Մեկ ամսվա ընթացքում գործն առաջ չի գնացել. «Փաստ»

«Փաստ» օրաթերթը գրում է.

Երգիչ, երգահան Վահան Արծրունին մեկ ամիս առաջ մշակույթի նախարար Լիլիթ Մակունցին Հայաստանի Հանրապետության 27–րդ տարեդարձին նվիրված համերգային ծրագրի նախագիծ է ներկայացրել: Սեպտեմբերի 21–ին նախատեսվող համերգային ծրագրի նպատակն է ներկայացնել հայ երաժշտության պատմական ավանդույթները` հոգևոր և աշխարհիկ ոլորտները, ժամանակակից երաժշտության բազմերանգությունը:

Վահան Արծրունին իր էջում փաստել էր, որ մեկ ամիս անց նախագիծն անպատասխան է:

«Փաստ»–ի հետ զրույցում նա նշեց, որ նախատեսվող համերգային ծրագրին բացի իրենից մասնակցելու են նաև Հայաստանի պետական սիմֆոնիկ նվագախումբը, «Շողակաթ» մանկական երգչախումբը, կան հրավիրյալ մենակատարներ և այլ երգչախմբեր:

«Առանձնահատկությունը հետևյալն է. ի տարբերություն նախորդ տարիների, երբ տոնը նշելու համար հաճախ դրսից էին երաժիշտներ հրավիրվում, այս ծրագրով օգտագործված է բացառապես Հայաստանում առկա ստեղծագործական պաշարը: Երկրորդ կարևոր հանգամանքն այն է, որ մի քանի սերնդի երաժիշտներ են ներկայանալու: Լինելու են 5–րդ դարի մշակումներից մինչև ամենաժամանակակից սիմֆո–ռոքային լուծումներ ունեցող ստեղծագործություններ»,– ասաց Վահան Արծրունին:

Վահան Արծրունին ընդգծեց, որ նախարարության ներկայացուցչի հետ զրույցից տեղեկացել է, որ շատ հավանական է` ծրագրի շուրջ գործընթացը ևս մեկ ամսվա քննարկում ենթադրի. «Իմ գրառմամբ փաստում եմ այն հանգամանքը, որ մեկ ամսվա ընթացքում գործն առաջ չի գնացել: Քանի որ իմ առաջին առնչությունն է նախարարության հետ, չգիտեմ, ընթացակարգերն արդյոք ենթադրո՞ւմ են նման ժամկետներ, բայց ես արդեն տարակուսում եմ: Այն պարագայում, երբ ծրագիրն ամբողջությամբ պատրաստ է, մշակույթի նախարարությունն ընդամենը պետք է որոշում ընդունի` այո կամ ոչ»:

Վահան Արծրունին նշեց, որ մեկ ամիս անց էլ կանդրադառնա հարցին:

«Բայց, կարծում եմ, մեկ ամիս անց արդեն ուշ կլինի, որովհետև համերգային ծրագրի կազմակերպումը ծավալուն աշխատանք է ենթադրում: Պետք է նաև ժամանակ, որոշակի փորձաշրջան, նախապատրաստական աշխատանքներ: Ես այդ ամենը հաշվի առնելով եմ ծրագիրը հունիս ամսին ներկայացրել, որ մինչև սեպտեմբերի 21–ը հնարավոր լինի այդ աշխատանքներն իրականացնել»,– ասաց նա:

Հարցի շուրջ փորձեցինք ստանալ նաև մշակույթի նախարարության մեկնաբանությունը:

Նախարարի խոսնակ Անի Սմբատյանը մեզ հետ զրույցում հայտնեց. «Նախարարությունում ծրագիրը քննարկման փուլում է: Նշեմ նաև, որ մշակույթի փոխնախարար Նազենի Ղարիբյանը ծրագիրը կքննարկի նաև Վահան Արծրունու հետ: Այդ ժամանակ նոր կարող ենք մանրամասներ ներկայացնել»:

Շարունակությունը՝ «Փաստ» օրաթերթի այսօրվա համարում