Կանգնած ենք նույն տեղում, ոչինչ չի փոխվել. «Փաստ»

«Փաստ» օրաթերթը գրում է.

Կառավարության երեկվա նիստում հավանություն տրվեց «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքի նախագծին։ Ըստ նախագծի՝ ոռոգման նպատակով լճից 2018թ. բացթողման 170 մլն մետր խորանարդ չափաքանակը կփոխվի: Նախատեսվում է այն դարձնել մինչև 210 մլն մետր խորանարդ: Այս ֆոնին հատկանշական է հիշել ՀՀ վարչապետ Նիկոլ Փաշինյանի` ավելի վաղ արված հայտարարությունը:

«Սևանա լճի այսօրվա իրավիճակը մեզ ստիպում է արձանագրել, որ պետք է դադարենք Սևանին վերաբերվել որպես խաղալիք կամ ջրի տարայի»,– ասել էր վարչապետը:

Նախագծին հավանություն տալուց հետո հայտարարվեց «SOS Սևան» ակցիայի մեկնարկի մասին, որի նպատակը նախագծի ընդունումը կանխելն է: ԱԺ արտահերթ նստաշջանին ընդառաջ կմեկնարկեն նախաձեռնության ակցիաները: Նախաձեռնության անդամ, բնապահպան Սիլվա Ադամյանը «Փաստ» օրաթերթի հետ զրույցում հայտնեց, որ խումբը կհավաքվի` հասկանալու հետագա քայլերը: Իսկ մինչ այդ` նախ խոստովանեց, որ իրեն շատ էր գոհացրել վարչապետի ելույթն այն մասին, թե Սևանին պետք չէ որպես ջրի տարա վերաբերվել:

«Ուրախացա, ելույթ ունեցա, ասացի` շատ շնորհակալ ենք, առաջին անգամ վերաբերմունք եղավ, պարզվեց` սխալվել ենք: Պարզվեց, որ կրկին շիլաշփոթ է այնտեղ. նախկինում նշանակվածների ամբիցիաները լավ գիտենք, իսկ շրջապատող նորանշանակների գիտելիքներն այն աստիճանի չեն, որ կարողանան այդ խնդիրները լուծել: Հարցը կտրուկ դրվեց, կառավարությունն էլ` հաստատեց: Ասացին` ցավում ենք, ցավոք սրտի: Բայց, կներեք, բառերով պետք չէ ցավել, պետք է լուրջ քայլեր արվեն: Մենք նախորդ կառավարության հետ անընդհատ կռիվների մեջ էինք, և ոչ մի շոշափելի արդյունք այդպես էլ չտեսանք նրանցից: Սևանն առողջացնելու համար ոչինչ չարվեց: Մենք խոսել ենք առանձին մասնագետների հետ, իրենք ասում են, որ Սևանից մի կաթիլ ջուր անգամ չի կարելի բաց թողնել: Առնվազն 5 տարի լիճը պետք է հանգիստ թողնել, որ այն իր ամբողջ էկոլոգիայով վերականգնվի: Տարբեր առաջարկներ, գիտական հիմնավորումներ են հնչել, բայց տեսնում ենք, որ ինչպես նախորդը, այսօրվա կառավարությունն էլ է մտածում, որ ամենահեշտ ճանապարհը Սևանն է»,–նշեց բնապահպանը:

Բնապահպանն ընդունում է` ջրի խնդիր իսկապես կա, բայց, ըստ նրա, հարցն այլ տիրույթում է:

«Ջրպետկոմի նախկին նախագահը, բնապահպանության նախկին նախարարը հանցավոր գործունեություն ծավալեցին և ամբողջ Արարատյան դաշտին զրկեցին ջրից: Դա այն դեպքում, երբ ասում էինք, որ պետք է հաշվարկ անել, ռիսկերը գնահատել: Հասկանում ենք` Արարատյան հարթավայրում իսկապես շատ վատ է վիճակը: Ես ընդունում եմ դա, բայց գիտնականներն այլընտրանքային ճանապարհներ են առաջարկում. ասում են` ջրամբարներ կառուցեք, ջուրը գետերից վերցրեք և այլն: Տարբեր առաջարկներ կան, թե որտեղից կարելի է ջուր վերցնել և օգտագործել, բայց ամենակարևորն այն է, որ ջուրը պետք է ըստ պահանջի օգտագործվի: Այն պետք է տեղ հասնի, իսկ այդ ջուրը տեղ չի հասնում` ճանապարհին կորչում է: Բավական չէ՝ մենք Սևանին վնաս ենք հասցնում, դրա հետ մեկտեղ էլ չենք կարողանում գյուղացուն օգնել: Կարելի՞ է այդ լոգիկայով շարժվել, չէ՞ որ սա պետություն է: Կան մարմիններ, որոնք պետք է ղեկավարեն այդ գործընթացները, իրենք ինչո՞վ են զբաղված, ինչո՞ւ պետք է այս հարցն այսքան բարձրանա ու լուծում չստանա»:

Սիլվա Ադամյանի խոսքով` պետական կառույցներում չկան մարդիկ, ովքեր փորձ ունեն, ովքեր նշված խնդրի առնչությամբ համապատասխան կրթություն ունեն և կարող են առաջարկներ անել:

«Մեծ հաշվով` մենք կանգնած ենք նույն տեղում, առաջ չենք շարժվել: Ըստ իս` ոչինչ չի փոխվել: Ես չեմ տեսնում որևէ առաջընթաց: Այն, ինչ կատարվել է, նորից է կատարվում: Չենք ասում, որ պարոն Փաշինյանը եկավ, բոլորս պետք է լավ ապրենք: Հասկանում ենք, որ դրան քայլ առ քայլ պետք է հասնել: Հեղափոխության լոզունգն էլ էր քայլ անելու մասին, բայց այդ քայլերն էլ չեն արվում: Մի քայլ արեք` հասկանանք, որ դուք աշխատում եք ի նպաստ բնության, ի նպաստ երկրի առաջընթացի: Մի գրառում տեսա` գրել էին, որ հիմա ցույց անեք, կասեն հակահեղափոխական եք: Ինձ համար միևնույն է, թե այնտեղ ով է նստած: Եթե ինքը քայլեր չի անում, ես գրելու եմ, բողոքելու եմ և ընդվզելու»,–ընդգծեց մեր զրուցակիցը: