«Խրոնիկ քաղաքական ճգնաժամ, որը մերթընդմերթ պոռթկումներ է տալիս». «Փաստ»

«Փաստ» օրաթերթը գրում է.

Հոկտեմբերի 2–ին Ազգային ժողովում և դրանից դուրս տեղի ունեցած զարգացումները քաղաքագետ Գագիկ Համբարյանի համար սպասելի էին:

«Այն, որ Հայաստանում քաղաքական ճգնաժամ է, ես դա ասել եմ «թավշյա հեղափոխությունից» ընդամենը մի քանի օր հետո: Որքան էլ վարչապետ Նիկոլ Փաշինյանը, նախկին իշխանությունները հայտարարեին, որ Հայաստանում ամեն ինչ նորմալ է, այնուամենայնիվ, փաստ է, որ այս վեց ամիսներին խրոնիկ քաղաքական ճգնաժամ է, որը մերթընդմերթ պոռթկումներ է տալիս: Եվ հոկտեմբերի 2–ին եղավ հերթական պոռթկումը: Ինձ համար սա զարմանալի չէր: Նման իրավիճակի սպասում էի հատկապես Երևանի ավագանու ընտրություններից հետո, որտեղ «Իմ քայլը» շռնդալից հաջողություն ունեցավ: Եվ ինքնըստինքյան պետք է ստեղծվեր ֆորսմաժորային իրավիճակ»,–«Փաստ»–ի հետ զրույցում ասաց քաղաքագետը՝ հավելելով, որ այդ վիճակը ստեղծեցին նախկին իշխանությունները:

«Սա ուղղակիորեն նվեր էր հենց Նիկոլ Փաշինյանին: Այն, ինչ եղավ, ամբողջությամբ ձեռնտու էր հենց Նիկոլ Փաշինյանին, ով արդարացիորեն ելնելով իր քաղաքական թիմի շահերից՝ հայտարարեց, որ շատ արագ պետք է տեղի ունենան ԱԺ արտահերթ ընտրություններ: Քաղաքական ճգնաժամի արդյունքում Հայաստանն ունի թե՛ արտաքին և թե՛ ներքին խնդիրներ: Ներքինը քաղաքական ճգնաժամն է, որը մերթընդմերթ պոռթկումներ է տալիս, ինչն էլ բացասաբար է անդրադառնում ներքաղաքական իրավիճակի վրա և անընդհատ խնդիրներ են առաջանում: Սա իր հետ բերում է նաև արտաքին խնդիրներ՝ Նիկոլ Փաշինյանն իրեն ուժեղ չի զգում միջազգային հարթակներում, ինչպես նաև տարբեր երկրների ղեկավարների հետ հանդիպումների ժամանակ: Հայաստանում ստեղծվել է աբսուրդ իրավիճակ, երբ գործադիրը օրենսդիրում հենարան չունի: Հետևանքն այն է, որ ունենք և՛ տնտեսական, և՛ բանակցային խնդիրներ»,–նշեց նա՝ ընդգծելով, որ ստեղծվածը մեխանիկորեն հանգեցնում է մի վիճակի, երբ միջազգային ասպարեզում մեր դիրքերն այդքան էլ ուժեղ չեն: 

Քաղաքագետի խոսքով՝ այն, որ քաղաքական դաշտը պատրաստ չէ ընտրությունների արագ անցկացմանը, գիտեն բոլորը. «Դա գիտի նաև ՔՊ–ն, բայց այստեղ երկու խնդիր կա: Առաջինն այն է, որ ժամանակն աշխատում է նաև նույն ՔՊ–ի դեմ, քանի որ այս 6 ամիսներին շոշափելի հաջողությունների չի հասել: Իսկ հասարակության մեծ մասը, հոգնած ու զզված լինելով նախկին իշխանություններից, դեռ սպասում է. «սպասենք, տեսնենք՝ ի՞նչ կլինի»: Միևնույն ժամանակ Ն. Փաշինյանը գիտի, որ եթե ուժեղ իշխանություն չունենա՝ սպասվելիք հաջողությունները, փոփոխությունները հնարավոր չի լինի իրականացնել: Այդ առումով էլ Նիկոլ Փաշինյանը շտապեցնում է արտահերթի գործընթացը: Բացի այդ, ունի իր անձնական շահերը. Երևանի ավագանու ընտրությունները ստուգարք էին՝ ԱԺ արտահերթ ընտրություններից առաջ: Եվ հիմա նա արդեն քննության տեսքով է փորձում դա շատ արագ կրկնել, և իր իշխանությունը վերջնականապես ամրագրել, քանի որ, կրկին շեշտեմ, վաղը կամ մյուս օրը ժամանակը կաշխատի իր դեմ: Ժողովուրդը սպասում է, ասում՝ Փաշինյանը խոստացել է, բայց Նիկոլ Փաշինյանը շատ լավ հասկանում է, որ հետհեղափոխական էյֆորիան կանցնի, քանի որ հասարակությանը շատ երկար ժամանակ էյֆորիկ վիճակում հնարավոր չէ պահել»:

Ինչ վերաբերում է այն կարծիքներին, թե միահեծան իշխանություն ունենալու վտանգ կարող է լինել, Գագիկ Համբարյանը նախ օրինակ բերեց ավագանու ընտրությունների արդյունքները ու նշեց. «Վտանգ կա հետևյալ իմաստով. հասարակության վստահությունը ու միաժամանակ նաև պահանջը Ն. Փաշինյանից շատ մեծ է: Նրանք առավելագույն արդյունք պետք է ցույց տան, որ երևանցիները չհիասթափվեն: Որքան արդյունքը բարձր է, այնքան պահանջը իշխանությունից ավելի շատ է: Ինչ վերաբերում է ԱԺ արտահերթին, միահեծան իշխանության հնարավորությանը. եթե անգամ ՔՊ–ն 90 տոկոս ձայն հավաքի, Սահմանադրության համաձայն ԱԺ–ում ընդդիմությունը պետք է 30 տոկոս ներկայացվածություն ունենա: Այդ 30 տոկոսը պետք է ապահովվի, խնդիրն այն է, թե ինչպե՞ս և ո՞վ է լցնելու այդ դաշտը. եթե փորձ արվի այդ դաշտը լցնել ՔՊ–ին մոտ քաղաքական ուժերի ձայներով, դա կլինի խաբկանք»,–ընդգծեց Գ. Համբարյանը՝ հավելելով, որ իշխանությունը պետք է ուժեղ ու բանիմաց ընդդիմություն ունենա, հակառակ դեպքում լճանալու է»: