2018-ն ինձ տվեց պայքարի ընկերներ, որոնք ինձ խրամատում մենակ չթողեցին. Է. Շարմազանով (լուսանկարներ)

2018 թվականն իր տեղը զիջեց 2019 թվականին:  ArmDay.am-ը զրուցել է քաղաքական գործիչների հետ,պարզելու, թե որտեղ են նրանք դիմավորել տարվա գլխավոր տոնը ևարդյո՞ք քաղաքական գործիչները շարքային քաղաքացիների նման Ամանորը դիմավորել են ընտանիքի անդամների հետ`տանը:   Աժ փոխնախագահ Է. Շարմազանովի  հետ  բլից հարցումը ներկայացնում ենք ստորև.

Սիրու՞մ եք Ամանորը և ինչու՞:

-Այո, սիրում եմ Ամանորը, քանի որ այն ընտանեկան տոն է: Մանկության ջերմ հիշողությունները հենց Ամանորի հետ են կապված:

-Որտե՞ղ անցկացրիք  Ամանորը:

-Ինչպես միշտ, մեծ ընտանիքիս հետ: Մայրիկս, եղբորս ընտանիքը և իմ փոքր ընտանիքը միասին Լոռիում միասին նշեցինք Նոր տարին: Այդ ավանդույթը  հորից է մնացել:

-Ի՞նչ եք անում 12-ը զարկելուց 10 րոպե առաջ:

-10-ից նստում ենք սեղան և ճանապարհում հին տարուն, շնորհակալություն հայտնում  Տիրոջը մեզ  պարգևած օրերի համար:

-Ո՞րն է նոր տարվա գլխավոր խորհրդանիշը Ձեզ համար:

-Գլխավոր խորհրդանիշը նոր սկիզբը, նոր հույսերն ու  հնարավորություններն են:

-Ամանորի սեղանի ամենասիրելի ուտեստը:

-Մամայիս պատրաստած տոլման, որն առաջինն  եմ համտեսում:

-Ամենասիրելի պահը Ամանորի հետ կապված:

-Երբ ուղիղ 12-ին բաժակները խփում ենք, և երեխաները փոքրիկ ներկայացումով շնորհավորում են մեզ:

-Ի՞նչ եք պարտադիր դնում Ձեր սեղանին:

Սեղանին դնում ենք այն, ինչ ընդունված է. Մերոնք  անիմաստ շքեղություն չեն սիրում:

-Տոների ընթացքում հետեւո՞ւմ եք Ձեր քաշին:

-Դժվար է հետևել քաշին այդ օրերին, բայց ես միշտ  լավ մարզավիճակում եմ. երևի ջահել օրերից է մնացել:

-Ի՞նչ եք տանում Ձեզ հետ Ամանորին որեւէ մեկի տուն այցելելիս:

-Ամանորին գրեթե տանից դուրս չեմ գալիս: Ավելի շատ, սիրում եմ հյուր ընդունել,բայց եթե գնում եմ, պահում եմ ավանդույթներն ու կանանց ծաղիկներ ու նաև քաղցր ու խմիչք եմ վերցնում: Իսկ եթե լուրջ,՝ նախ դրական ցանկություններ եմ տանում այն օջախ, ուր գնում եմ:

-Ամենաուրախ ու ամենատխուր Ամանորը, որը ունեցել եք։

Ամենաուրախ Նոր տարին նշեցինք, երբ ծնվեց աղջիկս՝ Նարեն, ու տունս լցվեց  նրա իմաստուն ներկայությամբ: Ամենատխուր Ամանորը 1993 թվականին էր, երբ առաջին անգամ առանց պապայի էինք դիմավորում Նոր տարին:

-Ամանորյա հայկական ավանդույթներից ո՞րն եք ամենաշատը սիրում եւ որը՝ամենաքիչը։

-Ամանորյա բոլոր ավանդույթները սիրում եմ:Դրանք ինձ մոտ միայն մանկական լավ հիշողություններ են առաջացնում:

-Ձմեռ պապ գոյություն ունի՞:

-Իհարկե  գոյություն ունի:

-Վերջին անգամ ձնեմարդ ե՞րբ եք պատրաստել:

-Անցյալ տարի տղայիս հետ մեր շենքի բակում ենք ձնեմարդ պատրաստել:

-2019-ի Ձեր երազանքը:

-Իմ երազանքներն օրիգինալ չեն. նորմալ, մարդկային: Ինչպես կասեր Պատկանյանը՝ Երնեք թե այս  Նոր տարին, վերջ տար հայի ցավերին, չարը կորչի, ու բարին բուն դնի մեր սրտերին:

-Ամանորի մասին Ձեր ամենասիրելի ֆիլմը:

«Բաղնիքդ անուշ», «Ճակատագրի հեգնանքը»

-Ո՞ր գույնը կասոսցացնեք Ամանորի հետ:

-Սպիտակ -ձյուն, մաքրություն, նոր սկիզբ:

-Ե՞րբ եք վերջին անգամ սրտանց ուրախացել:

-Երեխաներիս հետ տոնածառը զարդարելիս:

-Ամենազավեշտալի իրավիճակը, որում հայտնվել եք Ամանորին:

-Ամանորն ինքին զավեշտալի իրադարձություններով լի է,բայց մի բան հստակ է. ես երբեք այնքան չեմ խմել, որ հայտնվեմ «Բաղնիքդ անուշ»-ի հերոսի դերում:

-Ի՞նչ էիք ցանկացել  2018-ից եւ ի՞նչ տվեց այն Ձեզ։

-2018 -ը բարդ, անհասկանալի տարի էր: Կարևորը ՝ հարազատներս, ընկերներս առողջ են: Տվեց պայքարի ընկերներ, որոքն ինձ խրամատում մենակ չթողեցին: Մենք այլևս ճակատագրով կապված ենք:

-Ի՞նչ թողեց Ձեզ անցնող տարին:

-Անցնող տարին ինձ թողեց հակասական զգացողություններ. և հպարտություն և հիասթափություն:

-2018 թվականին Ձեր թերացումը:

-Թերացումներն անպակաս են մարդկանցից: Սկսեցի  ծխել, սակայն երկու շաբաթ է, արդեն թողել եմ ծխելը:

-Կա՞ ինչ-որ  բան, որի համար ափսոսում եք:

-Անիմաստ է ափսոսել: Ես հետ նայող չեմ, հակավոր է առաջ նայել և շարժվել առաջ:

-Թեմա, որի շուրջ ժամերով կխոսեք տարվա բոլոր օրերին:

-Ֆուտբոլ, գրքեր, երաժշտություն:

-Քաղաքականությունը...

-Չէ, ինչ քաղաքականություն..

-Կինը քաղաքականության մեջ....

-Առանց կանանց այդ ամենը տխուր է:

-Ո՞վ է հայ քաղաքական դաշտի Ձմեռ պապը:

-Ձյունանուշին հարցրեք:

-Տարվա իրադարձությունն ըստ Ձեզ:

-Հայաստանի ֆուտբոլի հավաքականի  խոշոր հաղթանակը Մակեդոնիայի նկատմամբ. (հումոր)

- Տարվա մարդը:

-Բոլորը կասեն Նիկոլ, ես կասեմ՝ Սերժ Սարգսյան, մարդ, ով երկիրը չտարավ առճակատման և ցնցումների: հետո պատմությունը կգնահատի այդ քայլը:

-Տարվա բառը:

-Շատերը կասեն դուխով, ես կասեմ՝ խելքով:

- Ի՞նչ կմաղթեք հայ ազգին գալիք տարվա համար:

-Իրական սեր ու համերաշխություն: Հավատ առ Աստված և սեփական ուժերին: Չկասկածե՛ք՝ Հայկը հաղթելու է Բելին: