Մանե Թանդիլյան. «Խնամիներով, ծանոթներով որևէ մեկը աշխատանքի չի տեղավորվել». «Փաստ»

«Փաստ» օրաթերթը գրում է.

Զբաղվածության պետական գործակալոթյան միջոցով վերջին 4 ամսում աշխատանք գտածների թիվն աճել է 60 տոկոսով։ Այս նորությունը որոշակի հարցեր առաջացրեց, հարցից հարց ծագեց, իսկ արձագանքները միանշանակ չէին: Գրանցված ցուցանիշի ու մի շարք այլ հարցերի շուրջ զրուցել ենք աշխատանքի և սոցիալական հարցերի նախարար Մանե Թանդիլ յանի հետ:

Թե ինչի՞ արդյունքում է նման աճ գրանցվել, Մանե Թանդիլ յանը «Փաստ»–ի հետ զրույցում նախ ընդգծեց.

«Կան մարդիկ, ովքեր զբաղվածության պետական գործակալությունում տարիներ շարունակ գրանցված են եղել, իսկ այս ընթացքում գործակալության միջոցով 60 տոկոսով նրանց զբաղվածությունն ավելացել է: Ինչո՞ւ է սա կարևոր, որովհետև բազմաթիվ մարդիկ են դիմում ինձ ու հարցնում՝ իսկ ինչպե՞ս ինձ աշխատանքի կտեղավորեք: Ես շատ հստակ բոլորին ուղղորդում եմ զբաղվածության պետական գործակալություն: Ասում են՝ բայց մենք դիմել ենք նախկինում և չի ստացվել: Իսկ ես ասում եմ՝ դիմե՛ք, եթե չստացվի, նորից ինձ դիմեք: Շատ քաղաքացիներ, ովքեր բազմաթիվ պատճառներով ժամանակի ընթացքում կորցրել էին գործակալության աշխատանքի նկատմամբ վստահությունը, այժմ արդեն դիմում են՝ հույս ունենալով, որ կստացվի և ստացվում է: Այսօրվա գործակալությունը գիտի, որ դա իր գործառույթն է և այն չիրականացնելու դեպքում ես հստակ պատկերացում ունեմ, որ իրենք իրենց տեղում չեն: Հետևաբար՝ աշխատանքը տարվել է թե՛ գործակալության, թե՛ տարբեր տարածքային կենտրոնների հետ: Նրանք հստակ պատկերացում ունեն, որ ես շատ լավ տիրապետում եմ իրավիճակին. եթե ինքս տեղյակ եմ, որ կան աշխատատեղեր, որոնց հավակնում են մեր քաղաքացիները, բայց դրանք չեն իրացվում, ուրեմն՝ խնդիրը գործակալության մեջ է»:

Մանե Թանդիլ յանի համոզմամբ՝ թվերը ցույց են տալիս, որ վերահսկողության վերոնշյալ մեխանիզմն աշխատել է: Նրա խոսքով, բացի վստահությունը վերականգնելու գործոնից, կարևորում են նաև գործակալության վերաբերյալ տեղեկատվություն տարածելու հանգամանքը, քանի որ մարդիկ ինֆորմացված չեն: 

«Եթե շատ անկեղծ լինեմ, ապա անվստահություն կա նախարարության բոլոր գործակալությունների, ինչպես նաև բժշկասոցիալական փորձաքննության գործակալության նկատմամբ: Որևէ մեկը չի ժխտում սա, բայց իրականությունն այն է, որ բան է փոխվել, և այսօրվա իրողություններին համապատասխան փոփոխություններ են տեղի ունենում նաև այդ ոլորտներում»,–ասաց նա՝ նկատելով, որ բժշկասոցիալականն այդ առումով մի փոքր զիջում է զբաղվածության գործակալությանը:

«Պատճառն այն է, որ բժշկասոցիալական փորձաքննության գործակալության ռեֆորմը դեռ ընթացքի մեջ է՝ այստեղ խորքային ռեֆորմ է անհրաժեշտ հաշմանդամության խմբերի հետ կապված: Արդեն սկսել ենք որոշակի կադրեր փոփոխել, ովքեր արմատացած են եղել նախորդ համակարգի հետ, և աշխատաքն էլ, ըստ էության, ձախողել են: Այդ կոռումպացված համակարգերը, որոնք ներդրված են եղել, նաև իրենց ոչ պակաս մասնակցության շնորհիվ է: Հետևաբար՝ նաև կադրերի փոփոխության անհրաժեշտություն կա: Կա նաև համակարգային ու մոտեցումների փոփոխության անհրաժեշտություն: Եվ իսկապես պետք է շատ ջանք թափել, որ այս ոլորտում ևս փոփոխություն արվի»:

Իսկ թե որքանո՞վ է հաջողվել մինչ այս լուծել վերոնշյալ կադրերի հարցը, Մանե Թանդիլյանը պատասխանեց. 

«Ես առաջին իսկ օրվանից ասել եմ, որ ինձ համար գնահատելի է լինելու աշխատող մարդը: Անկախ իր քաղաքական հայացքներից, կուսակցական պատկանելիությունից, ու անկախ քաղաքական որևէ փոփոխությունից այդ մարդը պետք է ունենա աշխատանք, պետք է լավ ապրի: Ես հենց այդ սկզբունքով եմ առաջնորդվել: Իմ օրոք մեր համակարգում խնամիներով, ծանոթներով որևէ մեկը աշխատանքի չի տեղավորվել: Կարծում եմ՝ այս մտածելակերպը պետք է գործի բոլոր պետական գերատեսչություններում, այլապես մենք ձախողելու ենք: Երբ ես խոսում եմ հատուկ և առանձին վերցված անձանց մասին, ես ուզում եմ հուշել, որ կան աշխատակիցներ, որոնց ոչ որակյալ աշխատանքի շնորհիվ է համակարգը տարիներ շարունակ ձախողվել: Հետևաբար՝ շատ կուզենամ, որ այդ աշխատակիցները կա՛մ վերաբերմունքը փոխեն, կա՛մ իմանան, որ իրենց ժամանակն անցել է: Ես այդ մեսիջները հստակ եմ հղել մեր աշխատակիցներին»:

Վերադառնալով զբաղվածության գործակալությանը՝ այդ համատեքստում նախարարից հետաքրքրվեցինք՝ անբարեխիղճ մասնավոր գործակալությունների հարցն ինչպե՞ս է լուծվելու: Նշենք, որ տարիներ շարունակ քաղաքացիները բարձրաձայնել են, որ մի շարք գործակալություններ իրենց մոլորեցրել են, միայն գումար աշխատելու նպատակ հետապնդել:

«Իհարկե, մասնավոր շուկան է կարգավորում այդ հարաբերությունները: Բայց, միևնույն ժամանակ, ես զբաղվածության պետական գործակալության առաջ հստակ խնդիր եմ դրել. չպետք է կրկնել նույն գործառույթը, որն այդ գործակալություններն են իրականացնում: Զբաղվածության պետական գործակալության գործառույթը պետք է տարբերվի: Միևնույն ժամանակ, երբ հասկացա, որ իրականում վերոնշյալ առումով ևս խնդիր կա, որոշեցի, որ պետք է պահպանել որոշակի գործառույթ, որպեսզի այդ շուկայում մրցակցություն ապահովենք: Հետևաբար, երբ աշխատանքի տեղավորման մասնավոր գործակալությունները մրցակցության առկայություն տեսնեն, ստիպված կլինեն ավելի բարեխիղճ և նորմալ աշխատանք իրականացնել: Բայց իրականում շատ կցանկանամ, որ այդ խնդիրը դրված չլինի զբաղվածության պետական գործակալության ուսերին, որովհետև մեր գործառույթը փոքր-ինչ այլ է: Մենք պետք է կարողանանք հայտնաբերել զբաղված լինելու կարիք ունեցողներին և նրանց հետ աշխատանք կատարել»,–ասաց նա: