«Չարությունը բումերանգ է, որը դեպի իրենց է վերադառնալու». «Փաստ»

INTERVIEW 30 August, 2018 7:12

«Փաստ» օրաթերթը գրում է.

Երևանի քաղաքապետի ԲՀԿ թեկնածու Նաիրա Զոհրաբյանի ներկայացմամբ, ավագանու ընտրությանը կուսակցության կողմից ներկայացված համամասնական ցուցակում բավականին լուրջ պրոֆեսիոնալներ են ներգրավված: Չնայած ընտրությունն ինքնին քաղաքական է, սակայն կուսակցությունն այլ սկզբունքով է ցուցակը կազմել և այս անգամ կուսակցականության հարցը առաջնյին դեր չի խաղացել: Պրոֆեսիոնալիզմից բացի, երկրորդ ամենակարևոր գրավականը, ինչին ուշադրություն են դարձրել ցուցակը կազմելիս, Երևանի հանդեպ ունեցած սիրո զգացումն է եղել:

«Ես Երևանի ֆանատն եմ, և մեր ցուցակում ներգրավված բոլոր անձինք նման կերպ են վերաբերվում Երևանին»,– ասաց Ն. Զոհրաբյանը:

Նա նաև նշեց, որ առաջին քսանյակը՝ մեկ– երկու բացառություններով, տարբեր ոլորտների պրոֆեսիոնալներ են, որոնցից յուրաքանչյուրը հստակ պատկերացնում է իր անելիքը Երևանի ավագանիում, գիտի Երևանի խնդիրները, ունի դրանք համակարգային լուծելու տեսլականը:

«Նախընտրական ծրագիրն ավարտված է և արդեն հանձնված է տպարան: Հիմա աշխատում ենք քարոզչական մոդելի մշակման՝ նյութերի և ճանապարհային քարտեզի վրա, թե յուրաքանչյուր օրվա ընթացքում ինչպես պետք է մեզ մոտ կուտակված կարևոր տեղեկատվությունը և դրանց լուծման ճանապարհները ճիշտ և օպերատիվ կերպով հասցնենք երևանցիներին»,– ասաց Ն. Զոհրաբյանը:

Խոսելով իր անցած քաղաքական ուղու մասին՝ նա նշեց, որ միշտ էլ կանգնած է եղել Երևանի ու երևանցու կողքին և, ինչքանով որ ժամանակը ներել է, փորձել է դրանց լուծումներին աջակցել: Միևնույն ժամանակ փայլուն կերպով իրականացրել է այն պարտավորությունները, որոնք, որպես ԱԺ պատգամավոր և մշտական հանձնաժողովի նախագահ, պարտավոր է եղել իրականացնել:

«Եթե ես իմ պարտավորությունները Եվրոպայի խորհրդում կամ այստեղ թողնեի և միայն զբաղվեի Երևանի խնդիրներով, ապա այդ ժամանակ էլ իմ մասին չարախոսողներն ասելու էին, որ պատգամավորի իր գործունեությունը թողած՝ Զոհրաբյանը զբաղված է աղբահանության, փողոցների լուսավորության և այլ խնդիրներով: Այնպես որ, բոլորին կոչ եմ անում լինել լավատես, բարի, քանի որ չարությունը բումերանգ է, որը հետ դեպի իրենց է վերադառնալու: Երևանը սիրո և բարության քաղաք է: Եկեք միասին լուծենք կուտակված խնդիրները: Կոչ եմ անում քաղաքապետի բոլոր թեկնածուներին քարոզարշավի վերջին օրը՝ սեպտեմբերի 21–ին՝ Անկախության օրը, բոլորս միասնական ուղերձով դիմենք երևանցիներին, որպեսզի երևանցին տեսնի, որ հեղափոխությունից հետո մեզանում նաև քարոզարշավի անցկացման և քաղաքական կուսակցությունների միջև հարաբերությունների մթնոլորտն է անգամ փոխվել, ինչը շատ կարևոր է»,– ասաց Երևանի քաղաքապետի թեկնածուն:

«Փաստ»–ի հետ զրույցում անդրադառնալով օրերս իր հարցազրույցներից մեկում իր դեմ դավեր նյութած տղամարդկանց ողորմելի անվանելու մասին, նա նշեց, որ այս պահին նպատակահարմար չէ փակագծեր բացել, բայց նշեց, թե որոշ խմբագրություններում մարդիկ իր դեմ սև PR–ի հսկայածավալ փաթեթ կազմելով են զբաղված:

«Նորից եմ կրկնում, նրանք ինձ համար ծիծաղելի և ողորմելի են: Նրանք չեն էլ պատկերացնում, թե ինչքան ճղճիմ են, ես նրանց արհամարհում եմ և ծիծաղում եմ նրանց արածների վրա: Եվ անկախ այն բանից, թե իրենց ու իրենց հետևում կանգնած հովանավորներն ինչքան հսկայական գումարներ կծախսեն քարոզարշավի ընթացքում իմ դեմ հակաքարոզչություն իրականացնելու համար, միևնույն է, մինչ օրս մեկ բան չեն կարողացել հասկանալ, որ այսօր շատ բան է փոխվել և ցանկացած այլանդակ հակաքարոզչություն ուղղակի հակառակ ազդեցությունն է ունենալու: Սա թող հիշեն բոլորը և լրատվական կայքերից մեկի խմբագրությունում այդքան լուրջ չաշխատեն իմ դեմ ինչ–որ հակաքարոզչության այդ փաթեթի վրա: Նման տղամարդիկ ինձ համար ծիծաղելի են, եթե, իհարկե, նման տղամարդկանց ընդհանրապես կարելի է տղամարդ անվանել»,– ասաց Ն. Զոհրաբյանը:

Երևանի քաղաքապետի ԲՀԿ թեկնածուն նշեց նաև, որ չնայած ինչ–որ մի պաշտոնյա անկեղծացել է, թե սպասում են հրահանգի, բայց այլևս չի ուզում հավատալ, որ ընտրությունները հետայսու կարող են վերևից հրահանգներով կամ վարչական ռեսուրսի կիրառմամբ անցկացվել:

«Պարզվում է՝ տարբեր կառույցների ղեկավարների մեջ նստած է ստրուկը, և այդ մարդիկ չեն կարողանում ազատվել ներքին ստրկությունից, քանի որ ամբողջ կյանքում աշխատել են հրահանգներով: Մենք պետք է ազատվենք այդպիսի մարդկանցից և ես ուզում եմ հավատալ, որ այս ընտրությունների ժամանակ որևէ վարչական ճնշում չի լինելու և վերջին 20 և ավել տարիների ընթացքում առաջին անգամ մենք ազատ ընտրության ենք մասնակցելու: Արդար ընտրության արդյունքում երևանցին ում էլ որ իր քվեն տա, ես կլինեմ առաջինը, որ կշնորհավորեմ ընտրված քաղաքապետին: Ի վերջո, մեր երկրում պետք է ձևավորվի ավանդույթ, որ ընտրության բոլոր մասնակիցներն այնքան վստահ լինեն արդյունքների լեգիտիմության վրա, որ կարողանան ընտրված թեկնածուին ոչ միայն շնորհավորել, այլ ամեն կերպ աջակցել: Ես կարծում եմ, որ երևանցին նման բարձր որակական հատկանիշներ ունեցող ընտրության է արժանի և նման ընտրություններ եմ ցանկանում բոլորիս»,– ասաց Ն. Զոհրաբյանը:

Մանրամասները՝ «Փաստ» օրաթերթի այսօրվա համարում