ԱԺ–ն այլ դերակատարում պետք է ստանձնի. հարկավոր է կառավարությանը հակակշռել. «Փաստ»

ԱԺ ընտրությունների արդյունքներն արձանագրեցին, որ հին ուժերը մերժվում են, և այլևս որևիցե հնարավորություն չկա գոնե այս ժամանակահատվածում վերադառնալ և երկրում դերակատարություն ունենալ: Նշվածը «Նախաձեռնությունների ազգային կենտրոն» հասարակական միավորման ղեկավար Վարդան Թունյանի կողմից արձանագրված փաստերից մեկն է:

 

«Այդ էջը պետք է փակվեր, և մի նոր էջ սկսվեր: Թեև ցանկանում էի, որ նոր ուժերն ընդդիմություն դառնային, ուզում, որ նոր ԱԺ–ն ավելի մրցակցային լինի, բայց քաղաքական զարգացումը ենթադրում է, որ ընտրությունն, ամեն դեպքում, պետք էր. միանշանակ պետք է մերժվեին և՛ ՀՀԿ–ն, և՛ ՀՅԴ–ն: Սա թույլ կտա, որ իրենք մի պահ հեռանան, մոտեցումներ մշակելու և վերակազմակերպվելու ժամանակ ունենան: Հիմա հեղափոխության ալիքի էներգիան դեռ շատ բարձր է, ուղղակի համապետական ընտրությունների մակարդակով հաստատագրվեց այն փաստը, որ նոր ուժերը լիակատար վերահսկողություն են սահմանում երկրում՝ թե՛ օրենսդիր, թե՛ գործադիր դաշտում, և կրում են ամբողջ պատասխանատվությունը»,–«Փաստի» հետ զրույցում ասաց նա՝ շեշտելով, որ ԱԺ անցած ուժերին, ամեն դեպքում, պետք են լուրջ ընդդիմախոսներ, լուրջ աջակցություն նաև հասարակական դաշտից:

 

Վ. Թունյանն ընդգծեց, որ նախընտրական շրջանում կիրառված որոշ տեխնոլոգիաներ իր համար խնդրահարույց էին. «Փաշինյանը հին մեթոդը կիրառեց՝ թիրախ ընտրելով ՀՀԿ–ին: Խորամանկորեն շեշտը դրվեց ՀՀԿ–ի վրա, որ ժողովրդի մոտ ակնհայտ լինի հնի ու նորի, հեղափոխության և հակահեղափոխության պայքարը, ինչի արդյունքում «Իմ քայլն» անհամեմատ մեծ տոկոս կհավաքի: Թե՛ դաշինքի և թե՛ երկրի համար լավ է, որ «Իմ քայլը» շատ ձայներ հավաքեց, բայց մյուս կողմից՝ առողջ և ուժեղ ընդդիմության ձևավորման իմաստով շատ վատ է»:

 

Նրա խոսքով՝ կան մի քանի օբյեկտիվ հանգամանքներ, համաձայն որոնց «Լուսավոր Հայաստան» կուսակցության նախագահ Էդմոն Մարուքյանը չի կարող հանդես գալ որպես լուրջ ընդդիմություն. «Օդում սավառնող կասկածները, հովանավորների մասին մտայնություններն իրեն թույլ չեն տալու շատ համարձակ քննադատել պարոն Փաշինյանին, իր դիրքերը թույլ են: Բացի այդ, լինելով «Ելք» դաշինքի անդամ, հեղափոխության բուն գործընթացին փողոցում ակտիվ պայքար չիրականացրեց: Այս հանգամանքը ևս թույլ չի տա մտածածներն ասել՝ լեզուն կարճ կլինի: Նա փորձելու է հարմարվել, որովհետև հետագայում՝ վերջին պահին, կարող են երեսին ասել՝ դու, ամեն դեպքում, չմասնակցեցիր հեղափոխությանը: Ինչ վերաբերում է ԲՀԿ–ին, ապա այն մեծ ռեսուրսի, լիդերի մեծ հեղինակության ու կատարած քայլերի շնորհիվ բավականին լուրջ տոկոս հավաքեց:

 

Բայց, այնուամենայնիվ, չմոռանանք, որ Գագիկ Ծառուկյանը մեծ գործարար է, տնտեսական բազմաթիվ կապերով ստիպված է լինելու առնչվել կառավարության հետ»:

 

Ըստ նրա՝ այս հանգամանքը միգուցե մի փոքր կաշկանդի քննադատելու առումով. «Բայց առաջ չընկնենք: ԲՀԿ–ում նաև քաղաքական թիմ կա, միգուցե քաղաքական թիմը նոր վարք որդեգրի»:

 

Այդուհանդերձ, նա կարևորեց երկու ուժերի հետևյալ դիրքավորումը. «Ես ցանկանում եմ, որ ԲՀԿ–ն և ԼՀԿ–ն կարողանան ԱԺ–ում ավելի ակտիվ, համարձակ հակակշռել «Իմ քայլը» դաշինքին. «Իմ քայլի» ցուցակում քաղաքականացված լիդեր հատվածի մեծամասնությունը գնալու է կառավարություն, և կայացած գործիչների իմաստով իրենք շատ աղքատ են: Մատների վրա կարելի է հաշվել մի քանի հոգու և վերջ: Այդ պատճառով ԱԺ–ում մրցակցային լուրջ դաշտ ձևավորելու համար կարևորում եմ և անհրաժեշտ համարում ԲՀԿ–ի և ԼՀԿ–ի ակտիվ, համարձակ, անկաշկանդ դիրքորոշումները, բանավեճ ստեղծելը: Նիկոլ Փաշինյանն ինչ որոշում ընդունի, ԱԺ–ում իր քաղաքական հեղինակության հաշվին պատգամավոր դարձած և քաղաքական դաշտում ոչ պրոֆեսիոնալ երիտասարդները հաստատելու են: Բայց ԱԺ–ն այլ կոչում ունի, հաշվի առնելով նաև այն, որ մեզ մոտ դեռ կառավարման խորհրդարանական համակարգն է: ԱԺ–ն այլ դերակատարում պետք է ստանձնի և պետք է կառավարությանը հակակշռել: Բայց այս ԱԺ–ն այդ իմաստով շատ մեծ ռիսկեր ունի և նշված տեսանկյունից շատ թույլ դիրքերում կլինի:

 

Մտավախություն կա, որ 70 տոկոսը միայնակ կարող է ցանկացած որոշում ընդունել»:

 

Վարդան Թունյանը վերոնշյալ իրավիճակի համատեքստում կարևորում է հատկապես արտախորհրդարանական ուժերին: Նա ընդգծեց, որ մի շարք ուժերի մեծ դաշինք ձևավորելու առաջարկ են արել: 

 

«Առաջարկեցինք դաշինք ձևավորել, որ այդպիսով փորձենք մեզ վրա կենտրոնացնել ուշադրությունը և, որպես ընդդիմություն, հետագայում հանդես գանք խորհրդարանում. որ ոչ թե ՀՀԿ–ն դառնա Ն. Փաշինյանի միակ օպոնենտը, այլ մեր կողմից առաջարկ ստացած ուժերը»,–ասաց նա՝ ընդգծելով, որ քչերն արձագանքեցին առաջարկին:

 

Հիմա նույն առաջարկը կանեն՝ արդեն արտախորհրդարանական հզոր կենտրոն ստեղծելու և ակտիվ գործունեություն ծավալելու համար: Կփորձեն ներգրավել այն քաղաքական ուժերին, որոնք ասելիք ունեն ու դրանով Հայաստանի քաղաքական կյանքում կարող են ներդրում ունենալ:

 

«Կարևորում եմ արտախորհրդարանական ուժերի՝ ԱԺ–ին առողջ, կոնստրուկտիվ առաջարկներ ներկայացնելու անհրաժեշտությունը: Իրենց շնչառությունը միշտ պետք է զգա խորհրդարանը»,–ասաց նա՝ ընդգծելով, որ այդ հարթակը կենդանի կպահի նաև կուսակցություններին, և իրենք էլ խիստ ռեալիզացված կլինեն քաղաքական դաշտում:

 

«Արտախորհրդարանական հարթակը հուշելու է, օգնելու է և իրենց միշտ սթափ է պահելու, որ չափի զգացողությունը չկորցնեն, և չմտածեն, թե հաղթելով ՀՀԿ–ին՝ բացառիկ են, անկրկնելի ու անսխալական: Ընդհանրապես ժողովուրդը քաղաքականության մեջ որևիցե մեկին մշտապես չի սիրում: Սիրում է ինչ–որ մեկին՝ համեմատած ինչ–որ մեկի հետ»,–ասաց նա՝ այս պարագայում ընդգծելով ՀՀԿ–ի հանգամանքը, որը և Ն. Փաշինյանին ձայն տալու գործոն դարձավ

 

«Իսկ եթե ՀՀԿ–ն չլինի, և երբ այլ ուժեր հայտ կներկայացնեն, կամ որոշ քնած ուժեր նորից կզարթնեն, այդ ժամանակ միայն կձևավորվի հայկական քաղաքական դաշտի իրական խճանկարը»,–եզրափակեց նա: