«Դարակներ», որտեղ կուտակված է նախկին իշխանությունների «աղբը». «Փաստ»

INTERVIEW 22 May, 2018 8:12

«Փաստ» օրաթերթը գրում է.

Տնօրինվող բյուջեն բավականաչափ կմեծանա, եթե տնտեսական մի շարք հարցեր լուծվեն: «Փաստ»–ի հետ զրույցում նման տեսակետ հայտնեց տնտեսագետ Զոյա Թադևոսյանը՝ անդրադառնալով քաղաքական նոր իրավիճակով պայմանավորված հնարավոր տնտեսական զարգացումներին: «Այդ տնտեսական հարցերը վերաբերում են չարաշահումներին, յուրացումներին, որոնք առկա են եղել անցած 20 տարիների ընթացքում, երբ նաև բյուջետային ծախսերը նպատակային չեն իրականացվել: Բյուջեի եկամուտների ավելացումը կարևոր է հատկապես այլ նպատակներով իրականացվող ծախսերն ավելացնելու համար: Թեև այս տարվա բյուջեն արդեն պլանավորված է, բայց գալիք տարվա համար որքան բյուջետային մուտքերը մեծ լինեն, այնքան կավելանան սոցիալական ծախսերը, ինչպես նաև՝ պետական միջոցներով իրականացվող մի շարք այլ ծախսեր: Պետք է հայտնաբերվեն բոլոր յուրացումները, պետք է հայտնաբերել նաև յուրացնողներին, իսկ գումարները գանձվեն ու վերադարձվեն բյուջե»,–ասաց տնտեսագետը: Նոր նախարարներից ոմանք արդեն իսկ կոռուպցիոն ռիսկերի վերաբերյալ հրապարակումներ են անում: Զոյա Թադևոսյանը երևույթը նորմալ է համարում: «Եթե իշխանություններն ստանձնել են այդ պատասխանատվությունը, ապա օրենքի և օրինականության շրջանակներում իրենց պարտավորությունները պետք է կատարեն: Չի կարելի վերցնել երկրի կառավարման պատասխանատվությունը և այն վերածել հափշտակության, յուրացումների, գողանալու և հանցավոր այլ ակտերի: Իշխանությունները պետք է հասկանան, որ ժողովրդի ծառաներն են: Իսկ այն, ինչը կար մեր երկրում 20 տարի շարունակ, աննորմալ երևույթ էր: Դրա համար էլ քաղաքական ընդդիմությունը պայքարում էր, բարձրաձայնում այն բոլոր սարսափազդու երևույթների մասին, որոնք անուշադրության էին մատնվում իշխանության կողմից: Պատճառն այն էր, որ ուժը, վերահսկողությունը և բոլոր հնարավոր լծակներն իրենց ձեռքում էր: Հիմա իրավիճակը հենց այդ ուղղությամբ է փոխվել. իշխանության է եկել մի քաղաքական ուժ, որը ժո ղովրդի վստահությունն է շահում ու ժողովրդին խոստացել է այլևս թույլ չտալ, որ տեղի ունենա այն, ինչ–որ տեղի էր ունենում նախկինում: Բոլորը խելացի են ու կրթված: Վստահ եմ, որ չեն կրկնի նույն սխալները, որոնք եղել են: Հիմա կամաց–կամաց բա ցում են «դարակները», որտեղ կուտակված է նախկին իշխանությունների աղբը: Այդ աղբի միջից կարող են վեր հանել այն բոլոր հակապետական արարքները փաստող տվյալները, որոնք ցույց կտան, որ ունակ են գործնական քայլեր անել: Բացի այդ, բարձրացված յուրաքանչյուր հարց լայն քննարկման ու լայն արձագանքի առարկա պետք է դառնա. յուրաքանչյուր իշխանավոր պետք է իմանա, որ այսուհետ պետության հանդեպ ոտնձգություն անելը քրեորեն պատժելի արարք է»,– ընդգծեց Զ. Թադևոսյանը: Նրա խոսքով՝ նոր կառավարությանը պետք է տալ գոնե ավանդական 100 օրը: «Իրավունք չունենք այդ ընթացքում ինչ–որ շատ սպասումներ ունենալ, որովհետև հնարավոր չէ մեկ գրչի հարվածով փոխել այն ամենը, ինչ եղել է մեր երկրում: Շատ լուրջ և շատ պատասխանատու ու բարդ գործընթաց է: Շատ հաճախ իշխանությունները կարող են կաշկանդվել տարբեր ոլորտները կարգավորող օրենքների այս կամ այն դրույթներից, որոնք չեն կարող թույլ իրագործել այն, ինչն իրենք են ուզում: Այդ դեպքում օրենքում նոր դրույթներ ներառելու խնդիր է առաջանում: Բավականին լուրջ ու երկարատև գործընթաց է, գոնե 100 օրը պետք է լռության ժամկետ համարենք: Ի վերջո՝ անգամ 100 օր հետո փոփոխությունները դանդաղ են լինելու, կարևորն այն է, որ դրանք անշրջելի լինեն»,–եզրափակեց նա:

Շարունակությունը՝ «Փաստ» օրաթերթի այսօրվա համարում