Ինչպե՞ս ազատվել տոներին հաջորդող դեպրեսայից. հոգեբան Միհրդատ Մադաթյանի խորհուրդները

Ամանորի ու Սուրբ ծննդյան տոներից հետո շատերի համար առօրյա կյանքին վերադառնալու անցումային փուլն իսկական փորձություն է դառնում: Հոգեբան Միհրդատ Մաթադյանը Past.am-ի հետ զրույցում խոսել է հետտոնական սթրեսի հետևանքների մասին ու կիսվել մի քանի կարևոր խորհուրդներով:

«Ուզենք, թե՝ ոչ, Ամանորյա տոներն իրենց հետ բերում են դեպրեսային իրավիճակ: Դրա հետևանքով մենք դժվարությամբ ենք գնում աշխատանքի: Մենք բավականին երկար ժամանակահատված ենք տանը մնում, և ստացվում է նույն իրավիճակը, ինչպիսին ամառային արձակուրդներից հետո է: Եթե դրան էլ գումարենք գաստրոնոմիական խրախճանքների ու ալկոհոլի հանգամանքը, որոնք նույնպես դեպրեսոգեն են, կարող ենք եզրակացնել, որ մի փոքր դժվար կլինի աշխատանքի գնալը: Ընդհանուր առմամբ, կարծում եմ, որ եթե ամանորյա տոները մի փոքր ավելի կարճ տևեին, օրինակ՝ ոչ թե 10-12, այլ 3-4 օր, միգուցե շատ ավելի հեշտ կլիներ: Բայց, ամեն դեպքում, ուզենք, թե չուզենք, պետք է անցնենք ադապտացիոն շրջանը»,-մեզ հետ զրույցում ասաց հոգեբանը:

Նա առաջին հերթին կարևորեց այն հանգամանքը, թե ինչպես են մարդիկ վերաբերում իրենց աշխատանքին:

«Այն մարդիկ, որոնք սիրում են իրենց աշխատանքը և ձգտումով են գնում աշխատանքի, իրենց համար սթրեսային իրավիճակներից դուրս գալն ու ադապտացվելը շատ ավելի հեշտ է լինում: Իսկ այն մարդիկ, որոնք դժվարությամբ են գնում աշխատանքի, իրենց համար շատ ավելի դժվար կլինի այդ ամենը: Երկրորդ հանգամանքը սննդակարգն է: Բնականաբար, լավ կլինի, որ այս շրջանում մեր սննդակարգը փոխենք, այդ առումով ավելի դիետիկ և պասիվ իրավիճակ լինի: Բացի այդ, դրական ազդեցություն կունենա այն, որ աշխատանքային առաջին օրերը լինեն ոչ թե շատ ծանրաբեռնված, այլ ավելի շատ ուղղված լինեն առաջիկա ամիսների,  տարվա պլանավորմանը: Ցանկալի է, որ ոչ լրիվ աշխատանքային օր լինի»,-ասաց Մ. Մադաթյանը:

Բացի այդ, հոգեբանը նշում է նաև քնել ռեժիմի փոփոխության հանգամանքը. «Ամանորյա տոներին մի փոքր ուշ ենք քնում և ուշ արթնանում,  բայց պետք է մտնենք սովորական ռեժիմի մեջ: Իհարկե, այս ամենի համատեքստում ցուցված է նաև սպորտը, մանավանդ ձմեռը, երբ ունենում ենք մի փոքր դեպրեսիվ վիճակ: Հատկապես լողը դեպրեսիայից դուրս գալու լավագույն միջոցներից մեկն է: Ընդհանուր առմամբ, ամեն ինչ կախված է մարդու ներքին ճկունությունից և նրանից, թե որքանո՞վ է սիրում իր գործը: Եթե այս պարամետրերը կան, ապա Ամանորյա շրջանից դեպի առօրյայի անցումը շատ ավելի հեշտ կլինի»:

 

Հոգեբանը նկատեց՝ մարդիկ սպասումներ են ունենում նոր տարուց, ինչ-որ բաներ են պլանավորում. «Մեծ հաշվով՝ այդ ամենը պետք է մեզ ավելի մոտիվացնի դեպի աշխատանքը»:

Աննա Բադալյան