Չէի ասի, որ մարդկանց ուզածն առանցքային փոփոխություններն են, կամ էլ մեր բնակիչները հուսահատվել են իրենց սպասելիքների մեջ. ԱՀ ԱԺ պատգամավորի թեկնածու

POLITICS 25 August, 2018 20:08

Սեպտեմբերի 9-ին Արցախի թիվ 10 և 11 ընտրատարածքներում տեղի են ունենալու Ազգային ժողովի մեծամասնական ընտրակարգով պատգամավորների լրացուցիչ ընտրություններ: Tert.am-ը զրուցել է Արցախի ժողովրդավարական կուսակցության կենտրոնական գրասենյակի ղեկավար, ինքնառաջադրված պատգամավորի թեկնածու Գեղամ Ստեփանյանի հետ, ով առաջադրվել է թիվ 11 ընտրատարածքում, որը ներառում է Ասկերանի, Մարտակերտի, Շահումյանի շրջանները:

-Օգոստոսի 7-ից մեկնարկել է քարոզարշավը, բնակիչներին ի՞նչ ծրագիր եք ներկայացրել, արդյոք հաշվի առե՞լ եք այն, որ Արցախի բնակչությունը ցանկանում է տեսնել առանցքային փոփոխություններ և այդ իսկ պատճառով իրականացնում էին ակցիաներ, ինչի արդյունքում մի շարք պաշտոնյաներ հրաժարական տվեցին:

- Կարծում եմ՝ կարիք կա հստակեցնելու, որ խոսքն Արցախի Հանրապետության Ազգային ժողովի պատգամավորական թափուր մանդատի համար նշանակված լրացուցիչ ընտրությունների մասին է, որոնց արդյունքում գործող խորհրդարանը կհամալրվի երեք նոր պատգամավորներով՝ թիվ 11, 10 և 2 մեծամասնական ընտրատարածքներից:

Ես առաջադրվել եմ թիվ 11 ընտրատարածքում, որը ներառում է մեր հանրապետության երեք շրջաններ. Ասկերանի ու Մարտակերտի շրջանները՝ մասնակիորեն, իսկ Շահումյանի շրջանն՝ ամբողջությամբ: Ուզում եմ, անպայման, շեշտել, որ հանրային ու քաղաքական շրջանակների կողմից այս ընտրությունների հանդեպ շատ մեծ հետաքրքրություն կա, և այդ մասին է խոսում այն փաստը, որ ի սկզբանե երկու ընտրատարածքներում՝ թիվ 11 և 10, առաջադրվել էր 21 թեկնածու:

Մինչ այս պահը, կարող եմ հավաստել, որ նախընտրական արշավն անցնում է հանգիստ ու հավասար մրցակցային պայմաններում, թեկուզ պիտի նշեմ, որ թեկնածուների մի մասը, կարծես թե, խուսափում է հրապարակային հանդիպումներից, գոնե ես նման տպավորություն ունեմ:

Ինչ վերաբերում է իմ նախընտրական ծրագրին, ապա ընտրել եմ «Հին խնդիրներին՝ նոր մոտեցում» կարգախոսը, որով փորձել եմ հիմնական ազդակը փոխանցել իմ հայրենակիցներին՝ այն է, որ հոգսերի ու խնդիրների մեծ մասը վաղուց մեզ հայտնի են, բայց մենք դրանց պետք է վերաբերվենք նորովի՝ ձգտելով դրանց լուծմանը մասնակից դարձնել հենց իրենց՝ մեր համաքաղաքացիներին:

Բազմաթիվ ուղղություններ ու կետեր են ներառված նախընտրական ծրագրում, սակայն եթե խմբավորենք դրանք, կստացվեն մի քանի գլխավոր թեմաներ. բարեկեցություն, անվտանգություն և ժողովրդավարություն: Իմ նախընտրական արշավին մեծ աջակցություն են ցույց տալիս Արցախի ժողովրդավարական կուսակցությունը և տարբեր հասարակական ու քաղաքական խմբեր:

Հանդիպումների ժամանակ մարդիկ ազատ են իրենց տեսակետներն արտահայտելու հարցում, որևէ կաշկանդվածություն չկա, նրանք կարողանում են իրենց ցանկությունները փոխանցել թեկնածուներին և ուզում են տեսնել կոնկրետ արդյունքներ: Ես չէի ասի, որ մարդկանց ուզածն առանցքային փոփոխություններն են կամ էլ մեր բնակիչները հուսահատվել են իրենց սպասելիքների մեջ: Արցախում մարդիկ շատ ավելի զգայուն են ներքին իրավիճակի, սահմանին տիրող կացության, սոցիալական արդարության հանդեպ, և դա շատ բնական է: Մենք անասելի դժվարություններ ենք հաղթահարել՝ պահելով հավասարության սկզբունքը, և այսօր էլ մեր առաջընթացի հիմնական պայմանը բարեկեցիկ հանրությունն է, ոչ թե՝ առանձին անհատը:

-Արցախում ապրիլյան պատերազմից հետո խոսվում էր անվտանգության գոտու ամրապնդման մասին, ի՞նչ է արվել:

-Ապրիլյան պատերազմից հետո հայկական զինված ուժերի կողմից ձեռնարկվել են լայնածավալ աշխատանքներ դիրքերի ամրապնդման, զինման և կահավորման ուղղությամբ: Իմ ներկայիս կարգավիճակում ես չեմ տիրապետում և չեմ կարող ամբողջական ծավալով և խորությամբ ներկայացնել կատարված աշխատանքները, բայց, որպես քաղաքացի, կարող եմ փաստել, որ իրականացված ինժեներական աշխատանքների, սահմանին հակառակորդի տեղաշարժը վերահսկելու և անհրաժեշտության դեպքում նախահարձակ գործողությունները կանխելու նպատակով ներդրված տեխնիկական միջոցներն, անշուշտ, բարձրացրել են Արցախի ազգաբնակչության անվտանգության աստիճանը: Սակայն պետք է հիշել, որ գործ ունենք մի հակառակորդի հետ, ով ամեն առիթ օգտագործում է հայտարարելու պատերազմական գործողություններ սկսելու մասին, ուստի մեր կողմից ձեռնարկվող աշխատանքները պետք է լինեն անընդհատ ու հետևողական: