«Դուխովն» անցել է, եկել է խելքով ընտրություն անելու ժամանակը. «Փաստ»

POLITICS 18 September, 2018 8:12

«Փաստ» օրաթերթը գրում է.

ԱԺ պատգամավոր, «Ծառուկյան» խմբակցության քարտուղար Վահե Էնֆիաջյանը «Փաստ» օրաթերթի լրագրողի հետ զրույցում անդրադառնալով Երևանի ավագանու արտահերթ ընտրությունների քարոզարշավի ընթացքին՝ նշեց, որ իրենց համար շատ կարևոր է, որ մայրաքաղաքի բնակիչները բավականին մեծ հույս են կապում ԲՀԿ–ի և քաղաքապետի թեկնածու Նաիրա Զոհրաբյանի հետ: Էնֆիաջյանի համոզմամբ երևանցիները տարիներ շարունակ կուտակված հարցերի լուծումն իսկապես տեսնում են ԲՀԿ–ի շնորհիվ և հույս հայտնում, որ այս կուսակցության թեկնածուի ընտրվելու դեպքում կարճ ժամանակ անց իսկապես ունենալու ենք բոլորովին այլ մայրաքաղաք:

«Մարդիկ տարիներ շարունակ տեսել են, թե ինչքան հետևողական է Գագիկ Ծառուկյանը և իր խոստումներն ինչ հոգատարությամբ է իրականացնում: Այս անգամ ևս կրկնում ենք, որ մեր կողմից տրված խոստումը և մեր ներկայացրած ծրագիրը կարճ ժամանակահատվածում կարող ենք իրականություն դարձնել: Դրանք տրանսպորտի, քաղաքաշինական խնդիրներին վերաբերող հարցեր են և այլ խնդիրներ, որոնց լուծումները մենք ներկայացրել ենք մեր ծրագրում: Դրանք բոլորն էլ իրատեսական են և իրականանալի հենց մեր քաղաքական թիմի կողմից: Ընդ որում, Գագիկ Ծառուկյանը իր ելույթում էլ նշեց, որ մի շարք խնդիրներ կան, որոնք լուծելու համար եթե անգամ մայրաքաղաքի բյուջեն էլ չբավականացնի, նա պատրաստ է իր անձնական միջոցները ներդնել, որպեսզի մայրաքաղաքի խնդիրներն օր առաջ լուծվեն»,– ասաց Վ. Էնֆիաջյանը:

Խոսելով սոցիալական ցանցերում ԲՀԿ–ի շուրջ տարածվող մեղադրանքների մասին՝ պատգամավորը նշեց, որ այն մարդիկ, ովքեր նման ապատեղեկատվություն են տարածում և փորձում են ստվերել իրենց գործունեությունը, պետք է պատասխանատվության ենթարկվեն: Նա նաև կոչ արեց իրավապահ մարմիններին միջոցներ ձեռնարկել նման տեղեկություններ տարածողներին հայտնաբերելու համար:

Այս առիթով «Փաստը» զրուցել է նաև Երևանի ավագանու ԲՀԿ ցուցակի 4–րդ հորիզոնականը զբաղեցնող Միքայել Մանրիկյանի հետ, ով Մխիթար Հերացու անվան բժշկական համալսարանի պրոֆեսդոր է: Նա այս պահին քարոզարշավի ընթացքը շատ դրական է գնահատում, քանի որ շրջելով մայրաքաղաքի տարբեր վարչական շրջանների բակերում և թաղամասերում՝ արձանագրել է, որ ԲՀԿ–ի ներկայացուցիչներին ժողովուրդը շատ լավ է ընդունում, ինչը շատ ոգևորիչ է կուսակցության անդամների համար:

«Ժողովուրդը հույս է կապում «Բրագավաճ Հայաստան կուսակցության» հետ, և կարծում եմ, որ ամեն ինչ շատ լավ է լինելու: Դեռ մի փոքր հետհեղափոխական էյֆորիկ ֆոն կա, ինչը նորմալ երևույթ է, բայց ես կարծում եմ, որ հասարակության սթափ հատվածը հարցերին առանց էյֆորիաների է մոտենում»,– ասաց Մ. Մանրիկյանը:

Անդրադառնալով ԲՀԿ–ին գումար բաժանելու մեջ մեղադրելուն՝ նա նշեց, որ դա քաղաքական գործընկերների կողմից իրենց վրա ցեխ շպրտելու փորձ է, որով փորձում են իրենց կապել տարբեր նախկին քաղաքական գործիչների հետ, դրանով իսկ վարկաբեկում են, ինչն իր կարծիքով անընդունելի է:

«Ես բազմիցս մամուլում տեղեկություն եմ կարդացել, որտեղ մեր կուսակցությանը մեղադրում են կաշառք բաժանելու մեջ: Եվ նման տեղեկություններն արդեն մի քանի օր է, ինչ տարածվում են, սակայն եթե իրականում կա նման բան, ապա ինչո՞ւ չկան ձերբակալվածներ: Ի դեպ, այն քաղաքացիները, ովքեր սուտ մատնությամբ են զբաղվում, հիշեցնեմ, որ այդ արարքը նույնպես քրեորեն հետապնդելի է, և նրանք նույնպես պետք է պատասխանատվության ենթարկվեն, քանի որ բոլորն աշխատում են օրենքի տառին համապատասխան, ինչպես պահանջում է օրենքը: Ես հորդորում եմ առաջիկա ընտրություններին ընտրել խելքով: «Դուխովն» անցել է, եկել է խելքով ընտրություն անելու ժամանակը: Իսկ խելացի ընտրություն կատարելու համար խորհուրդ եմ տալիս երևանցիներին ուշադիր նայել բոլոր կուսակցությունների ցուցակները, վերլուծել, թե ովքեր են ներկաացված, ինչ կենսագրություն ու անցած ուղի ունեն, որ քաղաքական ուժից են եկել, ում բարեկամն են, ում խնամին են, և իրականում իրենց հետևում ինչ են թաքցնում»,– ասաց Մ. Մանրիկյանը:

Մանրամասները՝ «Փաստ» օրաթերթի այսօրվա համարում