Մոտ ժամանակահատվածում ԱԺ ընտրություններ անցկացնելու դեպքում մենք ունենալու ենք մոնոպոլ իշխանություն, որը չեմ կարծում, որ բխում է մեր երկրի շահերից. Գ. Նուշիկյան

Չեմ կարծում, որ  ներդրումների համար անհրաժեշտ է Ազգային ժողովի արտահերթ ընտրություններ անցկացնել: Tert.am-ի հետ զրույցում նման կարծիք հայտնեց ԱԺ նախկին պատգամավոր, «Նուշիկյան ասոցիացիա» ընկերության ղեկավար Գարեգին Նուշիկյանը: «Հենց այս փուլում ես՝ որպես ներդրող, ունեմ բավականին մեծ ներդրումային ծրագիր և ես այդ ծրագիրն իրականացնում եմ: Չեմ կարծում, որ մեր այսօրվա կամ վաղվա կառավարությանը խոչընդոտ կարող է հանդիսանալ ներդրումներին»,- նշեց նա: Ըստ Գ. Նուշիկյանի՝ մոտ ժամանակահատվածում արտահերթ խորհրդարանական ընտրություններ անցկացնելու դեպքում ՀՀ-ում լինելու է մոնոպոլ իշխանություն. «Չեմ կարծում, որ բխում է մեր երկրի շահերից: Այսօր մեր հասարակությունը կենտրոնացած է մի ուղղության, մի կողմի վրա և չկա այլ ոչ մի կողմ: Մեր երկրին դա լավ բանի չի բերելու»,- ասաց նա:

- Վարչապետ Նիկոլ Փաշինյանը հայտարարում, որ արտահերթ խորհրդարանական ընտրությունները պետք է տեղի ունենան դեկտեմբերին, քանի որ գործարարները սպասում են՝ Հայաստանում ներդրումներ անելու համար: Ձեր կարծիքով՝ ներկա քաղաքական իրավիճակը խանգարո՞ւմ է ներդրումների ներգրավմանը:

- Միգուցե, վարչապետը ավելի շատ բան գիտի, քան ես, բայց ես այդ կարծիքին չեմ, որ  ներդրումների համար անհրաժեշտ է ԱԺ-ի արտահերթ ընտրություններ անցկացնել: Բայց ներքաղաքական ստեղծված իրավիճակից ելնելով, կարծում եմ, որ անհրաժեշտ են խորհրդարանական նոր ընտրություններ, որպեսզի այսօր տիրող մթնոլորտը հանդարտվի: Ես չգիտեմ, դա կլինի դեկտեմբերին, թե մայիսին, հունիսին, բայց լավ կլիներ, որ դա տեղի ունենար կոմպրոմիսային պայմաններում, որպեսզի անտեղի լարվածություն չլիներ, որը շատ խանգարում է մեր բնականոն կյանքին՝ թե՛ գործադիրի, թե՛ օրենսդիրի, թե՛ ընդհանրապես ամբողջ հասարակության կյանքը խաթարվել է դրանով:

- Դուք որպես գործարար, ներդրող, այս ժամանակահատվածում ներդրում կանեի՞ք, թե՞ կսպասեիք անորոշությունը վերանար, ընտրությունները տեղի ունեաին, նոր ներդրում կկատարեիք:

- Հենց այս փուլում ես որպես ներդրող ունեմ բավականին մեծ ներդրումային ծրագիր և ես այդ ծրագիրն իրականացնում եմ: Չեմ կարծում, որ մեր այսօրվա կամ վաղվա կառավարությանը խոչընդոտ կարող է հանդիսանալ ներդրումներին: Ես բացարձակ մտավախություն չունեմ այս առումով: Իմ օրինակով փորձում եմ մարդկանց՝ իմ բարեկամներին, ընկերներին, մնացածին ցույց տալ, որ մեր պետության զարգացման համար անհրաժեշտ է երկրում ներդրումներ կատարել: Ես միշտ կարծել եմ, որ առաջին հերթին մեր երկիրը մենք ինքներս պետք է կառուցենք, ներդրումներ իրականացնենք, որպեսզի դրսի ներդրողները տեսնեն, վստահություն լինի մեր երկրի նկատմամբ և իրենք էլ ներդրում անեն: 

- Նիկոլ Փաշինյանը հայտարարում է, որ ԱԺ արտահերթ ընտրությունները պետք է դեկտեմբերին տեղի ունենան, սակայն խորհրդարանական ընդդիմադիր ուժերը նշում են, որ նախ Ընտրական օրենսգիրքը պետք է փոփոխվի, որպեսզի հնարավոր լինի պատշաճ ընտրություններ անցկացնել: Ի՞նչ եք կարծում, հնարավո՞ր է կարճ ժամկետում, ինչպես ԱԺ ուժերն են ասում՝ պատշաճ ընտրություններ անցկացնել: 

- Նայած, թե մենք ինչ ենք հասկանում պատշաճ ընտրություններ ասելով: Երևանի ավագանու ընտրություններն էլ շատ պատշաճ ու նորմալ անցկացվեցին, բայց մենք ունեցանք 82 տոկոսանոց կառավարում, որը չեմ կարծում, որ բխում էր քաղաքապետարանի հետագա աշխատանքի արդյունավետությունից: Ես բազմիցս ասել եմ, որ երկրում պետք է լինի շատ ուժեղ ընդդիմություն: Բոլոր իշխանությունների ժամանակ ընդդիմությունը մեզ համար շատ կարևոր է: Տեսեք, հիմա գործադիրը մի թև է, օրենսդիրը մի թև է, դա երկրի համար օգտակար ամենադասական իշխանավարության ձևն է: Երկու կողմերն էլ իրենց քայլերում շատ ավելի զգույշ են, խոհեմ են, քայլ անելուց առաջ ավելի երկար են մտածում, և դա բերում է մեր երկրի համար դրական արդյունքներ:

- Կարծում եք, որ մոտ ժամանակում ԱԺ արտահերթ ընտրությունների անցկացման դեպքում խորհրդարանում էլ նո՞ւյն պատկերը կստեղծվի, ինչը Երևանի ավագանիում է:  

- Միանշանակ: Ճիշտ է՝ դա ունի և օբյեկտիվ, և սուբյեկտիվ հիմքեր: Մեր հասարակությունը նախկին իշխանություններից, նախկին կառավարումից այնպես հոգնած է ու հիասթափված է, որ միանշանակ ունենալու ենք մոնոպոլ իշխանություն, որը չեմ կարծում, որ բխում է մեր երկրի շահերից:

- Այսինքն, պետք է ընդդիմադիր քաղաքական ուժերին ժամանակ տրվի ընտրություններին պատրաստվելու համար: Մայիսից մինչև դեկտեմբերը բավարար ժամանակահատված չէ՞ր ընդդիմադիր քաղաքական ուժերի համար պատրաստվելու ընտրություններին:

- Նախևառաջ խորհրդարանական և արտախորհրդարանական ուժերը բոլորն էլ միահամուռ Ընտրական օրենսգրքի փոփոխությունների հետ կապված ունեն իրենց դիտարկումները, առարկությունները: Ժամանակին ես էլ եմ իմ դժգոհությունը հայտնել և դեմ արտահայտվել ռեյտինգային ընտրակարգին, կարելի է ասել, դրա համար էլ այն ժամանակ իմ թեկնածությունը չառաջադրեցի ընտրություններին: Որոշակի փոփոխություններ պետք է լինեն, և իհարկե, ժամանակ է հարկավոր, որպեսզի մեր հասարակությունն էլ կարողանա օբյեկտիվ գնահատել իրողությունները, կուսակցությունների քարոզարշավները, քաղաքական ծրագրերը և այլն: Տարբեր տեսակի հարցեր կան, որոնք հասարակությանը բացարձակ չեն հետաքրքրում: Այսօր մեր հասարակությունը կենտրոնացած է մի ուղղության, մի կողմի վրա և չկա այլ ոչ մի կողմ: Մեր երկրին դա լավ բանի չի բերելու: Մեր երկրի քաղաքականությունը, հասարակությունը պետք է կոնսոլիդացված լինի, մենք շատ ծանր ժամանակներ ենք ապրում, շատ բարդ տարածաշրջանում ենք ապրում: Այսօրվա ամեն ինչը մեզ բացարձակ հարկավոր չէ, պետք է ավելի սառը սկսել դատել: Պետք չէ ոչ մեկի մեջ թշնամի տեսնել, մենք թշնամիներ չունենք: Ընդհակառակը, բոլոր տեղերում, բոլոր կուսակցություններում կարող ուժեր կան, խելացի, պարկեշտ մարդիկ ունենք, պետք է այդ ամբողջը կոնսոլիդացնել, միասնական ուժ է պետք դառնալ, որպեսզի կարողանանք այս ծանր ժամանակներում գոյատևենք: Մեծ հաշվով սա երկրի, պետության խնդիր է, պաշտոնի կամ իշխանության խնդիր չէ: