Ակնկալում եմ մեր իշխանություններից դիվանագիտական խողովակներով և մնացած հնարավոր ձևերով հասնել նրան, որ Բելառուսը ներողություն խնդրի. Ա. Զաքարյան

Յուրաքանչյուրը հանդես է եկել հայտարարությամբ՝ ասելով, թե ինչու չի մասնակցում, տարբեր մարդկանց մոտ տարբեր մոտիվացիաներ են եղել, դրանք կարող են փոփոխված լինել: Մենք շարունակում ենք մեր քաղաքական ճանապարհը՝ մի փոքր փոփոխված, նորացված կազմով: 

Այս մասին «Ազատություն» ռադիոկայանի ուղիղ եթերում ասաց Հայաստանի Հանրապետական կուսակցության անդամ, պաշտպանության նախկին փոխնախարար Արտակ Զաքարյանը՝ պատասխանելով հարցին, թե այն, որ մի շարք ՀՀԿ-ականներ կամ ՀՀԿ խմբակցության նախկին ու ներկա անդամներ չեն մասնակցելու ԱԺ արտահերթ ընտրություններին, ինչո՞վ է պայմանավորված: Արտակ Զաքարյանն ընդգծեց, որ ցուցակի նորեկները հիմնականում կուսակցության երիտասարդական թևից են, կուսակցության տարբեր ծրագրերում են մասնակցություն ունեցել և իրենց տեսակետները կներկայացնեն նախընտրական բանավեճների ժամանակ: 

Հարցին, թե կարելի է ասել, որ տեղի է ունեցել սերնդափոխություն, նա պատասխանեց՝ դեռևս ոչ լիարժեք: «Որոշակի խնդիրներ մենք համագումարում կարծարծենք, որը կլինի հաջորդ տարվա մեջ»,-նկատեց նա: Վերջինս հավելեց, որ եկել է ազգային պահպանողականությունը նոր խոսքով ներկայացնելու, այդ արժեքները դաշտ բերելու շրջանը, հատկապես հիմա, երբ դրանց կորստյան վտանգը կա:

Արտակ Զաքարյանը նշեց, որ իրենք այլընտրանքներ են առաջ քաշելու բոլոր հարցերում: Ինչ վերաբերում է դիտարկմանը, թե միշտ իմիջ է ստեղծվել նախկին ղեկավարների համար, որ եթե իրենք չլինեն իշխանության, Արցախյան հարցը կտապալվի, Արտակ Զաքարյանն արձագանքեց, որ միգուցե այդպիսի իմիջ եղել է, բայց դրա ստեղծման նպատակ չի եղել«Անհատից, անձից չպիտի կախված լինի պետության ապագան, այսօր էլ Նիկոլ Փաշինյանից չպիտի կախված լինի երկրի ապագան: Ցավոք, Նիկոլ Փաշինյանին, ինչպես շատերն են ասում, եթե հանենք, այդ կուսակցությունը կդառնա որևէ քաղաքական արժեք չներկայացնող ուժ»,-ընդգծեց նա՝ հույս հայտնելով, որ այդ քաղաքական ուժի մեջ էլ կլինեն փորձառու, պրոֆեսիոնալ քաղաքական գործիչներ, բայց ոչ ի վնաս պետության անվտանգության, քանի որ արտաքին քաղաքականության մեջ սխալները չեն ներվում:

Անդրադառնալով ՀԱՊԿ նիստին հաջորդած իրադարձություններին, մասնավորապես Բելառուսի նախագահի քայլին՝ քննարկել նիստի մանրամասները Ադրբեջանի դեսպանի հետ, ապա կոշտ արձագանքել ՀՀ վարչապետի պաշտոնակատարի հայտարարություններին՝ Արտակ Զաքարյանն ասաց, որ շատ վատ է վերաբերում այդ հայտարարություններին, միաժամանակ ընդգծեց՝ նախկինում որևէ պետության մտքով չէր անցնում նման արձագանք տար ՀՀ-ին.

«Իհարկե, եղել են պրոբլեմներ, նոր չէ, որ մենք Բելառուսի հետ ունենք խնդիրներ, և դա, երևի թե, Նիկոլ Փաշինյանով պայմանավորված չէ, բայց կարծես վարվող արտաքին քաղաքականությունը՝ Նիկոլ Փաշինյանի կողմից, առիթ տվեց Բելառուսին անցնելու նաև դիվանագիտական էթիկայի սահմանները: Ես ակնկալում եմ մեր իշխանություններից, որ նրանք դիվանագիտական խողովակներով և մնացած բոլոր հնարավոր ձևերով հասնեն նրան, որ Բելառուսը պաշտոնապես ներողություն խնդրի»: 

ՀՀԿ-ականը միաժամանակ ասաց, որ այս հարցում պետք է միավորվել իշխանությունների շուրջ:

Հիշեցնենք, որ վարչապետի պաշտոնակատար Նիկոլ Փաշինյանը, անդրադառնալով Բելառուսի նախագահի ու Ադրբեջանի դեսպանի հանդիպմանը, որտեղ Լուկաշենկոն մանրամասներ էր պատմել ՀԱՊԿ նիստից, ասել էր․ «Դա դռնփակ ֆորմատով տեղի ունեցած նիստ է, որտեղ ռազմաքաղաքական դաշինքի ղեկավարները քննարկում են անցկացնում, դա փակ խոսակցություն է դաշնակիցների միջև: 

Եվ ես զարմացած եմ, որ 30 տարի նախագահի կարգավիճակում եղած մարդը կարող է իրեն այդպիսի քայլ թույլ տալ, և ես, իհարկե, պիտի պարզաբանումներ պահանջեմ Բելառուսի նախագահից և ոչ միայն նրանից: Մեր պայմանավորվածություններին հակասող հայտարարություն է արել նաև Նուրսուլթան Նազարբաևը՝ նիստից հետո հայտարարելով, որ ՀԱՊԿ գլխավոր քարտուղարի պաշտոնում նշանակվելու է Բելառուսի ներկայացուցիչ»:

Սրան հաջորդել է Բելառուսի արտաքին քաղաքական գերատեսչության արձագանքը: Մամուլի խոսնակ Անատոլի Գլազը նշել է, որ Փաշինյանն իրեն «հավանաբար միջազգային դատախազի տեղ է դրել՝ իրեն իրավասու համարելով  պատժել կամ ներում շնորհել»:

«Հավանաբար դա ընդունելի կլիներ ՀԱՊԿ նախկին գլխավոր քարտուղար, ՀՀ քաղաքացի Յուրի Խաչատուրովի դեպքում: Սակայն միջպետական հարաբերություններում գործում են արարողակարգի ու էթիկետի միանգամայն հստակ նորմեր»,- լրագրողների հետ հանդիպմանն ասել է Գլազը: