«Մեծ–մեծ խոսում են, բայց դեռ ոչինչ չեն բացահայտել». «Փաստ»

«Փաստ» օրաթերթը գրում է.

ԱԱԾ պետի նախկին տեղակալ, գրող, հրապարակախոս Գուրգեն Եղիազարյանի դիտարկմամբ, այսօրվա դրությամբ երկիրը տանուլ է տալիս վարվող կադրային քաղաքականության պատճառով: Այդ հարցը վերանայման լրջագույն կարիք ունի:

Կադրային քաղաքականության մասին խոսելով՝ նա իրեն նկատի չունի, քանի որ ներկա կառավարության հետ աշխատելու ո՛չ ցանկություն ունի, ո՛չ էլ ձգտում: Իրեն չի տեսնում նաև օրենսդիրում: Բայց, եթե մի օր պաշտոն զբաղեցնելու մասին մտածի, ապա, ըստ նրա, դա կլինի հաջորդ իշխանությունների օրոք, անկախ նրանից, թե քանի տարի հետոյի մասին է խոսքը: Բայց որ երկիրը ծանրագույն վիճակից հանելու համար լուրջ կադրեր են հարկավոր, Գ. Եղիազարյանի կարծիքով, միանշանակ է: Ծանրագույն վիճակ ասելով նա նկատի ունի Հայաստանում ԱՄՆ դեսպան Միլսի՝ արցախյան հողերը հանձնելու մասին ակնարկը, որին հայկական կողմը պետք է լուրջ ուշադրության արժանացնի:

«Այսինքն, այն թեզը, որ ես դեռ անցյալ տարվանից ասում էի, թե Սերժ Սարգսյանը սեպտեմբերի 19–ից արդեն իսկ որոշել է փախչել, ճողոպրել իր պաշտոնից, քանի որ արդեն իսկ հայտարարել է 3 շրջանների հանձնման մասին, փաստորեն իրականություն է դառնում: Դրան գումարած, պետք չէ մոռանալ, որ թույլ տնտեսություն ունեցող երկրի առջև լրջագույն ոսոխ է կանգնած: Թե չէ ինչի՞ փախավ Սերժ Սարգսյանը, իսկ այն, որ ասում էին նա երիտասարդանում է, կարո՞ղ է դա ճշմարտություն էր»,– ասաց Գ. Եղիազարյանը: 

Նա համոզված է, որ ով էլ երկրի ղեկավարը լինի, երբեք էլ հող չի հանձնի: Եվ այդ պատճառով էլ, հասկանալով, թե ինչ է իրականում կատարվում, Սարգսյանը գնաց: Ճշտող դիտարկմանը, թե՝ Սարգսյանի և Փաշինյանի միջև սարերի–ձորերի տարբերություն կա, քանի որ մեկի անվան հետ են կապվում բազմաթիվ կոռուպցիոն գործեր ու անօրինականություններ, իսկ մյուսի պարագայում բոլոր էջերը մաքուր են, Գ. Եղիազարյանը նշեց, որ պետք չէ մոռանալ, որ Փաշինյանը կարողացավ գալ, քանի որ Սարգսյանը գնալու մտադրություն ուներ:

«Իհարկե, սարերի–ձորերի տարբերություն կա և՛ նրանց արտաքինի, և՛ մոտեցումների, և՛ կոռուպցիոն տարբեր սխեմաներում մասնակցություն ունենալու մեջ, բայց այսօր Փաշինյանի կառավարության՝ բռնեմ–թողնեմ– փախչեն գործելաոճը լուրջ մտահոգվելու առիթ է բոլորիս համար: Մարդուն բերման ենթարկելը շատ լուրջ գործողություն է, և գործը պետք է հասցնել այն աստիճանի, որ նրան բռնեն ու էլ բաց չթողնեն: Եվ սեփական կատու անգամ չունեցած մարդուն, ով հետո դարձել է միլիոնատեր, բերման են ենթարկում, հետո թողնում են, որ փախչի՞: Եվ հասկանալի չէ, թե այս պայմաններում մեր մասնագետներից ով ում հետ է աշխատում: Գնալով այս ամեն ինչը ծիծաղելի է դառնում: Եթե այս ամենի մեջ շահ չկա, ապա դա ոչ պրոֆեսիոնալիզմի հետևանք է: Ի՞նչ մասնագետի մասին կարող է խոսք լինել, երբ նախաքննական մարմինը՝ անվտանգությունը, մարդուն բերում է, հասկացնում է, թե ինչով են իրենք հետաքրքրված, հետո բաց են թողնում ու շանս են տալիս գնալ ու գործերը կարգավորե՞լ: Դրանից հետո այդ մարդը կարող է գնալ ու ողջ իրավական համակարգի վրա ծիծաղե՞լ»,– ասաց Գ. Եղիազարյանը:

 

«Բոլորը գիտեն, որ Սաշիկ Սարգսյանը 50/50 է գործարարների հետ: Այդ մասին և՛ ես եմ ասել, և՛ Նիկոլ Փաշինյանը: Բայց այս ընթացքում ինչո՞ւ գոնե մեկ դեպք չի հայտնաբերվել: Չէ՞ որ առաջին մարդը, ով շահագրգռված է նման դեպք բացահայտելու հարցում, Փաշինյանն է: Դրա համար հսկայական ապարատ է աշխատում: Մենք գիտենք, չէ՞, թե նախկինում ինչ երկրում ենք ապրել, գիտենք, չէ՞, որ այդ ամեն ինչը ճշմարտություն է: Մեծ–մեծ խոսում են, դե թող հայտնաբերեն: Իմ վարկածն այն է, որ չեն ցանկանում բացահայտել: Բայց թե ինչո՞ւ, պետք է իրենց հարցնել: Իմ կարծիքով՝ 100 վարկած կարող է լինել, բայց լավ կլինի, որ իշխանություններն ասեն, թե ինչո՞ւ մինչ օրս որևէ գործ չեն կարողացել բացահայտել»,– ասաց Գ. Եղիազարյանը: 

Մեկնաբանելով Փաշինյանի այն հայտարարությունը, թե՝ ժողովուրդը եթե չցանկանա, ապա Փաշինյանն անգամ 15 րոպե չի շարունակի պաշտոնավարել, նա նշեց, որ նախ պետք է հասկանալ, թե ժողովուրդ ասելով Փաշինյանն ինչ նկատի ունի:

«Խոսքը 3 միլիոնի՞, թե՞ 30 հազարի մասին է: Խոսքը մի հրապարակում լցված սլավոնական վեչեի զո՞րքն է Պերուն գերագույն աստվածով: Այդպես սլավոններն էին հավաքվում ու հրապարակում որոշումներ կայացնում: Հիմա Փաշինյանի ասած ժողովուրդը 3 միլիո՞նն է, թե՞ 30 հազարը»,– ասաց Գ. Եղիազարյանը:

Խոսելով առաջիկա խորհրդարանական արտահերթ ընտրությունների մասին՝ նա նշեց, որ իր կարծիքով, ապագա խորհրդարանի 97 տոկոսը Նիկոլ Փաշինյանին «հավատարիմ» մարդիկ կլինեն: 

«Տեսաք, չէ՞, թե Սերժ Սարգսյանի հավատարիմներն ինչպես ճողոպրեցին: Եվ երբ որ գա պահը, նույն ձևով էլ նրա մոտից կճողոպրեն: Եվ ինչպես առնետավազքի արդյունքում ստեղծվեց Հանրապետականը, նույն առնետավազքը կարող է լինել նաև ապագայում: Եվ եթե Նիկոլ Փաշինյանը վարչապետ ընտրվելուց հետո շարունակի երկիրն այնպես կառավարել, ինչպես հիմա է կառավարում, ապա մենք կունենանք միապետություն, հետո այն կվերածվի բռնապետության: Այդ ժամանակ ժողովրդավարություն ասվածից ծվեն անգամ չի մնա: Հիմա վաղ է խոսել, թե ուր կարող ենք հասնել, քանի որ պատերազմը Դամոկլ յան սրի նման կախված է Արցախի գլխին: Եվ որպեսզի ապրիլ յան դեպքերի նման մեր առյուծ տղաներին բահերով ճակատ ուղարկելու դեպքերը չկրկնվեն, ապա պետք է մասնագետներին ներգրավել երկրի կառավարման հարցում: Եվ ամենևին կապ չունի, թե այսօրվա հեղափոխականներն ընդունում են դա, թե ոչ: Ի վերջո. ստիպված են լինելու մասնագետների հրավիրել աշխատելու, որպեսզի կարողանան իրենց իշխանությունը պահել, ուրիշ ճար նրանք ուղղակի չունեն»,– խոսքը եզրափակեց Գ. Եղիազարյանը: