Քաղաքական դիվիդենտներ և փայաբաժին իշխանությունից. «Փաստ»

«Փաստ» օրաթերթը գրում է.

ՊՊԾ գունդը գրաված խմբի անդամները շարունակում են զարմացնել, առնվազն զարմացնել: Այս անգամ խմբի` խափանման միջոցը փոխվելու հետևանքով ազատության մեջ հայտնված հերթական անդամը շտապել է հայտարարել, թե Հայաստանում միայն «իշխանիկների տեղերն են փոխվել» և որ «հին տականքներին փոխարինելու են եկել նոր տականքները»: Ինչպես չզարմանալ նման հայտարարություններ լսելիս, դժվար է ասել, որովհետև, եթե այս խմբի անդամը համարում է, որ ինքն անմեղ է նստել, քանի որ «հները» տականք էին, ապա ուրեմն ի՞նչ, «նորերն» էլ տականք են, որովհետև նորերի օրոք նա դո՞ւրս է գալիս բանտից:

Տարօրինակ է, չնայած մյուս կողմից զարմանալ բոլորովին էլ պետք չէ, այլ պարզապես պետք է հետհայացք գցել խմբավորման գործունեությանը, նրանց հայտարարություններին, բառապաշարին, շեշտադրումներին և այլն: Երբ այս ամենին ուշադրություն դարձնենք, շատ չէ, հպանցիկ, ապա կտեսնենք, որ այսօրինակ հայտարարությունները ավելի ու ավելի հաճախակի են դառնալու: Ի վերջո, չգիտենք կամ գուցե թե գիտենք` ինչու, ՊՊԾ գունդ ներխուժած խմբի անդամները սկսեցին մեկը մյուսի հետևից հայտնվել ազատության մեջ` չարդարացվել, իհարկե, բայց դե դա այդքան էլ էական չէ: Ու սա այն դեպքում, երբ մենք գործ ունենք ահաբեկչության երանգներով և պետական դավադրության հստակ երևացող տարրերով իրադարձության հետ, որի արդյունքում Հայաստանում վարչապետ փոխվեց, որի հետևանքով երեք ոստիկան զոհվեց, բայց որի իրականացնողներին դեռ շարունակում են հերոսացնել որոշակի շրջանակներ: 

Ամենայն հավանականությամբ, Երևանի ավագանու ընտրություններին ընդառաջ, այս խմբի համակիրներն ու ազատության մեջ գտնվող անդամները կփորձեն արդեն քաղաքական դիվիդենտներ և, ինչու չէ, նաև քաղաքական իշխանությունից փայաբաժին պահանջել: Ի վերջո, հենց փայաբաժնի ակնարկներ են բոլոր այն հայտարարությունները, թե հեղափոխությունն առանց իրենց տեղի չէր կարող ունենալ: ՊՊԾ գունդ գրաված խմբի շուրջ զարգացումներում առայժմ առանցքային դրական կետերից մեկն այն էր, որ վարչապետ Նիկոլ Փաշինյանը հայտնեց իր դիրքորոշումը` նշելով, որ «Սասնա ծռեր» անվանումով քաղաքական կազմակերպություն իրեն հայտնի չէ, իսկ ինչ վերաբերում է ՊՊԾ գունդը գրաված խմբին, ապա նրանց մասով ընթանում է դատական գործընթաց:

Սակայն սա չի նշանակում, որ խմբավորման համակիրներն ու ազատության մեջ գտնվող անդամները կփորձեն որոշակի քա ղաքական կառույցի տեսքով մասնակցել երկրում ընթացող գործընթացներին: Սա մեծագույն վտանգ կարող է դառնալ հայաստանյան հասարակության ներքին կայունության ու հանգստությանը առնվազն, քանի որ որևէ երաշխիք չկա, որ հերթական անգամ այս խմբավորումը` անկախ նրանից` հանդես կգա քաղաքական կառույցի, թե որևէ այլ անվանումով, բովանդակության մեջ չի մնա զուտ զինված խմբավորում, որը հարցերի լուծման ճանապարհ է տեսնում զենքն ու սպանությունը: 

Շարունակությունը՝ «Փաստ» օրաթերթի այսօրվա համարում