Արցախի փողոցի վթարային հանրակացարանի բնակիչներին տարհանելու համար անհրաժեշտ են դժգոհող փախստականների ստորագրությունները. շենքի լիազոր

Արցախի փողոցի վթարային հանրակացարանի մի խումբ բնակիչների դժգոհությունները, թե իրենց պատրաստվում են «փողոց շպրտել», նույն շենքի լիազոր և բնակիչ Մարիետա Հովհաննիսյանը համարում է անտեղի և պնդում՝այդ մարդիկ պարզապես մտավախություն ունեն, որ հնարավոր է իրենց օրինական ձևով բնակարան չհատկացվի, քանի որ իրենց  սեփականության հարցը դեռ վիճարկվում է դատարաններում:    

Դեռ ավելին, ըստ նրա՝ հենց այդ մի քանի հոգու պատճառով վերջնական ստորագրություններով համաձայնություն չի տրվում քաղաքապետարանին, որպեսզի օր առաջ բոլոր բնակիչները 4-րդ կարգի վթարային շենքից տարհանվեն:

Նշենք, որ վթարային հանրակացարանում ապրող և քաղաքապետարանի որոշումից դժգոհ քաղաքացիները Բաքվի փախստականներ են, հիմնականում՝ միայնակ ծերեր, ովքեր Tert.am-ի հետ զրույցում նշել էին, որ Երևանի քաղաքապետարանն իրենց սպառնալիքով փողոց է ուզում շպրտել, իսկ շենքի լիազորն ու բնակիչներն իրենց ծաղրում են, սպառնում, ասում են՝ «գնացեք ձեր Բաքուն» կամ «թող ձեզնով զբաղվի փախստականների կոմիտեն»: 

Շենքի բնակիչներից Նինա Հովհաննիսյանն էլ ասում է, որ քաղաքապետարանը  որոշել է իրենց անորոշ ժամանակով տեղահանել. ստիպում են ստորագրել տեղափոխվելու և մինչև մարտի  31-ը վարձով բնակվելու մասին համաձայնագիր՝  մինչև կկառուցվի Սիսակյան 3 հասցեում գտնվող շենքը և այնտեղ նրանց բնակարաններ կհատկացնեն:  

Հիշեցնենք նաև, որ քաղաքապետարանից Tert.am-ին ասել էին, որ ներկայում վթարային շենքում մնալը նրանց կյանքի համար վտանգավոր է, և, ընդ որում, քաղաքապետարանը պատրաստակամություն էր հայտնել վթարային շենքից դուրս եկած բնակիչներին փոխհատուցել ժամանակավոր բնակարանի վարձակալության գումարը մինչև հիմնական բնակարաններ տեղափոխվելը:

Լիազորը նշեց, որ քաղաքապետարանը 27  բնակարան է տրամադրել` հիմնականում երեխաներով ընտանիքներին, մինչև Սիսակյան 3 հասցեում գտնվող շենքի կառուցումը: Նա ասաց, որ հիմնական դժգոհություն հայտնողը և շենքում «խառնակչություն անողը» Նինա Հովհաննիսյանն է, ով իր մոր՝ Նորա Սեյրանովայի հետ ապրում է հանրակացարանի մի սենյակում, թեև առանձին բնակարաններ ունեն՝ 317 սենյակը և 320- ը: Ըստ նրա՝ կնոջ մայրը 95 տարեկան է, պատերազմի մասնակից և երբ 27 բնակարանները բաշխում էին,  առաջինը հենց տատիկին կանչեցին: «Հաշվի առնելով նրա մեդալները, տարիքը՝ որոշվեց, որ Նորա Սեյրանովային բնակարան կտրամադրվի, իսկ Նինա Հովհաննիսյանը կգնա վարձով բնակվելու:

Լիազորը բացատրեց, թե ինչու նախնական համաձայնությունից հետո որոշեցին հրաժարվել առաջարկից: Ըստ նրա՝ այդ նույն բնակիչները դատարանում վիճարկում են իրենց սեփականությունը: Նրանք պնդում են, որ նախկին լիազոր Հարություն Հարոյանը, իրենցից գաղտնի վաճառել է իրենց սենյակները: Նորա Սեյրանովան դիմել է լիազորին, ասել, որ քանի որ հենց իր բնակարանը դատավարության փուլում է, խնդրել է Նինայի անունը գրել տուն ստացողների մեջ, քանի որ հնարավոր է՝ դատը հօգուտ իրենց չվճռեն և տունը կորչի ու իրենք փողոցում հայտնվեն: «Համաձայնվել ենք, տուն ստացողի անունը գրել ենք Նինա Հովհաննիսյանի անունով, իսկ վարձով գնացողների ցանկում՝ Նորա Սեյրանովայինը»,-ասաց նա և նշեց, որ հետո այդ տարբերակից էլ են հրաժարվել և ասում են, որ մինչև դատավարությունը չվերջանա, չեն ստորագրելու: Մարիետա Հովհաննիսյանը նշեց՝ բողոքողների մեջ կանայք են, ովքեր չեն էլ ապրում հանրակացարանում:

«Ես արդեն գալիս եմ այն եզրակացության, որ հնարավոր է իրենց համաձայնությամբ է Հարոյանը վաճառել իրենց սենյակները և գործարքը բոլորովին էլ իրենցից գաղտնի չի արվել: Ես էլ եմ, իհարկե, Հարոյանին մեղադրում, որովհետև հենց այդ դատավարությունը խոչընդոտ հանդիսացավ, որ մեր վերաբնակեցումն այսքան երկար տևեց: Հիմա ես կանչում եմ, որ գան ստորագրեն, չեն գալիս, ասում են՝ ինչո՞ւ ստորագրեմ, եթե իմ դատը չի վերջացել: Այսինքն՝ հնարավոր է մի բան արած լինեն, վախենում են, որ դատարանը հօգուտ իրենց վճիռ չի կայացնի, իրենք նոր շենքում տուն չեն ստանա: Դա իմ կարծիքն է, եթե արդար են, թող գան ստորագրեն, ինչի՞ց են վախենում: Ինչո՞ւ 20-ից ավելի բնակիչ վարձով գնում են՝ չեն վախենում, իրենք վախենում են, ուրեմն դրա հետևում մի բան կա, եթե չեն ներկայանում, որ նույնիսկ իրենց հասցեն ճշտեն, ուրեմն մի խնդիր կա այստեղ»,-ասաց նա:  

Մարիետա Հովհաննիսյանը նշեց, որ վթարային շենքում 80 բնակարան է, որոնցից 38 ընտանիքներ բնակարան են ստանում, ընդհանուր շուրջ 58-ից 60-ն էլ համաձայնել են ստորագրել շենքից դուրս գալու երկու տարբերակով էլ, և միայն 19-ը ընտանիք է, որ դուրս չեն գալիս, մի մասը դատական խնդիրների, մյուս մասն էլ հատկացվող պայմաններին համաձայն չլինելու պատճառով:

Լիազորի խոսքով՝ եթե տարբեր սենյակներ ունեցող նույն ընտանիքի անդամները  համաձայնվեին երկու բնակարան տալ և երկու սենյականոց մեկ բնակարան ստանալ, քչերը կգնային վարձով, որովհետև քաղաքապետարանը երկու սենյականոց բնակարաններ  կարող է ապահովել, խնդիրը մեկ սենյականոցների հետ են:

«Այդ մարդիկ շենքի ցեցն են դարձել, Նինան շատ է խառնում շենքը և ստիպում ամբողջ շենքին ահուդողով սպասել իրենց համաձայնությանը»,-ասաց նա: