«Մեզ ֆի­նան­սա­կան աջակ­ցու­թյուն պետք չի, թող մեր տղա­նե­րին հի­շեն»

Կառավարությունը մարտի 21-ին հավանություն տվեց «Տոների և հիշատակի օրերի մասին» ՀՀ օրենքում լրացում կատարելու մասին» ՀՀ օրենքի նախագծի վերաբերյալ օրենսդրական նախաձեռնությանը, որով առաջարկվում է ապրիլի վերջին շաբաթ օրը նշել որպես Հայաստանի Հանրապետության քաղաքացու օր:

Նախաձեռնությունը ոչ բոլորն են միանշանակ ընդունել: Շատերն ընդգծում են, որ անցած տարվա ապրիլ-մայիսին Հայաստանում տեղի ունեցած հեղափոխությունն իր առանցքային և ամենակարևոր նպատակները չի իրագործել, մյուսներն էլ՝ թե կարևոր է օրացույցում ամրագրել ժողովրդի հաղթանակի օրը: Այս նախաձեռնության ընդունումից հետո քառօրյա պատերազմի հերոս Ժորա Եսայանի մայրը՝ տիկին Մարինեն, սոցցանցի իր էջով դիմեց կառավարությանը. «Ապրիլի վերջին օրը նշում եք որպես քաղաքացու օր, իսկ, պարոնայք ղեկավարներ, էս արդեն 7 ամիս է՝ խնդրել ենք, որպեսզի ապրիլին մեկ օր տրամադրեք որպես մեր հերոս տղաների հիշատակման օր: Չէ՞ որ նրանց շնորհիվ այս օրը կա և մենք կանք: Արժան չգտաք մի օր նվիրեք մեր որդիներին, այն տղաներին, որ իրենց կյանքի ամբողջ օրերը նվիրեցին ձեզ»: «Փաստի» հետ զրույցում տիկին Մարինեն նշեց, որ դեռևս յոթ ամիս առաջ այս հարցով դիմել են կառավարությանը և մասնավորապես Նիկոլ Փաշինյանին: Առաջարկ-խնդրանքը կառավարությանը ներկայացրել են Ապրիլյանում զոհված տղաների ծնողները.

«Սեպտեմբերին հրավեր ենք ունեցել Նիկոլ Փաշինյանի կողմից: Մեր հարցերը կոնկրետ վերաբերել են նրան, որ Եռաբլուրում պաստառ տեղադրվի Ապրիլ յանի տղաների նկարներով: Եռաբլուրում Ապրիլ յան պատերազմում զոհված ընդամենն ինը հերոս ունենք: Ցանկություն կար, որ գոնե բոլորի նկարները տեղադրվեին կամ էլ անուններով պաստառ լիներ: Բացի դա, խնդրեցինք ապրիլին հիշատակման օր սահմանել, սակայն այս հարցերից որևէ մեկին լուծում չի տրվել»,- ասաց տիկին Մարինեն՝ ընդգծելով, որ վերը նշված խնդրանքով դիմել են վարչապետին թե՛ բանավոր, թե՛ գրավոր: 

Տիկին Մարինեն նշեց, որ իրենք կառավարությանը խնդրել են մշտապես ուշադրության կենտրոնում պահել զոհվածների ընտանիքներին: Շատերը, օրինակ, քույրեր ու եղբայրներ ունեն, որոնք ունեն բարձրագույն կրթություն, սակայն չեն կարողանում աշխատանքի տեղավորվել: Բացի դա, Ժորայի եղբայրը սովորում է Հայաստանի ֆիզիկական կուլտուրայի և սպորտի պետական ինստիտուտում, սակայն վարձավճարի որևէ զեղչ չի ստանում:

Որդեկորույս մայրը փաստեց՝ ինքը որևէ կերպ չի ցանկանում առանձնացնել, տարանջատել վերջին 25 տարվա ընթացքում զոհված որևէ զինվորի, սակայն, իր կարծիքով, ապրիլը կարմիր է ներկված.

«Չեմ ասում, որ ապրիլն ամեն օր հիշատակվի: Ուղղակի ապրիլին զոհերը շատ էին: Քառօրյան մի քիչ յուրահատուկ է, չգիտեմ, թե ինչ կլիներ, եթե տղաները չկանգնեին ու չպաշտպանեին երկիրը: Գուցե երկրորդ եղեռն լիներ: Որևէ զինվորի զոհվելու դեպք չեմ առանձնացնում: Բոլորն էլ զոհվել են հանուն հայրենիքի, հանուն մեկ նպատակի»,ընդգծեց Ժորայի մայրը:

Վերջինս հավելեց, որ քաղաքացիներն արձագանքում են իր գրառմանը՝ նշելով, որ պարտադիր չէ, որ կառավարությունն օր սահմանի, որ մարդիկ հիշեն տղաներին:

«Սակայն ցանկալի է, որ կառավարությունը հենց ինքը հիշի: Մենք դրանով ենք ապրում: Մեզ ֆինանսական աջակցություն պետք չի, մեր տղաներին որ հիշեն, դա էլ բավարար է»,- եզրափակեց մեր զրուցակիցը:

ԼՈՒՍԻՆԵ ԱՌԱՔԵԼՅԱՆ