ԱՄՆ նախագահի խորհրդական Ռուդի Ջուլիանին Հայաստան է գալիս մասնավոր այցով․ Սուրեն Սարգսյան

Քաղաքագետ Սուրեն Սարգսյանի խոսքով՝ Ամերիկայի Միացյալ Նահանգների նախագահ Դոնալդ Թրամփի խորհրդական Ռուդի Ջուլիանիի այցը Հայաստան ոչ թե տարածաշրջանային է, այլ մասնավոր. նա գալիս է մասնակցելու Եվրասիական տնտեսական հանձնաժողովի կազմակերպած տնտեսական ֆորումին: Այս մասին նա ասաց Tert.am-ի հետ զրույցում՝ պարզաբանելով Ֆեյսբուքում արած իր գրառումը:

«Նրա այցը երկկողմ քաղաքական օրակարգ չի պարունակում, և տարածաշրջանային չէ: Նա Հայաստան է գալիս ոչ  թե որպես ԱՄՆ նախագահի կիբերհանցագործությունների դեմ պայքարի հարցերով խորհրդական կամ նախագահի իրավական խմբի պատասխանատու, այլ որպես «Ջուլիանի փարթներսի» հիմնադիր: Հայաստանում է լինելու մասնավոր այցով»,- ասաց նա:

Նշենք, որ Սուրեն Սարգսյանը Ֆեյսբուքյան իր էջում տեղեկացրել էր, որ իր տեղեկություններով, Հայաստան կժամանի Թրամփի խորհրդական, Նյու Յորքի նախկին քաղաքապետ Ռուդի Ջիուլիանին:

Նա նաև իր գրառման մեջ նկատել էր, որ Ջիուլիանին Թրամփի աջակիցն, ընկերն ու խորհրդականն է: «Նաև Թրամփի անձնական իրավաբանը: 2001թ. սեպտեմբերի 11-ի ահաբեկչական հարձակման ժամանակ հենց նա էր Նյու Յորքի քաղաքապետ»,- գրել էր նա:

Չնայած Ջուլիանիի այցը Հայաստան մասնավոր է, սակայն, այնուամենայնիվ, ըստ նրա՝ այն լավ առիթ է  հայ-ամերիկյան հարաբերությունները նոր մակարդակի բարձրացնելու համար:

«Նրա հետ ուղիղ կապ է հաստատելու մեր երկրի ղեկավարությունը: Նրա հետ ծանոթությունը կարող է նպաստել ԱՄՆ-ի ղեկավարության հետ կապեր հաստատելուն: Նա կոնտակտ անձ կարող է լինել Երևանի և Վաշինգտոնի միջև»,- ասաց նա:

Ռուդի Ջուլիանին, ըստ Սուրեն Սարգսյանի, ԱՄՆ նախագահ Թրամփի վաղեմի բարեկամն է: «Նախագահական ընտրություններին  նա Թրամփի քարոզարշավի ժամանակ ակտիվ աշխատել է: Շատ համոզված Հանրապետական է, Նյու Յորքի քաղաքապետն է եղել: Տեղեկություն կա, որ նրան Թրամփն անգամ առաջարկել է պետքարտուղարի պաշտոնը, ինչից նա հրաժարվել է: Հիմա հասարակական հիմքունքներով նա օգնում է Թրամփին լուծել այն իրավական խնդիրները, որ կան Միացյալ Նահանգներում»,- ասաց նա:

Ջուլիանին Հայաստան է գալիս ԵԱՏՄ ֆորումին մասնակցելու համար: «Ստացվում է, որ Ջուլիանիի և ԱՄՆ նախագահի ազգային անվտանգության հարցերով խորհրդական Ջոն Բոլթոնը համարյա նույն ժամանակում են գալիս Հայաստան՝ 1-2 օր տարբերությամբ:

ԱՄՆ նախագահի երկու խորհրդականների այցի ժամանակ էլ, ըստ Սուրեն Սարգսյանի, պետք է չափազանց կարևոր լինի հայ-ամերիկյան հարաբերություններում նոր օրակարգ առաջարկելը:

«Կարծում եմ՝ Հայաստանը Միացյալ Նահագներին կարող է Աֆղանստանում իր աջակցությունն առաջարկել: Դա յուրահատուկ բալանս կլինի թե՛ Պակիստան-Ադրբեջան հարաբերություններում, թե Պակիստան-Հայաստան հարաբերություններում, թե՛ Պակիստան-Աֆղանստան-ԱՄՆ հարաբերություններում: Ընդհանրապես՝ սա լուրջ քաղաքական քայլ կլինի Սիրիայում Հայաստանի զինված ուժերի ներկայությանն էլ բալանսավորելու համար», - ասաց նա:

ԱՄՆ նախագահի խորհրդականների այցերի լավագույն արդյունքը, Սուրեն Սարգսյանի խոսքով, կարող է լինել հայ-ամերիկյան հարաբերություններում՝ տարբեր ոլորտներում ռազմավարական հարաբերություններ հաստատելը, դա կլինի՝ տնտեսության, միջազգային անվտանգության, թե այլ ոլորտներում:

«Լավ կլինի ստորագրենք այնպիսի փաստաթուղթ, ինչպիսին Ղազախստանը ստորագրեց  Միացյալ Նահանգների հետ՝ Նազարբաևի Վաշինգտոն այցի ժամանակ: Ռազմավարական բնույթի նման հարաբերություններ հաստատելը մեզ համար շատ կարևոր կլինի»,- ասաց նա:

Ավելի վաղ հայտնել էինք, որ Ամերիկայի Միացյալ Նահանգների նախագահի ազգային անվտանգության հարցերով խորհրդական Ջոն Բոլթոնը տարածաշրջան կատարելիք այցի շրջանակներում կայցելեի Հայաստան: Այս մասին նա էր գրառում կատարել «Թվիթերի» իր միկրոբլոգում:

«Հոկտեմբերի 20-ին ես ճանապարհորդելու եմ Ռուսաստան, Ադրբեջան, Հայաստան Վրաստան՝ հանդիպելու իմ գործընկերների և այլ բարձրաստիճան պաշտոնյաների հետ` առաջ քաշելով ամերիկյան շահերը անվտանգության հարցերում»,- գրել էր նա: