Ամբիոնի վարիչը՝ Ռոբերտ Քոչարյանին. անամոթությունը պետք է սահման ունենա

Հուլիսի 26-ին Ռոբերտ Քոչարյանը հարցազրույց է տալիս «Երկիր Մեդիա» հեռուստաընկերությանը և արդարանում Հայ ժողովրդի առջև՝ իբրև թե ինքը ոչ մի մեղք չի գործել, և իր նկատմամբ քաղաքական հետապնդում է իրականացվում, չիմանալով, որ մարդկանց վրա գործ սարքելու իրենց ժամանակներն անվերադարձ պատմության գիրկն են անցել: Քոչարյանը հերթական անգամ փորձում է հիմարի տեղ դնել մի ամբողջ ժողովրդի, ազգի: Պարոն Քոչարյան, մի՞թե դուք չգիտեք, որ չեք ընտրվել ժողովրդի կողմից ո՛չ 1998 և ո՛չ էլ 2003 թվականին, որ կեղծել եք ընտրությունները բոլոր մակարդակներում: Եթե Սերժ Սարգսյանը 2008 թ. ընտրվել էր հանրապետության նախագահ, ապա այդ ինչպե՞ս եղավ, որ մարտի 1-ին ընտրությունների արդյունքները բողոքարկելու դուրս եկան մի քանի հարյուր հազար մարդ: Ինչպե՞ս հասկանալ, որ Սերժ Սարգսյանի կազմակերպած միտինգին տասնյակ հազարավոր մարդիկ լքեցին Հանրապետության հրապարակը և միացան Լևոն Տեր-Պետրոսյանի կազմակերպած հանրահավաքին: Պարոն Քոչարյան, դուք իզուր եք կարծում, թե ձեր նկատմամբ հաշվեհարդար են կազմակերպում Ձեզ քաղաքական ասպարեզից հեռացնելու համար: Դուք այլևս քաղաքական գործոն չեք և ոչ մեկին այլևս չէք հետաքրքրում: Ձեր վարկանիշը հայ ժողովրդի շրջանում 0-ից էլ ցածր է: Ձեր նկատմամբ շատ մեղմ են վերաբերվում մեղադրանք առաջադրելով ընդամենը 1 հոդվածով, այն է՝ ՀՀ քրեական օրենսգրքի 300.1 հոդվածի 1-ին մասով՝ այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: Իսկ ո՞վ պետք է պատասխան տա ձեր իշխանության վարած քաղաքականության արդյունքում հանրապետությունը լքած և հայրենազրկված տասնյակ հազարավոր մարդկանց համար, ո՞վ պետք է պատասխան տա երկիրը թալանելու, մարդկանց վրա անօրինական գործեր սարքելու համար, քաղաքական դաշտը ամայացնելու, խայտառակ սեփականաշնորհում կազմակերպելու համար, ո՞վ պետք է պատասխան տա մարտի 1-ի զոհերի մայրերին ու նրանց որբացած երեխաներին: Դուք, պարոն Քոչարյան, Ձեր հաշիվների մեջ սխալվեցիք, և պարզվում է՝ այդքան էլ լավ չեք ուսումնասիրել հայի հոգեբանությունը: Մտածում էիք, թե ամեն ինչ կարելի է փողով գնել և հավերժացնել ձեր իշխանությունը: Դուք Հայաստան բերեցիք թուրքի արատավոր մշակույթը, այն է՝ ցանկացած հարց լուծել կաշառք տալու միջոցով: Դուք հաշվի չառաք նույնիսկ հեղափոխությունների համաշխարհային փորձը, որ հեղափոխական իրավիճակներում իշխանությունը պահելու համար չի կարելի կրակել սեփական ժողովրդի վրա, որ այն չունի ոչ մի հեռանկար և ճիշտը հեռանալն է: Դուք պատմության մեջ մնացիք որպես չարագործ նախագահ, ով հանուն իր իշխանության և շահի կրակեց հայոց պետականության և հայ ժողովրդի վրա: Պարոն Քոչարյան, դուք ձեզ համարում էիք հանրապետության «միակ տղամարդը»: Իսկական և ուժեղ տղամարդը ոչ թե ահաբեկում և կեղեքում է սեփական ժողովրդին, այլ սիրում և պաշտպանում է նրանց: Թույլ և բարդույթավորված տղամարդն է ձեռք բարձրացնում իր ընտանիքի անդամների վրա: Դուք ուժեղ էիք ձեր իշխանական լծակներով՝ զենքով ու զորքով: Մի՞թե դուք չտեսաք, թե ինչպիսի ցնծություն ապրեց հայ ժողովուրդը ձեր իշխանությունից պրծնելու համար: Այդպիսի տոնակատարություն չեն կազմակերպում անգամ պատերազմում թշնամու դեմ տարած հաղթանակի դեպքում: Դուք հայ ժողովրդի հետ ընդանուր ոչինչ չունեք: Ձեր նպատակը ցանկացած գնով իշխանություն պահելն է եղել և հարստանալը: Դուք ծանր մեղք եք գործել՝ ձեռք բարձրացնելով հայ ժողովրդի և հայոց պետականության վրա: Դուք այս երկիրը համարել եք ձեր պապերի կալվածքը և թալանել այն մինչև վերջ: Դուք նվաստացրել եք հայի արժանապատվությունը, դուք հայ ժողովրդին հասցրել եք թշվառության, դուք նրան ստիպել եք դառնալ անբարոյական: Ինչպես ասում են, ինչ սկիզբ ունի, այն նաև վերջ ունի: Հիմա եկել է հատուցման ժամը, և ձեր պատիժը աշխատեք կրել արժանապատվությամբ: Դրա համար ոչ հանրապետության վարչապետը և ոչ էլ հայ ժողովուրդը ամենևին էլ չեն չարախնդում կամ ուրախանում. հայ ժողովուրդն ամաչում է, որ այդպիսի նախագահ է ունեցել: Սա պետք է ոչ միայն մեզ, այլ նաև ձեր երեխաներին: Սա արվում է իրավական երկիր և արդար հասարակություն ունենալու համար, ինչը արդեն հարյուրամյակներ հայի երազանքն է: Սա պետք է անցյալի կրկնություն թույլ չտալու համար: Այս ամենի համար պետք է արժանին մատուցելլ ՀՀ վարչապետին և լիովին հավանություն տալ նրա վարած կուրսին: Պարոն Քոչարյան, մի դուրս եկեք եթեր, իզուր աղ մի լցրեք հայ ժողովրդի վերքի վրա: Ձեր գործած աններելի մեղքերի համար Դուք սպասեք նաև ավելի դաժան դատավճռի՝ Բարձրյալի դատավճռին:

ՀԱՅԿ ՂԱԶԱՐՅԱՆ

Հայաստանի ազգային ագրարային համալսարանի ագրոբիզնեսի կազմակերպման և կառավարման ամբիոնի վարիչ