Մեր ցուցակում կտեսնեք հարգված մարդկանց՝ տարբեր ոլորտներից, ըստ ԱԺ-ի սպասարկման ուղղությունների. Ալեն Սիմոնյան

Չեմ բացառում, որ պարոն Փաշինյանը կրկին կառաջադրվի, և այդ համար 1 քաղաքական ամբիոնը կօգտագործվի քաղաքական խնդիրներ բարձրացնելու համար: Թեև Սահմանադրությամբ նման պայման չկա, իսկ այս պահի դրությամբ նա չի առաջադրվել: 

Այս մասին «Ազատության» «Կիրակնօրյա վերլուծական» հաղորդման ժամանակ ասել է «Ելք» խմբակցության պատգամավոր Ալեն Սիմոնյանը՝ պատասխանելով հարցին, թե հնարավոր է, որ վարչապետի առաջադրման երկրորդ փուլում վարչապետի պաշտոնակատար Նիկոլ Փաշինյանն առաջադրի իր թեկնածությունը:

Հարցին, թե ովքեր են լինելու կուսակցության ցուցակի առաջին 5 տեղերն զբաղեցնող անձինք, Ալեն Սիմոնյանը պատասխանել է, որ դա դեռևս հայտնի չէ, սակայն, հավանաբար, «Իմ քայլը» դաշինքի ցուցակը կգլխավորի հենց Նիկոլ Փաշինյանը: «Հավատացեք, որ կտեսնեք տարբեր մարդկանց, ձեր կողմից հարգված մարդկանց՝ տարբեր ոլորտներից, արհեստավարժ մարդկանց՝ ըստ Ազգային ժողովի սպասարկման ուղղությունների՝ արտաքին քաղաքականություն, պաշտպանության, իրավական հարցեր»,-բացատրել է Ալեն Սիմոնյանը, ապա հավելել, որ շեշտադրումը հենց դրա վրա է լինելու, այսինքն, թե օրինակ՝ ով է լինելու խորհրդարանի առողջապահության հանձնաժողովի նախագահը:

Ըստ նրա՝ խորհրդարանում բավականին հետաքրքիր պատկեր կլինի, իրապես քաղաքական ԱԺ կընտրվի: «Ես կարող եմ 3 ուժ ասել, որովհետև 4-րդի մասին կարող եմ սխալվել, դա իմ տպավորությունն է՝ հենվելով քաղաքի ընտրության վրա: Այսինքն՝ կլինեն «Իմ քայլը», «Ծառուկյան» և «Լույս» դաշինքները, իսկ 4-րդի համար, կարծում եմ, պայքար է գնալու»,-հավելել է պատգամավորը:

Ինչ վերաբերում է ՀՀԿ-ին, ապա Ալեն Սիմոնյանն ասել է, որ այնտեղ մեծ ու ուժեղ ռեբրենդինգ է պետք. «Պետք է փոխել այն ամենը, ինչն անցյալն է հիշեցնում, բայց ես դա չեմ տեսնում, թեկուզ ընտրություններին քիչ է մնացել»: Իսկ թե ՀՀԿ-ականների հետ կհամագործակցեն, նա նկատել է, որ խոսքը գնում է քաղաքական ներուժի մասին, ոչ թե ժամանակին կոռումպացված անձանց հետ