Սոֆյա Պողոսյան. «Համակերպվելն ինձ համար միշտ դժվար է եղել»

Դերասանուհի Սոֆյա Պողոսյանը, ով արդեն 10 տարի է նկարահանվում է տարբեր սերիալներում, սիթքոմներում և տեսահոլովակներում, արդեն երեք տարի է՝ սկսել է նաև հետաքրքրվել քաղաքականությամբ:

Past.am-ի հետ զրույցում նա նշեց, որ քաղաքականությունը նրան գրավել է, քանի որ տարիքի բերումով աճել է նաև իրեն շրջապատող աշխարհի հանդեպ ունեցած պահանջմունքը, գիտակցականության մակարդակը, ինչպես նաև իրականության հետ հաշվի նստելու «ստիպված» լինելու հանգամանքը:

«Ավելի երիտասարդ տարիքում, երբ ուզում ես իրականությունից փախչել և «չտեսնել» այն մինուսները, որոնք չես ուզում չտեսնել, քաղաքականությունը չի հետաքրքրում: Բայց գալիս է մի տարիք, որ այդ ամեն ինչն այլևս չնկատելը ոչ միայն հնարավոր չէ, այլև քննադատելի է»,- ասաց Ս. Պողոսյանը:

Ես միշտ կարողացել եմ պահել իմ ներքին անկախությունը

Նրա կարծիքով կարծրատիպը, թե դերասան-դերասանուհիները կամ ճանաչված մարդիկ ավելի ապահովված կյանքով են ապրում, չի համապատասխանում իրականությանը: Նրանք էլ, ինչպես սովորական մարդիկ, նույն հոգսերն ունեն: «Մեր երկրում ապրող բոլոր մարդկանց խնդիրներն էլ մինչ օրս նույնն են եղել, բայց կարծում եմ, որ այսուհետ մեր երկրում միայն դրական իրադարձություններ պետք է լինեն: Նշեմ, որ վերջին երեք տարիների ընթացքում մասնակցել եմ բոլոր բողոքի ակցիաներին և բարձրաձայնել եմ իմ դժգոհության մասին: Երբեք չեմ առաջնորդվել նրանով, որ եթե հայտնի մարդ է, ուրեմն պետք է նաև լռի: Եվ, բարեբախտաբար, ես միշտ կարողացել եմ պահել իմ ներքին անկախությունը, որպեսզի որևէ մեկը չկարողանա ինձ ստիպել լռել կամ ասել այն, ինչ ես չեմ ուզում: Նախկին դիկտատուրայի բացասական կողմերից մեկն էլ այն էր, որ մշակույթի ներկայացուցիչներից շատերը, զոհ գնալով այդ ամենին, ստիպված կամ կամավոր կերպով, չեն կարողացել խույս տալ այդ ամենից և դարձել են այդ համակարգի մի մասնիկը: Իհարկե, այդ համակարգի մեջ չմտնելը կամ այն շրջանցելը շատ դժվարություններ է առաջացնում և ստիպում է ավելի բարդ շղթայական ուղի անցնել: Ուստի, ստիպված, շատերը համակերպվում են այդ խաղի կանոններին և սկսում են նույն խաղի կանոններով առաջ շարժվել: Համակեպվելն ինձ համար միշտ ավելի դժվար է եղել: Բայց ես միշտ ընտրում եմ ավելի բարդ, բայց ճիշտ ճանապարհը, քան հեշտը և հասանելին»,- ասաց Ս. Պողոսյանը:

Փաշինյանին մարդիկ կուռքի՞ են վերածել

Բոլոր քաղաքական գործիչներից նա Նիկոլ Փաշինյանին հավատաց, քանի որ վերլուծել է նրա ապրած կյանքը, իսկ աչքերում տեսել անկեղծություն ու բարություն:

«Շատ կարևոր է, որ մեր բոլոր քաղաքական գործիչների մեջ բարությունը գերիշխի: Իսկ դրա համար պետք է սիրել դիմացինին, որպեսզի բոլոր գործողությունները դրական ընթացք ունենան»,- ասաց սիրված դերասանուհին:

Ս. Պողոսյանը համաձայն չէ այն կարծիքին, որ մարդիկ սկսել են Ն. Փաշինյանին կուռքի վերածել: Նրա կարծիքով, դա ընդամենը դրական էմոցիաների և հասարակության մոտ առկա էյֆորիկ տրամադրությունների արդյունք է, որն, ըստ նրա, կրկին Ն. Փաշինյանի ձեռքբերումն է, քանի որ հենց նա է կարողացել մարդկանց մոտ նման պոռթկում առաջացնել:

«Թվում է, թե Ն. Փաշինյանին կուռքի են վերածել, բայց գիտակից մարդիկ բոլորն էլ հասկանում են ներկայի թե՛ մինուսները, թե՛ պլյուսները: Ես գնահատում եմ, որ նա կոնկրետ քայլեր է առաջարկում, իսկ մարդիկ էլ գիտակցեցին, որ ամեն մեկիս քայլը նշանակություն ունի: Եվ պետք չէ նստել ու սպասել, որ դիմացինը ինչ-որ բան փոխի: Յուրաքանչյուրը եթե իր գործի մեջ լինի բարեխիղճ, լավ կատարի իր աշխատանքը, վերանա անտարբերությունը, վախի մթնոլորտը, կարծում եմ՝ կարճ ժամանակում շատ բան կփոխվի»,- ասաց Ս. Պողոսյանը:

Հիմա այնքան շատ սեր կա, և ես ուզում եմ, որ այն պահպանվի

Անկեղծ զրույցի ժամանակ նա ասաց նաև, որ վերջին մեկ տարում իր գլխում մշտապես երկրից արտագաղթելու մասին միտքն է պտտվել, բայց հիմա, երբ Հայաստանում նման փոփոխություն է տեղի ունեցել, նա այնքան է ուրախացել, որ արտագաղթելու մասին այլևս չի մտածում:

«Չեք պատկերացնի, թե մեղքի զգացման ինչ մեծ բեռ է իմ ուսերից ընկել, որ նման կերպ էի մտածում: Հիմա այլևս արտագաղթելու մասին չեմ մտածում, ուզում եմ ապրել, շարունակել ստեղծագործել և իմ կյանքի հետագա տարիներն անցկացնել Հայաստանում: Լավագույն լուծումն այն է, երբ մարդն ապրում է իր ծննդավայրում և տարվա մեջ մեկ անգամ հնարավորություն է ունենում ճանապարհորդելու: Իհարկե հասկանում եմ, որ տարիների ընթացքում կուտակված խնդիրները մեկ օրում չեն լուծվելու, և հիմա մենք հասել ենք ամենադժվար փուլին, բայց հաջողության հասնելու միակ բանաձևը՝ գործը սիրով անելն է: Եվ ես կարծում եմ, որ եթե բոլորս սիրով կատարենք մեր գործը, անկախ նրանից, թե ինչքան ենք ջանք գործադրում, միևնույն է, ո՛չ կհոգնենք, ո՛չ էլ թևաթափ կլինենք: Հիմա քաղաքում, օդում այնքան շատ սեր կա: Ես շատ եմ ցանկանում, որ այդ ամեն ինչը պահպանվի, և մենք կարողանանք դրանից բռնել ու այն երբեք բաց չթողնել»,- խոսքը եզրափակեց սիրված դերասանուհին:

Արմինե Գրիգորյան