ՔՊ ցուցակում ներառում եք հովանավոր ունեցողին, Սուրեն Պապիկյանի բանակի ընկերոջը․ Արագածոտնի մարզպետը համաձայն չէ ՔՊ անդամագրվածների հետ

Քաղաքացիական պայմանագիր կուսակցության Ապարանի տարածքային գրասենյակում ՔՊ-ին անդամագրվածների և մարզպետ, ՔՊ անդամ Դավիթ Գևորգյանի հանդիպումը բավականին լարված անցավ։ 

ՔՊ ակտիվը նախ հետաքրքրվեց՝ ինչու են իրենց առաջարկած ռեյտինգային բոլոր թեկնածուների անունները մերժվել։ Հանդիպման մասնակիցներից Արման Շահինյանը հիշեցրեց, որ իրենք առաջարկել են Հովհաննես Հովհաննիսյանի, Վարդան Ղազարյանի, Գոռ Պետրոսյանի և ազատամարտիկ, «Ապարան» ջոկատի հրամանատար Ռազմիկ Պետրոսյանի անունները: Մարզպետն արձագանքեց, որ ինքը բոլոր անունները ներկայացրել է ՔՊ վարչություն։

«Ներկայացրել եմ մեր հարգարժան, նաև ավագ ընկերների անունները, որոշումը կայացնում է վարչությունը՝ որոշակի չափորոշիչների հիման վրա՝ կրթական ցենզի, քաղաքական որոշակի ճանապարհ անցնելու հետ կապված, որքանո՞վ են կիսում արժեքները, որքանո՞վ են գոնե վարչության անդամներն իրենց ճանաչում»,-ասաց մարզպետը՝ հավելով, որ կոնկրետ չի կարող ասել, թե ինչու են այդ անունները մերժվել։ Արման Շահինյանն արձագանքեց․

«Այսինքն՝ Պետրոսյան Ռազմիկին ի՞նչ անուն են դրել , ճանապարհ անցած մարդ է, կամ Հովոյին, հալալ քրտինքով ապրող մարդ է, ինչո՞վ են առաջնորդվել, որ մերժել են, վարչությունն ակտիվին ի՞նչ պատասխան պիտի տա»,-հարցադրեց նա։ Հանդիպման մեկ այլ մասնակից էլ  նշեց, որ գործում է ծանոթ-բարեկամ սկզբունքը, այնպես է, ինչպես նախկինում։

«Ընտրվել է մի մարդ, ով  ունի հովանավոր, խոսքը Մաթոս Ասատրյանի մասին է, ինքը հայտարարել է, որ ունի հովանավոր, Սուրեն Պապիկյանն իրա բանակի ընկերն է, մենք ունենք տեղեկատվություն, որ ինքն արդեն ցուցակում ներառված է։ Մենք գրասենյակում չենք կարողանում իրան տենանք, իրան բազմիցս ասել ենք՝ արի, գոնե քեզ ճանաչենք, գրասենյակին էնքան է արհամարհում, չի ասում գամ, էս ակտիվն ա իմ համար աշխատելու։ Ասում էր, որ ինքը պիտի լինի նաև ՔՊ գրասենյակի ղեկավար»,-նշեց նա՝ հավելելով, որ տվյալ անձը նախկինում աջակցել է ՀՀԿ-ին, ԲՀԿ-ին, գումար է բաժանել ընտրողներին։ Մարզպետն արձագանքեց․

«Ինչպես բոլոր տեղերում, այնպես էլ մեր կուսակցությունում կարող են լինեն մարդիկ, ում հարաբերությունները միմյանց հետ ավելի սերտ են, քան մյուսների հետ, ովքեր նաև կուսակցության մեջ փոխհարաբերությունից, քաղաքական, պետական որոշակի գործունեությունից զատ ունեն անձնական որոշակի շփումներ, բայց պետք չէ ամեն տեղ մտածել, որ դա է որոշիչ դեր խաղացել, որ էս մարդը լինի այս կամ մյուս տեղում։

Հաստատ եմ ասում՝ կուսակցությունում կան մարդիկ, ովքեր ինձ ընկերներ են, բայց գոնե էս վերջին 5-6 ամսվա ընթացքում շատ սկզբունքային հարցերում հակառակվել եմ, այսինքն՝ ընկերական ձևով չի լինելու էս կուսակցությունում։

Ինչ վերաբերում է Մաթոսին, որ դուք ասում եք, ես չեմ մտածում, որ ինքը կամ ինչ-որ մեկն ունի հովանավոր, մարդիկ կան մեր կուսակցությունում, որ հանդես են գալիս, որպես նրանց հովանավորներ։ Հա,հնարավոր է պարոն Պապիկյանը և Մաթոսը ինչ-որ ընկերական հարաբերութուններ ունեն, բայց ես ձեզ հավաստիացնում եմ, որ դա չի կարող լինել որոշիչ, որ Մաթոսը լինի ցուցակում կամ չլինի, որովհետև առաջին հերթին Սուրեն Պապիկյանն այդ արժեհամակարգի կրողը չէ։ Ես իր արժեհամակարգին գոնե լավ ծանոթ եմ։ Մաթոսի հետ հանդիպել եմ երկու անգամ, բայց Պապիկյանին լավ ճանաչում եմ»,-վստահեցրեց Դավիթ Գևորգյանը։

ՔՊ գրասենյակում հավաքվածները նաև հարցրեցին՝ երբ են իրենք իմանալու՝ դե յուրե ՔՊ անդամ են, թե ոչ, դե ֆակտո համարվում են անդամ, մասնակցում են ժողովներին, բայց անդամագրման դիմումների պատասխանը չեն ստացել։ Մարզպետը նշեց, որ անդամագրման հարցում առաջնորդվում են մարդկանց անցած ճանապարհով, ազնվությամբ, պիտի ֆիլտրեն։ Տեղից արձագանքեցին, թե եթե որոշակիություն չկա, գուցե որոշում են՝ այլ կուսակցության անդամագրվեն, ինչին մարզպետը պատասխանեց․

«Ամենայն պատասխանատվությամբ հայտարարում եմ, որ մեկը, որ կասկած ունի՝ գա ՔՊ, թե գնա ուրիշ կուսակցություն, ես մաղթում եմ բարի ճանապարհ։ Ով, որ ուզում է ՔՊ մտնի որոշակի պաշտոնի համար, բարի ճանապարհ իրեն։ Ընտրությունների հետ կուսակցություն մտնելը ոչ մի կապ չունի, կառավարություն ձևավորելու հետ կապ չունի, ով, որ կասկածում է՝ մտնի ՔՊ, թե ուրիշ կուսակցություն, ես գտնում եմ, որ պետք է այդ մարդիկ չմտնեն ՔՊ, որովհետև ՔՊ-ն պիտի լինի ուժեղ կուսակցություն, ոչ թե հիմա, որ ուժեղ կուսակցություն է, իշխանություն, այլ վաղը, երբ որ մենք կդառնանանք ընդդիմություն։ Պետք չի, մի հոգի մտնի, որ մեր ընդդիմություն դառնալուց հետո գնալու է, ուրիշ կուսակցության համար կռիվ անի, ասի՝ մտցրեք ձեր կուսակցություն, էս ազգը հոգնել է 90 կուսակցություն փոխած դեմքերից։ Անորոշությունը պիտի դառնա որոշակի, կարաք ձեր դիմումը անդամագրության հետ վերցնեք, երբ ուզում եք»,-ընդգծեց նա։

Մարզպետն ասաց, որ չեն ուզում չարիքից հրաժարվել և վերածվել մեկ այլ չարիքի։ Հանդիպման կեսին մարզպետը հորդորեց, որ լրագրողները հեռանան, որովհետև քննարկվում են ներկուսակցական հարցեր։

Հիշեցնենք, որ այսօր Ապարանի ՔՊ գրասենյակի դիմաց ակցիա էին իրականացնում հեղափոխությունից հետո ՔՊ-ին անդամագրվածները, մի շարք ազատամարտիկներ և պարզապես քաղաքացիներ:

Նրանք պահանջում են, որ ՔՊ-ը ռեյտինգային ցուցակը չկազմի, իրենց ձևակերպմամբ, առանց ակտիվի հետ քննարկման: