Ընտրությունների ժամկետի առումով պետք է նայել, թե ինչ է առաջարկում ՀՀԿ-ն ու անել հակառակը. Արամ Մանուկյան

 

Արտահերթ խորհրդարանական ընտրությունների անցկացման ժամկետների առումով պետք է նայել, թե ինչ է առաջարկում ՀՀԿ-ն ու անել հակառակը: Այս մասին NEWS.am-ի հետ զրույցում նշեց ՀԱԿ անդամ Արամ Մանուկյանը:

 

Անդրադառնալով Ընտրական օրենսդրության բարեփոխման հանձանաժողովի նիստում ընդունված որոշումներին, ըստ որի առաջարկվում է, որ 100 տոկոս համամասնական փակ ցուցակներով ընտրություն, ինչպես նաեւ անցողիկ շեմը կուսակցությունների համար նվազեցնել 5-ից 4 տոկոսի, իսկ դաշինքների համար՝ 7 տոկոսից 6 տոկոսի, Արամ Մանուկյանն ասաց, որ հիմնականում իրենց տեսակետները համընկնում են հանձնաժողովի տեսակետների հետ. «Ես շատ ուրախ եմ որ իրենք հակված են մաքուր հարյուր տոկոսանոց համամասնականին, ոչ թե պոչերով համամասնական, որտեղ ներսում ցուցակների համարները կարող էին փոխվել»:

 

Դիտարկմանը, որ փակ ցուցակներով ընտրությունը ՀՀԿ-ն նահանջ է համարում ժողովրդավարությունից, քանի որ ընտրողն իրավունք չունի ցուցակում ներառված մարդկանց քվեարկել, այլ միայն քվեարկում է ցուցակին, ՀԱԿ անդամն ասաց. «Ժողովրդավարություն համարվող գործող ընտրակարգը այլանդակություն էր նախորդ ընտրությունների ժամանակ, երբ ոչ քաղաքական մարդիկ 20 անգամ ավելի շատ ձայն ստացան, քան քաղաքական դեմքերը: Ռեյտինգային ընտրակարգն ամբողջությամբ կոռուպցիայի, կաշառակերության, զորբայության եւ վարչական լծակներ կիրառելու  համակարգ է: Այդ առումով պետք է լինի մաքուր հարյուր տոկոսանոց ցուցակ, քաղաքական ցուցակ: Դա մի առավելություն էլ ունի, որը շատ կարեւոր է. քաղաքացին որեւէ նշում չի անում քվեաթերթիկի վրա, ոչ թանաք, ոչ գրիչ, քաղաքացին վերցնում է քվեաթերթիկն ու դնում ծրարի մեջ, ինչը շատ լավ է, բազմաթիվ կեղծիքներ, խախտումներ բացառվում են այս մեխանիզմով»:

 

Ինչ վերաբերում է ընտրությունների ժամկետներին, Արամ Մանուկյանն ասաց. «Ժամկետների առումով պետք է նայել, թե ինչ է առաջարկում ՀՀԿ-ն ու անել հակառակը: Ուրիշ ցուցիչ չեմ տեսնում: ՀՀԿ-ին այս 20 տարիների ընթացքում վնասարարության հեղինակն է, հետեւաբար նա պետք է ցանկանա այնպես անել, որ իրեն շուտ չվերացնես: Ուստի հարկավոր է անել այն, ինչն իրենք չեն ուզում. այսինքն որքան շուտ, այնքան լավ: Վերջին բացահայտումները, որով հասարակությունը ոգեւորվում, ուրախանում է, ընդամենը ծաղիկներն են: Այն համակարգը, որով գործել է իշխանությունը, հարյուր հազարավոր մարդկանց արտագաղթի պատճառ է եղել, այդ ամենի պատասխանատուները ՀՀԿ-ականներն են, որոնցից քաղաքական առումով շատ շուտ պետք է ազատվել, ինչքան շուտ լինեն ընտրությունները, այդքան լավ»:

 

ՀԱԿ անդամը չհամաձայնեց տեսակետի հետ, որ օրենքները պետք է շատ լավը լինեն, որ ընտրությունը լավը լինի. «Ընտրությունը լավ լինելու համար, ժողովրդի գործոնն է ամենակարեւորը: Ժողովուրդը կանգնած էր իշխանափոխության, հեղափոխության կողքին, այդ էներգիան հարկավոր է օգտագործել: Այդ էներգիան բնականաբար աշնանը ավելի շատ է լինելու, քան գարնանը: Դա օրինաչափ ու տրամաբանական է, հետեւաբար, պետք է որքան հնարավոր է, ընտրությունները բերել դեպի աշուն»:

 

Դիտարկմանը, որ ՀՀԿ ներկայացուցիչ Դավիթ Հարությունյանը հայտարարել է, որ  եթե լրիվ փակ ցուցակներով համամասնական լինի, ապա տարածքներից պատգամավորներ չեն ընտրվի, բոլորը Երեւանից կլինեն, Արամ Մանուկյանը արձագանքեց. «Այս ընտրությունները կլինեն հաջողված, եթե հնարավորինս լինեն քաղաքական, երբ մրցակցության մեջ կմտնեն ոչ թե գյուղի քյոխվեքը, կրիմինալը, այլ կուսակցական ծրագրերը: Այդ առումով քաղաքական ծրագրերի մրցակցությունը լավագույն ընտրությունն է: Մենք պետք է գնանք հենց ծրագրերի ընտրության: Յուրաքանչյուր կուսակցություն թող ներկայացնի պետության զարգացման իր մոդելը, քաղաքացին էլ ընտրի: Ոչ թե ընտրի կրիմինալին, գողին, քրեական հեղինակությանը, այլ ընտրի քաղաքական ծրագրեր: Առաջիկա ընտրություններում քաղաքական բաղադրիչի ավելացումը խիստ անհրաժեշտ է: Քաղաքացին ոչ թե պետք է իմ ու Պողոսի մեջ ընտրի, այլ իմ ու Պողոսի ներկայացրած ծրագրերը»: