: Այնուամենայնիվ, եթե այս փուլում ընտրություններ չլինեն, երաշխիքներ կա՞ն, որ ԱԺ-ում մեծամասնություն ունեցող ՀՀԿ-ն չի տապալի նոր կառավարության օրենսդրական բարեփոխումները, կամ մեկ տարի հետո անվստահություն չի հայտնի Ն. Փաշինյանի կառավարությանը:  

-Իրենք ստեղծելու են արհեստական արգելքներ: Բայց մի բան է ցանկությունը, մեկ այլ բան հեղափոխությունը կանգնեցնելու հնարավորություն ունենալը: ՀՀԿ-ն չի կարող  շրջել, բեկել հեղափոխության ընթացքը, դա ուղղակի անհնար է: Հստակ մեթոդաբանություններով մեր ժողովուրդը հասավ Սերժ Սարգսյանի հրաժարականին, Կարեն Կարապետյանի չառաջադրմանը, Նիկոլ Փաշինյանի թեկնածության առաջադրմանը, օրեր անց էլ կհասնի  նաև վարչապետի պաշտոնում նրա ընտրությանը: Նույն մեթոդաբանությամբ էլ խելոք գառների պես ՀՀԿ-ի ներկայացուցիչներն անելու են այն, ինչն իրենց պարտադրվելու է ժողովրդի և քաղաքական նոր գործիչների կողմից: Իսկ նոր թիմն արդեն իսկ ձևավորման գործընթացի մեջ է: Այլ ճանապարհ իրենք չունեն՝ ստիպված են անել: Այլ ճանապարհը կամ հոգեբուժարանում հայտնվելն է, կամ փախուստը երկրից:

Աննա Բադալյան