Ազատել հարկերից՝ օգնելո՞վ մարդուն, թե՞ սպառնալ մյուսների անվտանգությանը. «Փաստ»

«Փաստ» օրաթերթը գրում է.

Վարչապետ Նիկոլ Փաշինյանը հայտարարել է, որ մոտ են տաքսու անհատ վարորդներին հարկային որևէ պարտավորություններից ազատելու որոշմանը: Ըստ այդմ, վերջիններս հնարավորություն կունենան իրենց գործունեությունը իրականացնել ավելի ազատ պայմաններում: Վարչապետը կարևորել է նաև անվտանգության հարցը՝ ընդգծելով ներկայումս առկա տեխսպասարկման ֆիկտիվ բնույթի մասին: 

Անդրադառնալով նախատեսվող որոշմանն ու ոլորտում առկա խնդիրներին՝ ՀՀ փոխադրողների միության նախագահ Հրանտ Եղիազարյանը «Փաստ»–ի հետ զրույցում նշեց, որ տաքսու անհատ վարորդներն այսօր եկամտահարկ են վճարում: «Եթե ազատում են՝ թող ազատեն, լավ է, կողջունենք, բայց մենք գլխավոր խնդրից հեռանում ենք՝ դրանով վնասում ամեն ինչ: Հիմա մենք նստում ենք տաքսի ու չենք կարողնում զանազանել՝ այն որևէ ծառայության պատկանող, թե՞ անհատ ձեռներեցի տաքսի է: Մեծ հաշվով՝ գլխավոր խնդիրն ուղևորի անվտանգությունն է, իսկ թե ավտոմեքենան տաքսու տարբերանշան կամ հաշվիչ կունենա, թե ոչ, դա դեռ ոչինչ չի նշանակում: Մեր քաղաքացին չի կարող տարբերել ու հասկանալ՝ ավելի մեծ պատասխանատվություն ունի ա՞յս, թե՞ այն վարորդը: Սա կարող է բերել վատ հետևանքների: Պետք է լուծել նախ հետևյալ խնդիրը՝ վարորդը, ով ուղևոր է տեղափոխում, ամեն օր պետք է բժշկական ստուգում անցնի, իսկ մեքենան՝ տեխզննում: Սա պատահական կամ անիմաստ գործընթաց չէ»:

Հրանտ Եղիազարյանի խոսքով՝ գործող օրենսդրական կարգավորումները, մեղմ ասած, բավարար մակարդակի չեն:

«Իրականում անհատ տաքսիներին վերաբերող գործող օրենք, որպես այդպիսին, չկա: Յուրաքանչյուր մարդ ցանկացած պահի կարող է տաքսու տարբերանշան կպցնել ավտոմեքենային, և մարդիկ, չիմանալով, թե ինչ մեքենա են նստում, գնան ու փորձանքի գան: Սա լուրջ խնդիր է»,–ասաց նա՝ չբացառելով, որ հարկերից ազատելու հանգամանքը կարող է այդ առումով վտանգավոր լինել, քանի որ շատերը կարող են գայթակղվել ու որոշել զբաղվել այդ գործունեությամբ: 

«Ի վերջո՝ մենք պետք է տարբերակենք. սա պրոֆեսիոնա՞լ, թե՞ սիրողական գործունեություն է: Կարծում եմ, որ պրոֆեսիոնալ է: Շատ են ասում՝ դե, հիմնական գործը բավարար չէ ապրուստի համար, դրա համար մի 2 ժամ տաքսի է քշում: Բայց այդպես չպետք է լինի: Բացի այդ, կարծում եմ, որ տաքսիների քանակը Երևանում պետք է լիմիտավորել: Արդյո՞ք մեզ պետք են այսքան տաքսիներ: Այդ հարցը պետք է պատասխան ստանա: Եթե պետք են՝ խնդիր չկա, կողմ եմ, ամեն ինչ նորմալ է, իսկ եթե ո՞չ»,–ասաց մեր զրուցակիցը: 

Փոխադրողների միության նախագահի խոսքով՝ երբ տաքսիները մասնակցում են այն փոխադրումներին, որոնք նախատեսված են հասարակական երթուղային տրանսպորտի համար, այդ առումով ևս խնդիր է առաջանում:

«Նույն կանգառներից իրար ճանաչող մարդիկ 200 դրամ են վճարում տաքսիներին և, օրինակ, երեք հոգով տաքսիով գնում են այնտեղ, ուր իրենց անհրաժեշտ է: Չորս մարդու մի տաքսին է տանում, 4–ին՝ մյուսը: Այսպես երթուղայինի մասնաբաժինը պակասում է: Արդյունքում մենք ունենում ենք տաքսիներ, որոնց ծառայությունն ընդամենը մի քանի տարվա կյանք ունի, որոնք խանգարում են գծային տրանսպորտին, և ունենք գծային տրանսպորտ, որը մեռնում է»,–նշեց նա՝ նկատելով, որ այդ իրավիճակից դուրս գալու ճանապարհները շատ են:

«Չեմ կարծում, որ հարկերից ազատելու որոշումը լավ բանի կբերի: Թվում է, թե հարկերից ազատելով՝ օգնում ենք այդ մարդուն, որ կարողանա իր օրվա հացի խնդիրը լուծել: Բայց կա մյուս կողմը՝ վտանգավորության խնդիրը: Իրականում այս հարցը շատ խորքային է ու շատ լուրջ: Օրենսդրական կարգավորում է պետք, հակառակ դեպքում մենք ցավալի երևույթների կարող ենք հանդիպել»,–եզրափակեց Հ. Եղիազարյանը: