Բակո Սահակյանի հետ հիմա ավելի ջերմ հարաբերություններ ունենք, Արայիկ Հարությունյան

SOCIETY 1 April, 2019 19:23

Արցախի նախկին վարչապետ Արայիկ Հարությունյանը NEWS.am-ին տված հարցազրույցում խոսել է Արցախում առաջիկայում կայանալիք նախագահական ընտրությունների, Բակո Սահակյանի հետ հարաբերությունների եւ ներքաղաքական հնարավոր զարգացումների մասին։

Թեեւ Արցախի նախագահական ընտրություններին մեկ տարի կա, բայց արդենթեկնածուների անուններ են շրջանառվում, այդ թվում նաեւ ձեր անունը: Ձեզկտեսնե՞նք որպես նախագահի թեկնածու:

Հերթական անգամ հայտարարում եմ, որ այդպիսի որոշում կայացվելու է «Ազատ հայրենիք» կուսակցության համագումարում: Այն, որ «Ազատ հայրենիք» կուսակցությունն ընտրություններին հանդես է գալու իր թեկնածուով եւ հավանական է, որ այդ թեկնածուն լինելու է «Ազատ հայրենիք» կուսակցության նախագահը եւ այդ համագումարում լինելու է կուսակցության նախագահի ընտրություն, որից հետո մենք կհայտարարենք այդ մասին: Այսօր ցանկացած հայտարարություն կլինի կուսակցական կարգապահության խախտում: Մենք գնում ենք այդ ճանապարհով, մենք պատրաստվում ենք ընտրության:

Քաղաքական կոնսուլտացիաներ անցկացնո՞ւմ եք այլ ուժերի, այդ թվում՝Հայաստանի իշխանությունների հետ:

Քաղաքական կոնսուլտացիաներ, իհարկե, անցկացնում ենք Արցախի քաղաքական ուժերի հետ: Իհարկե, հանդիպումներ ունենում ենք նաեւ առանձին քաղաքական գործիչների, հանրության հետ: Իսկ Հայաստանի քաղաքական ուժերի հետ, այո, ունենում ենք հանդիպումներ, բայց ավելի շատ հանդիպման նպատակը քաղաքական խնդիրներն են եւ Արցախ-Հայաստան միջպետական հարաբերությունները:

Պետնախարարի պաշտոնից հրաժարականից հետո ի՞նչ հարաբերություններունեք Բակո Սահակյանի հետ, ձեզ այսօր ընդդիմադիր համարո՞ւմ եք:

Հակառակը, եւ հրաժարականի օրը եւ դրանից հետո բազմաթիվ անգամ հայտարարել եմ, որ որպես քաղաքական ուժ՝ մենք շարունակում ենք պատասխանատվություն կրել Բակո Սահակյանի կառավարության գործունեության մասով: Այսինքն, Բակո Սահակյանի գլխավոր հենարանը Ազգային ժողովում «Ազատ հայրենիք» կուսակցությունն է: Որեւէ խնդիր չկա, չի եղել եւ չի էլ լինելու: Ինչ վերաբերում է մեր հարաբերություններին, հիմա շատ ավելի ջերմ է, ինչպես եղել է տարիներ առաջ, վերջին ամիսներին եւ համոզված եմ՝ որեւէ բան չի կարող խաթարել մեր հարաբերությունները:

Ձեր հնարավոր առաջադրման մասին Բակո Սահակյանի հետ որեւէխոսակցություն եղե՞լ է:

Իհարկե, միշտ էլ քննարկում ենք, չենք թաքցնում, բայց ամեն ինչ որոշելու է համագումարը:

Հնարավո՞ր է, որ Բակո Սահակյանը սատարի ձեր կուսակցության թեկնածուին:

Դիրքորոշում կամ տեսակետ չեմ նկատել: Ինձ թվում է՝ ինքը կհայտարարի, որ ունենալու ենք աննախադեպ ընտրություններ, որտեղ իշխանությունն ապահովելու է ժողովրդավարական պահանջներին համապատասխան ընտրություններ: Այսինքն, բոլոր կանոնները պահպանվելու են: Ինձ թվում է՝ նախագահը չեզոք կլինի եւ չի աջակցի որեւէ թեկնածուի:

Նիկոլ Փաշինյանը հայտարարել է, որ բիզնեսը պետք է քաղաքականությունիցհեռու լինի: Դուք հայտնի գործարար եք, ինչպե՞ս եք պատկերացնում բիզնեսի ուքաղաքականության համատեղումը, եթե դուք առաջադրվեք ու ընտրվեքնախագահ: Շահերի բախում չի՞ լինի:

Գիտեք, ես արդեն 11 տարուց ավելի է՝ բիզնեսի աշխարհի ներկայացուցիչ չեմ: Այո, ես երբ մտել եմ քաղաքականություն, եղել եմ Արցախի ամենախոշոր գործարարներից, գործատուներից մեկը, որի հիմնական աշխատանքը եղել է գյուղմթերքների արտադրությունը եւ վերամշակումը: Իսկ գյուղմթերքների վերամշակումն ազատագրված տարածքներում, որտեղ երկար ժամանակ հող չէր մշակվում եւ հիմա էլ շարունակվում է չմշակվել: Իմ ստեղծած կառույցը շարունակում է այդ գործունեությունը, իսկ ես որեւէ միջամտություն կամ կապ չունեմ այդ ընկերությունների աշխատանքի հետ: Ես մնում եմ որպես սեփականատեր, բայց սեփականատեր լինելը դեռ չի նշանակում զբաղվել գործարարությամբ: Որեւէ մեկը չի կարող ասել, որ այս 11 տարիներին ես զբաղվել եմ գործարարությամբ եւ խախտել եմ բարձրաստիճան պաշտոնյային առաջադրվող պայմանը: Եթե ես մնամ քաղաքականության մեջ, այդ սկզբունքը պահպանելու են: Ես հանցանք չեմ համարում ազատագրված տարածքում հաց արտադրելը: Այդ նույն հարցը կարելի է տալ ցանկացած քաղծառայողի, թե ինչու է քաղծառայողը դառնում քաղաքական գործիչ: Ես քաղծառայող չէի, հող մշակող էի ու հող մշակողը դարձել է քաղաքական գործիչ: Սպորտսմենը դառնում է քաղաքական գործիչ: Այսինքն, բոլորը կարող են դառնալ քաղաքական գործիչ, բացի հող մշակողի՞ց: Ինձ թվում է, որ այն մարդիկ, որոնք քաղաքական մրցակից են տեսնում, փորձում են դա շահարկել:

Ձեր անվան հետ շաղկապված ընկերությունները կառավարությունից արտոնություններ ստացե՞լ են։

Իհարկե, առիթ կլինի, որ կհրպարակեմ այն ընկերությունների ցանկը, որ շատ քիչ է, որի հետ ես կապ ունեմ եւ թե ինչ գործունեություն եմ ծավալել Արցախում: Այդ ընկերությունները գործել են օրինականության սահմաններում, որեւէ լրացուցիչ արտոնություն չեն ստացել: Եթե որեւէ արտոնություն եղել է, եղել է ընդհանուրի շրջանակում: Այսինքն, եթե ինչ-որ ծրագիր պետությունը իրականացրել է, բոլորի հետ նրանք էլ օգտվել են, լինի հարկերի տույժերի համաներում, արտոնյալ վարկերի տրամադրում եւ այլն:

Իսկ ո՞ւմ եք դուք ձեզ մրցակից համարում առաջիկա ընտրություններում:

Ղարաբաղում մեզ մրցակիցներ չկան, կան քաղաքական ուժեր, որոնց հետ համագործակցելով ունենալու ենք օրինակելի քաղաքական միջոցառում՝ ընտրությունների տեսքով: Դա լինելու է համագործակցություն, ոչ թե մրցապայքար: Գոնե ես այդպես եմ ցանկանում: Դաշտում եղած քաղաքական ուժերն այդ նույն կարծիքին են:

Իսկ հնարավո՞ր է, որ ձեր կուսակցությունը հետ կանգնի ընտրություններինմասնակցելու մտքից ու սատարի այլ թեկնածուի:

Ոչ, բացառվում է դա: Մենք հայտարարել ենք, որ մեր կուսակցության նախագահը լինելու է նախագահի թեկնածու:

Իսկ կուսակցության նախագահի շա՞տ թեկնածուներ ունեք:

Այո, շատ ունենք: Մի քանի հազար անդամ ունենք ու մի քանի հազար թեկնածու: Որոշումը համագումարն է կայացնելու: