«Հայաստանին գազ մատակարող ընկերությունը հանցավոր, մեծ չափի փողերի լվացման և կաշառակերության ճանապարհով է գնացել»

Ընդամենը մի քանի ամիս առաջ, երբ էներգետիկ փորձագետ Էդուարդ Արզումանյանը հայտարարեց, որ գազի սակագինը կարելի է նվազեցնել 10 %-ով, իսկ էլեկտրաէներգիայինը՝ 10 դրամով, շատերը հայտարարությանը բավականին վերապահորեն ընդունեցին: Եվ չնայած փորձագետը տարբեր առիթներով մանրամասն ներկայացրել է, թե ինչ եղանակներով է հնարավոր դա իրականություն դարձնել, սակայն այդպես էլ հարցը մնաց օդում կախված:

Տարեվերջի դրությամբ գազի սակագնի հարցը, սակայն, դարձավ երկու երկրների կառավարությունների առաջին դեմքերի քննարկման թեմա, իսկ Ամանորից առաջ վարչապետի պաշտոնատար Նիկոլ Փաշինյանը հայտարարեց , որ թեև «Գազպրոմը» Հայաստան մատակարարվող գազի սակագինը սահմանին բարձրացրել է 15 դոլարով, սակայն սպառողներն այդ թանկացումն իրենց վրա չեն զգա:

Արդյո՞ք սա լրացուցիչ խնդիրներ չի առաջացնի և հետագայում չի պարզվի, որ այս անգամ էլ նախորդների նման երկիրը բավականին պարտք է կուտակել և պարտքը փակելու համար հերթական անգամ ստիպված է լինելու գույքով հատուցել:

Past.am-ի հետ զրույցում Է. Արզումանյանն ասաց, որ դեռևս տարիներ առաջ Հայաստանին գազ մատակարող ընկերությունը սխալ, հանցավոր, մեծ չափի փողերի լվացման և կաշառակերության ճանապարհով է գնացել, երբ կառավարության հետ կնքված պայմանագրում գազի սակագինը կապել է գազի կալորիականության ամենացածր ցուցանիշի հետ:

«Նման սխալ քայլի պատճառով պարտք է գոյացել, որը փակելու համար «Գազպրոմը» վերցրել է Հայաստանին պատկանող վերջին 20 % մասնաբաժինը: Այսինքն, այն վերջին մասնաբաժինը, որը Հայաստանը սեփականության իրավունքով ուներ, տեխնիկապես սխալ հիմնավորումների պատճառով պարտքի առաջացման պատճառ է դարձել: Եվ, այսպես ասած՝գոյացած պարտքը փակելու համար Հայաստանի իշխանությունները 20 % մասնաբաժինը զիջել են «Գազպրոմին»: Եվ դա եղել է տեխնիկապես սխալ չափորոշիչների վրա հիմնված հանցավոր համաձայնության հետևանք, որով, իմ կարծիքով պետք է զբաղվեն իրավապահ մարմինները»,- ասաց Է. Արզումանյանը:

Խոսելով գազի սակագինը ուղիղ 15 դոլարով թանկացնելու մասին՝ փորձագետը նշեց, որ դա համապատասխանում է իրենց այն պնդումներին, որ սպառողների համար գազի սակագինը հնարավոր է 10%-ով իջեցնել: Ատացվում է, որ գազի սակագինը սահմանին թանկացրել են 10 %-ով, ինչը  համապատասխանում է փորձագետների ավելի վաղ բերված փաստարկներին:

«Տեսնելով, որ կարող է մեր փորձագիտական խումբը պնդել և ապացուցել, որ սպառողների համար գազի սակագինը 10 %-ով հնարավոր է իջեցնել կորուստները նվազեցնելու, սխալ ներդրումները կրճատելու ճանապարհով գնալու դեպքում, ռուսական կողմը շտապել է նույն չափով գազի սակագինը սահմանին բարձրացրել, որպեսզի իր շահույթը մնա նույնը»,- ասաց Է. Արզումանյանը:  

Արմինե Գրիգորյան