Մայրաքաղաքի բյուջեն արդար չի բաշխվել, չեն գործել օրենքները. «Փաստ»

«Փաստ» օրաթերթը գրում է.

Շարունակվում է Երևանի ավագանու ընտրությունների քարոզարշավը: «Երկիր ծիրանի» կուսակցության ղեկավար Զարուհի Փոստանջյանն իր համախոհների և ավագանու անդամների հետ միասին այցելում է մայրաքաղաքի տարբեր վարչական շրջանների բակեր և հանդիպումներ ունենում բնակիչների հետ: Հերթական հանդիպման ժամանակ «Փաստի» լրագրողի հետ զրույցում քաղաքապետի թեկնածուն նշեց, որ փորձում են իրենց ծրագրային բոլոր դրույթները հասցնել ընտրողներին, որպեսզի երևանցիները պատկերացում կազմեն, թե կուսակցությունների ու դաշինքների կողմից ներկայացվող ո՞ր ծրագիրն է իրենց ավելի հոգեհարազատ և ինչպես նրանք պետք է կարողանան իրացնել իրենց իրավունքները: 

Զ. Փոստանջյանը նաև նշեց, որ «ԵԾ» կուսակցությունը երևանցիներին առաջարկում է ստեղծել աշխատատեղեր, հիմնել գործարաններ, բացել մետրոյի 4 նոր կայարան, որոնք նաև կբեռնաթափեն մայրաքաղաքի ծանրաբեռնված երթևեկությունը:

«Մենք առաջարկում ենք մեկ ինտեգրված համակարգ, նաև երևանյան հեռուստաալիքի հիմնում, որը միայն կներկայացնի մշակութային և կրթական ծրագրեր: Մեզ համար ամենակարևորը կրթությունն է, քանի որ եթե անգամ մեր զինվորը հաղթում է սահմանին, ապա դա նրան հաջողվում է անել մեր ուսուցիչների շնորհիվ, նրանց շնորհիվ, ովքեր նրանց գիտելիք են տվել և դաստիարակել են որպես քաղաքացի: Մեր ծրագրային դրույթներից են նաև կոմունալ վճարների չափերի և դրանց արդարացիության հարցի վերանայումը, քանի որ դրանք չափազանց բարձր են»,– ասաց Զ. Փոստանջյանը:

Կուսակցության ծրագրային կետերից է նաև սոցիալական բնակարանաշինության և սոցիալապես անապահով ընտանիքներին աջակցություն ցուցաբերելու հարցերը: Ու թեև, կուսակցության ղեկավարի խոսքով, սոցիալական աջակցության մասին Երևանի բյուջեում դրույթ կա, սակայն, քանի որ մայրաքաղաքային բյուջեն անարդար էր բաշխվում, ապա դրա հետևանքով երևանցիներից շատերը դուրս են մնում շատ ու շատ ծրագրերից:

«Մենք հենց այնպես չենք ասում՝ «արդարություն և օրենք», քանի որ ոչ միայն մայրաքաղաքի բյուջեն արդար չի բաշխվել, այլև չեն գործել օրենքները: Ի դեպ, պետք է նշեմ, որ մեր կողմից խոստացվող որոշ կարճաժամկետ ծրագրերի համար ներկայիս բյուջեն բավարար է, բայց երկարաժամկետ ծրագրեր իրականացնելու համար մենք լրացուցիչ միջոցներ ենք ներգրավելու, ինչը հնարավոր է իրականացնել մասնավորապես համագործակցելով Եվրամիության և նրա դոնոր կազմակերպությունների հետ, որի հնարավորությունը մենք ունենք»,– ասաց Զ. Փոստանջյանը:

Նա նշեց, որ այդ նպատակով պատրաստ է օգտագործել իր բոլոր կապերը, մասնավորապես Եվրամիության բարձրաստիճան պաշտոնյաների հետ, որոնք ձևավորվել են դեռևս ԱԺ պատգամավոր եղած տարիների ընթացքում: Բացի այդ, քաղաքական գործիչը, լինելով նաև փաստաբան, շատ լավ է պատկերացնում թե՛ քաղաքական և թե՛ իրավական հարցերին առնչվող խնդիրները, ինչը նաև հնարավորություն կտա ոչ միայն ներսում լիարժեք գործել, այլև դրսում՝ լրացուցիչ միջոցներ ներգրավելու, անգամ աղբի գործարան կառուցելու և այլ խնդիրներ լուծելու համար: 

«Օրինակ՝ այլընտրանքային էներգիայի աղբյուրներ հիմնելու ծրագիր ենք առաջարկում, քանի որ հիմա աշխարհում էկոլոգիական հարցերի լուծման մեծ շարժում է ձևավորվել, կան նաև գումարներ, որոնք ես անպայման կներգրավեմ նշված խնդիրները կարգավորելու համար»,– ասաց Զ. Փոստանջյանը:

Խոսելով իրենց մրցակցային հնարավորությունների մասին՝ նա նշեց, որ երևանցիները պետք է ծրագրերի, սկզբունքների և գաղափարախոսության միջև կատարեն իրենց ընտրությունը, քանի որ քաղաքականությունը այդ երեք սկզբունքներն է ամփոփում: Փոստանջյանը նաև կողմնակից է բազմազան հասարակության առկայությանը, քանի որ նրա կարծիքով, որքան շատ լինեն գույները, այնքան կշահեն բոլորը, ինչն էլ հենց հանդիսանում է ցանկացած երկրի հաջողության գրավականը: 

«Որտեղ կա ժողովրդավարություն, այնտեղ կա բազմապիսի մասնակցություն: Եվ ապագայում մենք առաջարկելու ենք, որ խորհրդարանում ներգրավված լինեն ոչ թե 5 կամ 6 % հաղթահարած ուժերը, այլ ավելի ցածր շեմ պետք է սահմանվի: Այն բավականին բարձր է, և սա նույնպես նահանջ է ժողովրդավարությունից: Ուստի հարկավոր է այնպես անել, որ բոլոր շերտերի ձայնը լսելի լինի թե՛ տեղական ինքնակառավարման մակարդակում, թե՛ խորհրդարանում», – ասաց Զ. Փոստանջյանը: