Հայկ Մարությանի թեկնածության առաջադրումը ՔՊ-ում որևէ հակասության կամ պառակտման առիթ չի կարող դառնալ. Հովիկ Աղազարյան

«Ելք» խմբակցության պատգամավոր, «Քաղաքացիական պայմանագիր» կուսակցության անդամ Հովիկ Աղազարյանը Tert.am-ի հետ զրույցում պնդեց, որ Երևանի ավագանու ցուցակը գլխավորող Հայկ Մարությանի թեկնածության առաջադրումը կուսակցությունում որևէ հակասության կամ պառակտման առիթ չի կարող դառնալ:

«Մեր քննարկումների ընթացքը բացառում է նմանատիպ իրավիճակ, որովհետև երբ դու մասնակցում ես ինչ-որ հարցի քննարկմանը, ունես քո սեփական կարծիքը և արտահատում ես այն, լսելի ես լինում քո շրջապատի կողմից, դու չպետք է հավակնես, որ ամենաճիշտն ես, դու պետք է մտածես, որ ուրեմն քո տեսակետը ճիշտ չէ, եթե այն գերիշխող չէ: Դա չի նշանակում, որ դա պետք է պառակտման պատճառ հանդիսանա, ուրեմն մեծամասնությունն այնպիսի որոշում է կայացում, որն ընդունելի է, և մյուսներն էլ ենթարկվում են այդ որոշմանը»,-ասաց նա:

Նշենք, որ հուլիսի 29-ին հայտնի դարձավ, որ «Քա­ղաքացիական պայմանագիր» կուսակ­ցության՝ Երևանի քաղաքապետի թեկնածուն դերա­սան Հայկ Մարությանն է: Հիմնական պայքարն ընթանում էր Հայկ Մարությանի և ԱԺ «Ելք» խմբակցության պատ­գամավոր Ալեն Սիմոնյանի միջև:

Ըստ Աղազարյանի՝ բացասական արձագանքներ կարող են լինել ցանկացած որոշման դեպքում, և հենց ներկուսակցական մրցակցությունն «ապացուցում է, որ կուսակցությունում տիրում է առողջ պայքարի մոտեցումը»:

Իսկ թե ընդհանուր առմամբ ինչպե՞ս է գնահատում իր կուսակցության հաղթանակի և, մասնավորապես, Հայկ Մարությանի շանսերը, հատկապես որ չառաջադրված հավակնորդ թեկնածու Ալեն Սիմոնյանը նշել էր, որ ՔՊ-ի համար շատ բարդ է լինելու Երևանի ավագանու ընտրություններին հաղթելը, Հովիկ Աղազարյանը նշեց, թե ինքն այդ կարծիքին չէ:

«Ես չեմ կարծում, որ դժվար է լինելու, և դա այդքան պայմանավորված չէ մեր կուսակցության ռեյտինգով, որովհետև ՔՊ անվանումը ժողովրդի լայն շրջանակների մոտ շատ բան չի ասում: Մենք ավելի շատ հայտնի ենք որպես «Ելք» դաշինք, բայց հաշվի առնելով այն հանգամանքը, որ վարչապետը համաժողովրդական լեգիտիմություն է վայելում և համընդհանուր համակրանք, հանդիսանում է մեր կուսակցության վարչության անդամ և փաստացի առաջնորդ, այդ հանգամանքը հանգեցնում է նրան, որ մեր շանսերը վատ չեն, դժվար կլինի, բայց վատ չէ»,-ասաց նա:

Իսկ թե Հայկ Մարությանի անձին ինչպե՞ս է վերաբերվում, նրա գործոնը կուսակցության շանսերը ավելացնում է, թե՞ ընդհակառակը՝ հասարակությունը պատրաստ չէ տեսնել նրան որպես քաղաքապետ, Հովիկ Աղազարյանն ասաց, որ ինքը երկու Հայկ Մարության է ճանաչում: 

«Մեկը՝ արվեստի գործիչ, դերասան, մյուսը՝ քաղաքացի, հասարակական գործիչ, հասարակական կերպար, երկուսն էլ ինձ համար շատ մեծ արժեքներ են անկեղծ ասած: Ես իրեն՝ որպես կինոգործիչ, դերասան, համարում եմ բնագավառի լավագույն ներկայացուցիչներից մեկը, և որպես քաղաքացի՝ վերջին տարիներին գրեթե բոլոր լուրջ հասարակական միջոցառումների ժամանակ ինքը միշտ ունեցել է իր դիրքորոշումը, իր քաղաքացիական կեցվածքը: Հիմա ինչ վերաբերում է նրան, թե ինչպես կհաջողվի քաղաքապետի պաշտոնում նրան դրսևորվել, պետք է մտածենք, որ նման մարդը նման հաջողությամբ կարող է նաև դրսևորվել  քաղաքապետի պաշտոնում»,-ասաց նա:

Իսկ այն, որ սոցցանցերում թերահավատորեն են վերաբերում նրան որպես քաղաքապետ, ասաց, որ սոցցանցերում էլ կարծիքները միանշանակ բացասական չեն, կան նաև, որ ոգևորությամբ են ընդունում առաջադրումը:

Հովիկ Աղազարյանը նշեց, որ իրենք պատրաստում են նախընտրական ցուցակները, և էական տոկոս վերցնելու են ոչ կուսակցականներից՝ հասարակության մեջ հայտնի անձինք կլինեն, ովքեր ըստ նրա, հետևողական կեցվածք ունեն:

«Ելք» խմբակցության պատգամավորը վստահ է, որ սպասվում է թեժ ընտրապայքար. «Թեժ է լինելու, և դա պայմանավորված է 2 պատճառով. մեկն այն է, որ համոզված ենք, որ նորագույն պատմության մեջ, չհաշված 1991 թվականը, լինելու են ամենամաքուր և արդար ընտրությունները։ Նաև հաջորդ պատճառը, որ սա լինելու է ստուգիչ փուլ ընտրություններից առաջ, երբ կուսակցությունները պետք է ցույց տան իրենց մկանները, ուժը այդ պատասխանատու միջոցառումից առաջ»,-ասաց նա: