«Մեր եկեղեցու դեմ աղմուկ բարձրացնողները դեմ են նաև բարոյական արժեքներին ու օրենքներին»

Վերջին շրջանում Հայ Առաքելական եկեղեցուն վերաբերող տարատեսակ դիպվածներ են տեղի ունենում, որը լրացուցիչ լարվածություն է առաջացնում հասարակության շրջանում: Հարցը բավականին նուրբ ու զգայուն է և սովորական կենցաղային հոգսերով ապրող մարդու համար այդքան էլ հասկանալի չէ, թե իրականում ինչու են աղմկում փոքրամասնություն համարվող առանձին խմբերի ներկայացուցիչները:

Հոգևոր և աշխարհիկ արժեքներին բավականին մոտիկից ծանոթ, հասարակական գործիչ Խաչիկ Ստամբոլցյանը «Փաստի» հետ զրույցում անդրադառնալով Հայ Առաքելական եկեղեցու սպասավորների դեմ երբեմն-երբեմն կազմակերպվող տարբեր ակցիաներին, նշեց, որ նման մարդիկ պատվեր են կատարում: «Ամբողջ խնդիրն այն է, որ տարբեր ֆոնդեր գումարներ են ծախսում մարդկության բարոյական արժեքները քայքայելու համար: Մեր եկեղեցու դեմ աղմուկ բարձրացնողները դեմ են նաև բարոյական արժեքներին ու օրենքներին: Նրանք դեմ են մարդկությանը, քանի որ մարդկության հարատևման հիմքում բարոյականության համակարգեր են դրված: Եվ եթե բարոյականությունը վերանա, կվերանա նաև ընտանիքը: Եվ այդ ժողովուրդը չի պատկերացնում, թե դա իր մեջ ինչ վտանգներ է պարունակում»,ասաց Խ. Ստամբոլցյանը: 

Նա նշեց, որ հասարակության մեջ էլ կան մարդիկ, ովքեր պայքարում են տարատեսակ շեղումների ու դրանց տարածողների դեմ: Չնայած դրան, արտաքին ուժերի ազդեցության շնորհիվ մեր երկրում ձևավորվում են տարբեր խմբեր, որոնք առիթը բաց չեն թողնում իրենց մտքերը տարածելու և ներկայացնելու համար: Խ. Ստամբոլցյանը թեև դեմ չէ, որ մարդիկ իրենց բողոքի ձայնը հնչեցնեն եկեղեցու մասին, բայց դեմ է այս թեմայով փողոցային ակցիաներին: Նա կարծում է, որ ամեն ինչ պետք է օրենքի շրջանակներում իրականացնել:

«Կաթողիկոսին փոխելու ձև կա, բայց սորոսականներին ու աղանդավորներին ձեռնտու է, որ խառնաշփոթ իրավիճակ լինի: Վաղը մյուս օրն էլ կպահանջեն, որ քահանայապետը կին լինի կամ էլ այլ բաներ կպահանջեն: Բայց այդպես չի: Քաոսի մեջ չընկնելու համար պետք է ճանաչել Քրիստոսին: Ինչի՞ Սոդոմ-Գոմոր եղավ: Որովհետև միասեռականներ էին: Եվ այդ ամենն իմանալով՝ մենք պետք է Աստծո օրենքներով ապրենք: Այս տարի Կաթողիկոսը հայտարարել է ընտանիքի տարի, և դա միասեռականության դեմ ուղղված ակցիա է: Ովքեր եկեղեցի են հաճախում, հավատացյալ են, նրանք վախենալու բան չունեն: Իսկ ով անառակ է, պետք չէ նրանց քարկոծել, քանի որ նրանք չեն պատկերացնում, թե ինչ են մյուսներն անում: Աղանդավորները նույնպես վտանգավոր են, քանի որ բոլոր աղանդների սկիզբը մասոնականությունն է: Բոլոր աղանդների ղեկավարները մասոնական փողերով են մարդկանց խաբում»,- ասաց Խ. Ստամբոլցյանը:

Հարցին, թե արդյո՞ք աղանդավոր բառը վիրավորական է, նա ասաց, որ դա ընդամենը բառ է, որը նկարագրում է երևույթը:

«Ինչո՞ւ են ասում աղանդ, այսինքն՝ ծուռ քայլող մեկը, ճիշտ ճանապարհից շեղված գաղափար: Այսինքն, աղանդավոր բառը նորմալ բառ է: Ի դեպ, բացի աղանդավոր բառից ունենք նաև հերձվածող բառը: Քրիստոնեական այլ ուղղություն դավանողներին ասում են հերձվածողներ, այսինքն, ամբողջականից կիսված, կտրվածներ: Իսկ աղանդավորները նրանք են, ովքեր կապիկ են պաշտում, կով են պաշտում, օձ են պաշտում, երկնային առարկաներն են պաշտում, մոլորակներ և այլն: Այսինքն, դա ոչ վիրավորական բառ է, ոչ էլ մեր հորինածը: Դա նույնն է, որ անառակ մարդուն ասես անառակ: Դա ընդամենը բնութագրող ձև է»,- ասաց Խ. Ստամբոլցյանը:

Նա նաև մարդկանց խնդրեց, որ ավելի մոտիկից ճանաչեն Աստծուն և հասկանան, որ մարդիկ էվոլ յուցիոն ճանապարհով կապիկից չեն առաջացել: «Էվոլ յուցիա գոյություն չունի, կա ճարտարապետություն: Եվ փրկությունն այս ճանաչողության մեջ է: Մարդկությունը պետք է հասկանա, որ այսքան բարդ կառուցվածք ունեցող մարդն իր ճարտարապետն ունի: Երբ դա հասկանան, որ իրենք ստեղծագործության արդյունք են, կհասկանան նաև, որ այն օրենքներով պետք է ապրեն, որով մեր բոլորի ճարտարապետը ստեղծել է մարդուն»,- ասաց Խ. Ստամբոլցյանը:

 

ԱՐՄԻՆԵ ԳՐԻԳՈՐՅԱՆ