«Հույս ունեմ, որ օպտիմալացումից հետո ճիշտ մարդիկ կզբաղվեն մշակույթի հարցով»

Ինչպես երկիրը, այնպես էլ՝ թատրոնը: Համազգային թատրոնի տնօրենի ժամանակավոր պաշտոնակատար, դերասան Արման Նավասարդյանը, իշխանափոխությունից հետո երկրում իրավիճակի, սպասելիքների ու ակնկալվող փոփոխությունների մասին խոսելով, համեմատական է անցկացնում թատրոնի հետ, Համազգային թատրոնի, որտեղ դերասանների բողոքի արդյունքում ևս «իշխանափոխություն» եղավ: 

«Առհասարակ ոչինչ մեկ կամ երկու օրում չի լինում: Հույսերը մեծ են, որ ամեն ինչ լավ կլինի: Չեմ կարծում, որ շատ արագ շատ փոփոխություններ կլինեն: Մենք էլ թատրոնում փոփոխություն արեցինք: Այստեղ ևս մեկ կամ երկու օրում շատ բան հնարավոր չէ անել: Ինչ–որ անում ենք, անում ենք ժամանակի հետ: Մեկ օրում՝ մի բան, մյուս օրը՝ հաջորդը: Այնպես որ, հուսով եմ, որ նկատելի, շոշափելի փոփոխություններ ապագայում կլինեն»,–մեզ հետ զրույցում ասաց Ա. Նավասարդյանը:

Օպտիմալացման արդյունքում նախնական տարբերակով միավորվելու են մշակույթի, սպորտի ու երիտասարդության նախարարությունները, որոնք պետք է հանդես գան ոչ թե առանձին գերատեսչություններ, այլ իրենց հերթին միավորվեն կրթության և գիտության նախարարության հետ: Կառավարության՝ օպտիմալացման նախագծի շուրջ դերասանն իր մոտեցումն ունի:

«Սա ևս ժամանակի հետ կապված հարց է: Առհասարակ, ցանկացած փոփոխության դեպքում պետք է ապացուցվի, որ այդպես ավելի ճիշտ է: Չի բացառվում, որ լինեն սխալներ, վրիպումներ, բայց հույս ունենք, որ լավ կլինի: Ովքեր մշակում են նախագիծը, երևի թե ավելի լավ են ուսումնասիրել հարցը, քան մենք: Իսկ առհասարակ մշակույթի նախարարը (նոր տարբերակով՝ մշակույթի գծով փոխնախարարը) նախևառաջ մշակույթի գծով մենեջեր պետք է լինի: Իհարկե, մշակույթի նախարարությունը չէ, որ ստեղծում է մշակույթը: Մշակույթը ստեղծում են այն մարդիկ, որոնք զբաղվում են մշակույթով: Ես հույս ունեմ, որ օպտիմալացումից հետո ճիշտ մարդիկ կզբաղվեն մշակույթի հարցով և կարդարացնեն մեր բոլոր սպասելիքները»,–նշեց նա:

Անդրադառնալով թատրոններին՝ Արման Նավասարդյանը շեշտեց, որ այս ոլորտում շատ խնդիրներ կան: «Իհարկե, ՊՈԱԿ–ների մասին օրենքը բոլորի համար նույն կերպ է գործում, բայց թատրոնը շատ սպեցիֆիկ ՊՈԱԿ է: Եվ կարծում եմ, երբ վերջապես մշակվի ու ընդունվի թատրոնի մասին օրենքը, այս հարցերն այլևս չեն լինի: Կան շատ բացթողումներ, որոնց պետք է անպայման անդրադառնալ: Թատրոնը չի կարող աշխատել մեկ ուրիշ ՊՈԱԿ–ի վրա տարածվող նույն օրենքով: Շատ ու շատ հարցեր կան, կան նաև ներքին հարցեր: Այս ամենի համար հատուկ օրենք է պետք մշակել ու հաշվի առնել թատրոնով զբաղվող անձանց, ՊՈԱԿ հանդիսացող թատրոնների տնօրենների կարծիքներն ու դիտարկումները: Օրենք մշակողները պետք է հասկանան, թե որո՞նք են թատրոնների խնդիրները և ի՞նչ լուծումներ են պահանջվում: Թատրոնի համար չի կարելի կամայական օրենք ընդունել»,–ասաց նա:

Ինչ վերաբերում է դերասաններին, Արման Նավասարդյանն ընդգծեց, որ դերասանն, առհասարակ, շատ նուրբ, փխրուն մարդ է:

«Երեխայի պես է: Դերասանին պետք է լավ վերաբերմունք, պետք է ոգևորող ինչ–որ բան: Կլինի աշխատավարձ, կոչում, խրախուսական ինչ–որ բան, մեկ է՝ դերասանը շատ փոքր բանից կարող է ոգևորվել: Ընդամենը վերաբերմունք, և ոչ միայն դերասանի նկատմամբ, այլև այն մարդկանց, որոնք բեմում չեն երևում: Շատ աշխատակիցների հանդիսատեսը չի տեսնում, բայց նրանք ավելի շատ են, քան դերասանները»,–նշեց մեր զրուցակիցը:

Արման Նավասարդյանի դիտարկմամբ, այդուհանդերձ, թատրոնի հանդեպ հանդիսատեսի հետաքրքրությունը կտրուկ աճել է:

«Վերհիշելով անցած տարիները՝ կարող եմ ասել, որ 15 տարի առաջ այլ էր, 20 տարի առաջ՝ նույնպես: Ինչու չէ, նաև գովազդների շնորհիվ հիմա հանդիսատեսը սկսել է ավելի հաճախ թատրոն գալ: Առհասարակ մեզ մոտ խնդիրները շատ են. տնտեսության, բանակի հարց կա, մշակույթը մի քիչ երկրորդ պլան է մղվել, բայց այդ ամենի մեջ, այնուամենայնիվ, պետք է տեղ գտնել մշակույթի համար: Մենք առաջին հերթին մշակույթով ենք ներկայանում աշխարհին, և այդ վերաբերմունքը պետք է լինի նաև պետության կողմից: Ամեն ինչ լավ կլինի, պարզապես ժամանակի հարց է, համբերությամբ զինվենք, և ամեն ինչ կընկնի իր տեղը: Ես հույս ունեմ, որ շատ մոտ ապագայում՝ 2023 թվականին, մենք ունենալու ենք մեր երազած հայրենիքը»,– նշեց դերասանը:

 

ԱՆՆԱ ԲԱԴԱԼՅԱՆ