Իրանցի գիտնականների սպանությունների մեջ անմիջականորեն կապված է Ադրբեջանը

rossaprimavera.ru-ն «Ինչպես ադրբեջանական ԶԼՄ-ները նեղացան Կուրղինյանից» հոդվածում գրում է, որ իրավիճակը, երբ ոմանք ամենուրեք տեսնում են «համաշխարհային հայությանն» ու նրանց «դավադրությունները», շատ տարօրինակ հոգեբանություն է: Ամբողջ կյանքում ընտանիքով Ռուսաստանում ապրած և ամբողջ կյանքում Ռուսաստանի շահերը պաշտպանած մարդու նկատմամբ ինչ-որ էթնիկ արմատներ և դրա հիմքով արված գործողություններ փնտրելն ուղղակի ապուշություն ու լպիշություն է: Ադրբեջանական 1news.az կայքը «Գորբաչովի նախկին խորհրդական Կուրղինյանը որոշել է գժտեցնել Բաքվին Թեհրանի հետ» ճչացող վերնագրով հոդված էր հրապարակել: Սա պատասխան մեկնաբանությունն էր ավելի վաղ «Կարմիր գարուն» տեղեկատվական կայքում (հիմնադիրը Սերգեյ Կուրղինյանն է) ներկայացված լուրին: Իսկ լուրն այն էր , որ Իրանի նախագահ Հասան Ռուհանին այցելել է «Մունաֆեգին» ահաբեկչական կազմակերպության կողմից սպանված հայ ֆիդայի Ալֆրեդ Գաբիի ընտանիքին: Արժե նշել, որ իրանական ղեկավարության կողմից Իրանի համար զոհված հայերի ընտանիքներին նմանատիպ այցեր կատարելը առաջին անգամ չէ, սա ավանդույթի բնույթ ունի: Այստեղ պետք է նշել, որ այս լուրի մեկնաբանությունը ադրբեջանական կայքի կողմից անիմաստ է և չունի որևէ հիմնավոր պատճառ, բայց այն հուզականությունը, որը առաջացրել է լուրը ՝ «ահավոր հայերը փչացնում են մեր հրաշալի հարաբերությունները Իրանի հետ», հիմք է տալիս ենթադրել այլ բաներ: Մասնավորապես, որ Իրանի հետ Ադրբեջանի այդ հարաբերությունները այնքան էլ հարթ ու սահուն չեն, և որ դրանում հայերը չեն մեղավոր: Ադրբեջանական կայքը իր հոդվածում նշված այս լուրը համարել է սուտ, բացի այդ, հոդվածում տեղ են գտել մի շարք վարկաբեկիչ արտահայտություններ Կուրղինյանի և «Կարմիր գարուն» տեղեկատվական կայքի նկատմամբ: Ինչպես հիմարություն է «համաշխարհային հայության դավադրություններ» փնտրելը, այնքան էլ հիմարություն է Կուրղինյանին մեղադրել լեռնայինղարաբաղյան հակամարտության սանձազերծման և անգամ ԽՍՀՄ-ի կազմաքանդման մեջ: Արձահանագրել Կուրղինյանի կողմից որևէ կողմնակալ վերաբերմունք ղարաբաղյան հարցի նկատմամբ, անհնար է, նրա մոտ միշտ առաջնահերթ է ռուսական շահը: Նրա դիրքորոշումը այս հարցով միանշանակ է՝ միջազգային բանակցությունների գլխավոր սուբյեկտը պետք է լինի միայն Ղարաբաղի ժողովուրդը: Ինչ վերաբերում է 1news.az կայքում տեղ գտած ադրբեջանա-իրանական հարաբերությունների մեկնաբանությանը ասենք, որ այն միտքը, որ Ադրբեջանի անունը չի շոշափվում 2010-2012 թվականներին իրանական ատոմային ֆիզիկոսների սպանության գործերում, սխալ է: Իրանի արտգործնախարարությունը 2012 թվականի փետրվարի 12-ին մեղադրել է Ադրբեջանին Իսրայելի հետախուզությանը աջակցելու և գիտնական Մոստաֆի Ահմադի-Ռոշանի սպանության մեջ: Ընդ որում, որոշ փորձագետների կարծիքով, այս ամենը կազմակերպել էր ԱՄՆ-ը: Հիշեցնենք նաև, որ նեյրոֆիզիկ Մասուդ Ալի Մոհամմադի սպանության մեջ մեղադրվող կիկբոքսինգի Իրանի չեմպիոն Ջամալի Ֆիշին հարցաքննություններում ցուցմունք էր տվել, որ հավաքագրվել է իսրայելական «Մոսսադի» կողմից և պարբերաբար մեկնել է Թաիլանդ և Ադրբեջան, որտեղ սովորել է աշխատել պայթուցիկ նյութերի հետ: Ստացվում է, որ իրանցի գիտնականների սպանությունների մեջ անմիջականորեն կապված է Ադրբեջանը: Ավելին, 2012 թվականին ադրբեջանական ANS հեռուստաընկերությունը ցուցադրել է հարցազրույց «Մունաֆեգին» ահաբեկչական կազմակերպության երկու անդամների ՝ Շոկրոլլախ Մոտախեմիի և Համիդա Խարազիի հետ, որտեղ նրանք հայտարարել են, որ ներկայումս արդեն 9 տարի է՝ իրենք իրենց «ադրբեջանցի ընկերների» շնորհիվ ապրում են Ադրբեջանում: Նույն տարում Եվրասիական հետազոտական կենտրոնը հայտարարել է, որ Ադրբեջանի և Իսրայելի միջև կնքված՝ ռազմական ոլորտում համագործակցության պայմանագրի համաձայն, քննարկվում է «Մունաֆեգին» ահաբեկչական կազմակերպության որոշ անդամների տեղափոխությունը Ադրբեջան: Ըստ վերլուծաբանների, այս թեմայի սրությունը չի կարող չառաջացնել անհանգստություն և լարվածություն Թեհրանի և Բաքվի հարաբերություններում: Վերլուծաբանները նաև կարծիք են արտահայտել, որ Ադրբեջանը պետք է հասկանա այս թեմայի սրությունը Իրանի համար և խուսափի իր տեղեկատվական քաղաքականությունում երկիմաստ մտքեր արտահայտելուց, մասնավորապես Հայաստանի և Ռուսաստանի մեդիա և քաղաքական դաշտին Իրանի հետ Ադրբեջանի հարաբերությունները փչացնելու մեջ մեղադրելուց: Հույս ունենք, որ այս խորհուրդը կլսվի և համապատասխան կառույցների կողմից կառաջարկվի ադրբեջանական ԶԼՄ-ներին որպես ցուցում:

Կամո Խաչիկյան