Գյուղապետը հերքում է, իսկ համագյուղացիները նրա հրաժարականն են պահանջում. «Փաստ»

«Փաստ» օրաթերթը գրում է.

Արմավիրի մարզի Եղեգնուտ համայնքի բնակիչները արդեն երկրորդ օրն է բողոքի ակցիա են իրականացնում համայնքում՝ պահանջելով ՀՀԿ–ական գյուղապետի հրաժարականը: Գյուղապետը՝ Ռազմիկ Մարգարյանը, սակայն, չի պատրաստվում հրաժարվել իր պաշտոնից:

Թեև Մարգարյանի պաշտոնական կենսագրության մեջ նշված է, որ նա ՀՀԿ անդամ է, գյուղապետը «Փաստ»–ի հետ զրույցում նշեց, որ ինքը ՀՀԿ–ական չէ, պարզապես ընտրություններին առաջադրվել է այդ կուսակցության կողմից: Բացի այդ, ՀՀԿ–ական լինելը խարան չի համարում: Շեշտում է, որ մարդ կարող է լինել ՀՀԿ–ական և նորմալ աշխատել: Բայց համագյուղացիներն այդպես չեն կարծում: Մեզ հետ զրույցում Եղեգնուտի բնակիչ Աշոտ Խուրշուդյանը նշեց, թե իրենք դեմ են գյուղապետին, քանի որ նա իր ղեկավարած տարիներին գյուղի բյուջեն ըստ նպատակի չի օգտագործել, գյուղի համար ոչինչ չի արել: Ասում է, թե 34 տարի՝ կոմունիստական հասարակարգի օրերից, ղեկավարում է գյուղը:

«ՀՀՇ–ն եկավ, դարձավ ՀՀՇ, ՀՀԿ–ն եկավ, դարձավ հանրապետական, հիմա էլ ուզում է ուրիշ կուսակցության մեջ մտնել: Գյուղը թալանի է ենթարկել: Մի երկու սուտի բան է սարքել, վերանորոգել, մնացածը թալանվել է: Անապահով ընտանիքների անվան տակ գումար է դուրս գրել իր եղբոր, գյուղապետարանի աշխատակիցների բարեկամների, գյուղում երկհարկանի տուն, երկու մեքենա ունեցողների, Երևանում տուն ունեցողների անունով, իսկ անապահով ընտանիքները ոչինչ չեն ստացել»,– նշում է նա՝ հավելելով, որ այդ ամենն իրենք տեսել են ավագանու որոշումներից, որ գտել են համացանցում:

Մեր այն դիտարկմանը, թե համագյուղացիների ներկայացմամբ տարբեր տարիներ եղել է ՀՀՇ–ական, հետո ՀՀԿ–ական, իսկ հիմա էլ պատրաստվում է այլ կուսակցության անդամագրվել, գյուղապետն այսպիսի պատասխան տվեց. «Ես ՀՀՇ–ի անդամ չեմ եղել, իրենց երբևիցե չեմ սիրել: Ես ՀՀԿ անդամ չեմ եղել, բայց առաջադրված եմ եղել ՀՀԿ–ի կողմից 2008 և 2012 թթ.: Ամբողջ հանրապետության կեսը ՀՀԿ–ական է: Դա ողբերգությո՞ւն է, թե՞ անբարոյականություն: Հանրապետականների մեջ խորհրդային դպրոց անցած մարդը չի՞ կարող լավ աշխատել: Ես աշխատել եմ իմ խղճի առաջ մաքուր, պարկեշտ ու բարոյական»:

Մարգարյանի հրաժարականի պահանջ եղեգնուտցիները տարիներ առաջ էլ են ունեցել: Բողոքի ակցիաներ են կազմակերպել նախագահական նստավայրի դիմաց, դիմում–բողոքներ ներկայացրել վարչապետին ու դատախազին: Բայց գյուղացիների համար անհասկանալի պատճառներով գործը կարճվել էր:

Մեր հարցին՝ եթե այսքան տարի դեմ եք եղել այդ գյուղապետին, ինչո՞ւ եք կրկին ընտրել, Աշոտ Խուրշուդյանը պատասխանեց, թե իրենք չեն ընտրել: Մարգարյանին ընտրել է մարզպետը՝ կանչելով գյուղի պետական աշխատողներին ու ստիպելով, որ իրենք ու իրենց բարեկամներն ընտրեն նրան, հակառակ դեպքում՝ կհեռացվեն աշխատանքից:

Գյուղացիների խոսքով, գյուղապետը 1 միլիոն 500 հազար դրամով նկար է գնել, ինչն իրենց համար անընդունել է, այն դեպքում, որ խեղճ գյուղացին չի կարողանում շնչել: Համայնքի ղեկավարի խոսքով, սակայն, իրենք աշխատում են առցանց, ֆինանսների նախարարության հաստատմամբ, պաշտոնական կայքն էլ վերահսկվում է: Արմավիրի մարզպետարանի կայքում էլ տեղադրված են ավագանու բոլոր որոշումները: Հարցին, թե իր հարազատները երբևիցե օգնություն ստացե՞լ են, Մարգարյանը պատասխանեց.

«Աստված չանի, որ իմ բարեկամները օգնության կարիք ունենան: Կամ գյուղապետարանի աշխատակիցների բարեկամներին մենք ինչպե՞ս ենք օգնություն տալիս: Այդ ի՞նչ համաշխարհային օգնություն է: Ախր իրենք արհեստավարժ ստախոսներ են: 27 տարի է իմ դեմ են, ասում են՝ դու պետք է չաշխատես, մենք պետք է աշխատենք, մեր ազգը մեծ է, մեր ազգի ներկայացուցիչը պետք է աշխատի: Խոսքը Խուրշուդյանների ու Մկրտչյանների մասին է»:

Մարգարյանի խոսքով, պետությունն իրեն լուրջ գումարներ է պարտք: Գազաֆիկացում է արել, որի արդյունքում 7 գյուղ այդ գազատարից է օգտվում: 13 հատ պոմպակայան է կառուցել ապահովելու համար համայնքի ոռոգման ջուրը, հորատել է խորքային հոր խմելու ջրի համար, և այդ խմելու ջուրն ուղղել է ժողովրդին: Կառուցել է նոր փողոցներ, գյուղապետարանի, մանկապարտեզի շենքերն ու բուժկետը: Եվ այդ ամենն, ինչպես ինքն է ասում, ոչ բյուջեի հաշվին:

«Իմ բյուջեում չի կարող մեկ լումա այլ գումար լինել: Ամեն ինչը տեղը տեղին արված է: Ինչի մասին է խոսքը: Օգնությունն էլ տալիս եմ այն մարդկանց, ովքեր սոցիալապես անապահով են կամ կարիքավոր: Այդ ինչ բամբասանք է: Ինչ կտավ գնել, այ քեզ բան, տենց բան չկա, սուտ է: Ես երկու նկար ունեմ գրասենյակում, որոնք եղբորս աշխատանքներն են, բայց դրանք իմ սեփականությունն են»,–նշեց նա:

Շարունակությունը՝ «Փաստ» օրաթերթի այսօրվա համարում