ԱԺ դռները բացելը ականջահաճո հայտարարություն է. այնպես չէ, որ Ն. Փաշինյանը բաց աշխատանքի կողմնակից է, մենք` փակ. Է. Շարմազանով

Ազգային ժողովի դռները բացելու հարցում սկզբունքորեն խնդիր չեմ տեսնում, բայց կան անվտանգության, աշխատանքի արդյունավետության խնդիրներ: Այս մասին Tert.am-ի հետ զրույցում ասաց ՀՀ ԱԺ փոխնախագահ Էդուարդ Շարմազանովը՝ անդրադառնալով Նիկոլ Փաշինյանի հայտարարությանը, որ Բաղրամյան 26-ի օրինակով բացվելու են Ազգային ժողովի դռները։ 

«Նիկոլ Փաշինյանի առաջինը չէ, որ հայտարարում է Ազգային ժողովի դռները բացելու մասին, նման առաջարկներ վաղուց հնչել են, քննարկումներ եղել են: Նույնիսկ հեռուստահաղորդումներից մեկում կարծիք եմ արտահայտել, որ ուշ թե շուտ ԱԺ դռները բացվեն, պարզապես այնտեղ կազմակերպչական քննարկման հարցեր կան: Առհասարակ, իմ և աշխատասենյակի դռները, և բնակարանի, և սրտի, և հոգու միշտ բաց են եղել: Ես իմ ժողովրդից թաքցնելու բան չունեմ: Բաց քննարկումներին և հարաբերություններին մենք միշտ կողմնակից ենք, բայց պետք է հաշվի առնվեն բազմաթիվ ընթացակարգային և կազմակերպչական հարցեր»,- նշեց Է. Շարմազանովը:

Միևնույն ժամանակ, ԱԺ փոխնախագահը նկատեց, որ խորհրդարանի դռները փակ չեն եղել հասարակության համար: Նրա խոսքով՝ պարբերաբար բաց դռների օր է հայտարարվում և այսօր էլ դպրոցականները, ուսանողները գալիս են նիստերին: 

«Պարոն Փաշինյանը շատ լավ գիտի սա, երկար տարիներ պատգամավոր է աշխատել: Այնպես չէ, որ ինքը բաց աշխատանքի կողմնակից է, մենք՝ փակ: Մենք դռները չենք փակել, որ ժողովրդից թաքնվենք: Դա զուտ անվտանգության խնդիր է, աշխատանքի արդյունավետության խնդիր է: Բազմաթիվ կազմակերպչական խնդիրներ կան, որոնցով պետք է զբաղվեն հատուկ ծառայությունները, մասնագետները»,- ասաց նա: 

Հիշեցնենք, որ սեպտեմբերի 21-ին անկախության 27 ամյակի կապակցությամբ վարչապետի նստավայրում կազմակերպված տոնական միջոցառման ժամանակ ՀՀ վարչապետ Նիկոլ Փաշինյանը հայտարարեց, որ Բաղրամյան 26 հասցեում նախկին նախագահական նստավայրի դարպասները բացվելու են և տարածքը դառնալու է զբոսավայր ՀՀ քաղաքացիների համար: Իսկ երեկոյան վարչապետը ասաց. «Բաղրամյան 26-ի դռները բացվեցին, բայց մենք ևս մեկ քայլ ունենք այս քաղաքական խնդիրը վերջնականապես լուծելու: Մենք պետք է բացենք նաև Ազգային ժողովի դռները ՀՀ քաղաքացիների առաջ»: 

Էդուարդ Շարմազանովը նկատեց, որ եթե Բաղրամյան 26-ն արարողակարգային շենք է, ապա Ազգային ժողովում աշխատող միջավայր է: Օրվա ընթացքում հաճախում են բազմաթիվ պատգամավորներ, նրանց օգնականները, ԱԺ աշխատակազմը, լրագրողներ: 

«Մենք պետք է առաջին հերթին պահպանենք ղեկավարների և պետական աշխատողների անվտանգությունը: Կանգնել ասել՝ իմ ժողովուրդն ինձ ոչ մի բան չի անի, կներեք, այդպես չի լինում: Դա ականջահաճո հայտարարություն է: Ն. Փաշինյանն ասում է՝ Ազգային ժողովի դռները փակ են մնացել, Ազգային ժողովի դռները բաց են արդեն 27 տարի, որովհետև ՀՀ քաղաքացիներն են ընտրում ԱԺ-ում աշխատող պատգամավորներին: Ազգային ժողովի դռները միշտ բաց են և բաց են լինելու հասարակության առջև»,- նշեց ԱԺ փոխնախագահը: 

Ավելին, Էդուարդ Շարմազանովի խոսքով՝ Կառավարությունը դեռ շատ բան ունի սովորելու Ազգային ժողովի բաց աշխատանքից. «Ազգային ժողովն ավելի բաց է աշխատում, այստեղ միայն դռները փակել-բացելով չէ: Մենք ձևի հետևից չպետք է ընկնենք, այլ բովանդակաթյան: Մեր խնդիրն է Ազգային ժողովի բնականոն աշխատանքն ապահովել: Օրինակ, կառավարությունն էլ ունի հետևի մուտք, որով պարոն վարչապետը մեքենայով մտնում է և այնտեղ որևէ մեկը չի մտնում: Շատ ճիշտ է, որ դա չի բացվում, որովհետև այնտեղ ի վերջո կան անվտանգության կանոններ: Կառավարության շենքի դիմացի հատվածը բաց է, հետևի հատվածը փակ է: Հիմա եթե Ազգային ժողովը բացում ենք, բոլո՞ր մուտքերն ենք բացում, թե՞ Դեմիրճյանը փակում ենք: Այս բոլոր քննարկման հարց է»,- ասաց նա: