Եգիպտոսում A-321 ինքնաթիռի կործանումն անհանգստություն է առաջացրել հայ զբոսաշրջիկների մոտ

INTERNATIONAL NEWS 5 November, 2015 11:40

Շարմ Էլ Շեյխից Սանկտ Պետերբուրգ թռչող ռուսական A-321 ինքնաթիռի կործանումը լուրջ անհանգստություն է առաջացրել նաեւ հայ զբոսաշրջիկների մոտ, եւ Հայաստանում գործող տուրիստական գործակալությունները փաստում են, որ որ Եգիպտոս մեկնող զբոսաշրջիկների մոտ նկատվում է թեթեւ խուճապ: «Արմենպրես»-ի թղթակիցը զրուցել է Հայաստանում գործող ավելի քան մեկ տասնյակ տուրիստական գործակալությունների ներկայացուցիչների հետ եւ պարզել, որ ինքնաթիռի կործանումից հետո գրեթե ամեն օր ստանում են մի քանի տասնյակ զանգեր՝ ճշտելու՝ արդյո՞ք կարող են դեպի Շարմ Էլ Շեյխ իրենց տոմսը փոխել:

«Շատերն էլ զանգում են պարզապես ճշտելու, թե ինչ իրավիճակ է այնտեղ: Բազմաթիվ զբոսաշրջիկների անհանգստացրել է այն հանգամանքը, որ մի քանի խոշոր ավիաընկերություններ հրաժարվել են Շարմ Էլ Շեյխ թռիչքներից: Շատերն էլ սպասում են հավաստիացման՝ արդյոք ինքնաթիռը կործանվել է տեխնիկական անսարքության պատճառով, թե ահաբեկչության կամ այլ պատճառներով: Եթե երկրորդ տարբերակը հաստատվի, ապա զանգերն ու տոմսերի հետ վերադարձն ավելի զանգվածային կդառնա»,- ասաց տուրիստական գործակալություններից մեկի մենեջեր Աննա Մարգարյանը՝ հավելելով, որ շատ հաճախ զբո սաշրջիկները զանգահարում են, որպեսզի տուրիստական գործակալությունից հավաստիանան, որ մեկնելով Եգիպտոս՝ չեն վտանգի իրենց կյանքը: «Մենք, բնականաբար, նրանց ներկայացնում ենք իրավիճակը: Մենք էլ մշտական կապի մեջ ենք Եգիպտոսում աշխատող մեր գործընկերների հետ եւ նրանք էլ փաստում են, որ այնտեղ հանգստացողների մոտ էլ կա լուրջ տագնապ, որը բնական է»,- ասաց Մարգարյանը:

Տուրիստական մեկ այլ գործակալության տնօրեն Նաիրա Հովհաննիսյանն էլ փաստում է, որ վերջին 3 օրվա ընթացքում ստացել է բազմաթիվ զանգեր Եգիպտոսի հետ կապված: «Եգիպտոս մեկնող մեկ զույգ եկավ եւ ճշտեց, թե արդյոք կարող է փոխել տոմսը եւ այլ ուղղություն ընտրել: Մենք նրանց ներկայացրեցինք պայմանները, եւ զույգը ժամանակ խնդրեց մտածելու համար: Տոմսերի հետ կապված այլ վերադարձ դեռ չի եղել, սակայն եթե հաստատվի, որ ինքնաթիռը կործանել են ահաբեկիչները, ապա, բնականաբար, սպասում ենք տոմսերի վերադարձի մեծ հոսքի»,- ասաց Հովհաննիսյանը:

Տուրիստական գործակալությունների մենեջերները փաստում են, որ Եգիպտոսը հայ զբոսաշրջիկների ամենասիրելի ուղղություններից մեկն է, եւ շատերը ցանկանում են իրենց Ամանորն ու Սուրբ ծնունդն անցկացնել բուրգերի երկրում: Հաշվի առնելով զբոսաշրջիկների մեծ հոսքը` այս տարի ավելի քան մեկ տասնյակ տուրիստական գործակալություններ հայտարարել են, որ դեկտեմբերի վերջին չարթերային թռիչքներ են բացելու դեպի Շարմ Էլ Շեյխ: Տուրիստական գործակալները շեշտում են, որ այդ ժամանակ պատկերն ավելի ցայտուն կլինի, քանի որ ինքնաթիռի կործանման վերաբերյալ մանրամասներ ն էլ ավելի հստակ կդառնան եւ պարզ կդառնա՝ որքանով կշարունակի Եգիպտոսը մնալ գրավիչ հայ զբոսաշրջիկների համար:

Համաձայն տուրիստական գործակալությունների ներկայացրած տվյալների, տարիներ շարունակ Եգիպտոսը հայերի նախընտրելի ուղղությունների եռյակում է: Թե՛ ձմռանը, թե՛ ամռանը հայերը նախընտրում են Շարմ էլ Շեյխ եւ Հուրգադա զբոսաշրջային վայրերը: Գործակալություններում դա բացատրում են այն հանգամանքով, որ Եգիպտոսը մատչելի ուղղություն է եւ ունի լիարժեք հանգստի համար բոլոր անհրաժեշտ պայմանները: Կարեւոր հանգամանք է նաեւ վիզային ռեժիմի բացակայությունը: Զբոսաշրջային կենտրոններ այցելության համար վիզա անհրաժեշտ չէ, իսկ մայրաքաղաք Կահիրե այցելության համար անհրաժեշտ է վճարել 25 դոլար եւ վիզան ստանալ հենց օդանավակայանում: «Հաճախ զբոսաշրջիկները կարեւորում են նաեւ այն, որ չպետք է դեսպանատուն դիմեն եւ բյուրոկրատական քաշքշուկների մեջ ընկնեն»,-ասացին գործակալությունում:

Շարմ էլ Շեյխ-Սանկտ Պետերբուրգ թռիչքն իրականացնող Airbus-321 ինքնաթիռը հոկտեմբերի 31-ի առավոտյան կորել է ռադարների էկրանից: Ինքնաթիռի տախտակամածին եղել է 217 ուղևոր (22-ը երեխա են) և անձնակազմի 7 անդամ: «Կոգալիմավիա» ավիաընկերությանը պատկանող ինքնաթիռն անհետացել էր թռիչքից 23 րոպե անց: Բոլոր ուղեւորները զոհվել են: Այժմ ինքնաթիռի սեւ արկղերի վերծանումն է ընթանում, ինչն էլ կհստակեցնի ինքնաթիռի կործանման պատճառը:

ԻԼԻՊ ահաբեկչական խմբավորման գրոհայինները հուլիսի սկզբից մոտեցել են Եգիպտոսի ափերին, ինչը մեծ անհանգստություն է առաջացրել ամբողջ աշխարհում: ՀՀ արտաքին գործերի նախարարությունից տարածվել էր հաղորդագրություն, որտեղ կոչ էր արվում Եգիպտոսում գտնվող և իրենց հանգիստը ծրագրող քաղաքացիներին մնալ բացառապես հանգստի համար նախատեսված գոտիներում: Համաձայն ռուսական եւ արեւմտյան լրատվամիջոցների, այս ժամանակահատվածից սկսած` հետո բազմաթիվ զբոսաշրջիկներ հրաժարվում են Եգիպտոսում հանգստից: