«Ավտոներկրման ոլորտը թող կարգավորեն, հետո խոսեն, որ Հայաստանը մեքենաների գերեզմանոց է դառնում»

Օրերս Նորագավիթի ավտոմաքսատուն այցի ժամանակ վարչապետ Նիկոլ Փաշինյանը հայտարարեց, որ հիմա 100-300 դոլարով, ասենք, 2000 թվականի մեքենաներ են ներկրվում Հայաստան, ընդ որում՝ մեծ քանակությամբ: Միևնույն ժամանակ խոսվում է խցանումների, վթարների մասին: «Հայաստանն ի՞նչ է, մեքենաների գերեզմանո՞ց: Չեմ ցանկանում, որ ներկրումների ծավալը կրճատվի, բայց մեքենաների պարկը պետք է թարմանա», - ասաց Փաշինյանը:

Ավտոներկրողների միության նախագահ Տիգրան Հովհաննիսյանը «Փաստի» հետ զրույցում, արձագանքելով վարչապետի դիտարկումներին, ասում է, որ ինքը կցանկանար՝ վարչապետի խորհրդականները կամ օգնականներն ավտոներկրման շուկայում առկա խնդիրների լուծումները տեսնեին ոլորտը կարգավորելու մեջ:

«Ամբողջ ազգը տաքսի է վարում, լիցենզիան «մեռնում է», վարչապետն էլ հայտարարում է, որ կառավարության և Ազգային ժողովի վարորդներն էլ տաքսի վարեն: Նույնը տեղի է ունենում ավտոներկրման ոլորտում: Եթե ամբողջ ազգը զբաղվում է ավտոներկրումով, և ոլորտը չի կարգավորվում, ուրեմն խցանում էլ կլինի, վթար էլ, երթևեկությունն էլ կոլապսի կենթարկվի: Դրա համար ի՞նչ է պետք անել. կարգավորել դաշտը, լիցենզավորել: Ուսումնասիրում են ոլորտը, տեսնում, որ, օրինակ, մեքենա ներկրող 100 հազար մարդուց 10 հազարն է իրական ներկրող, և կառավարությունը նստում, խոսում է այդ մարդկանց հետ: Ասում է՝ կներկրեք, օրինակ, այս քանակի աջ ղեկով մեքենա, ոչ ավելի:

Աջ ղեկն ինչո՞ւ արգելեցին: Հայաստանի բազմաթիվ գյուղերում մարդիկ աջ ղեկով մեքենա էին ներկրում, շունը տիրոջը չէր ճանաչում: Բոլորը ներկրող էին: Այնքան զզվացրեցին, որ վերցրեցին, աջ ղեկի ներկրումն արգելեցին: Իսկ ովքե՞ր պայքարեցին դրա դեմ. աջ ղեկով մեքենա ներկրող մի քանի հարյուր մարդ: Եթե աջ ղեկով մեքենա ներկրող 200-300 հոգու լիցենզավորեին, խնդիրը կլուծվեր: Իսկ եթե ամբողջ ազգը զբաղվի մեքենայի ներկրմամբ, կլինի «бардак»», - ասում է պարոն Հովհաննիսյանը:

Վերջինս նշում է, որ ավտոներկրողները 20 տարի է՝ խոսում են խնդիրների մասին, որոնք լուծում չեն ստանում: «Հայաստանը միակ երկիրն է, որտեղ ավտոներկրողները երազում են հարկ վճարել, որպեսզի իրենց համարեն մեքենայի ներկրմամբ զբաղվողներ: Վարչապետին ասում են՝ սա գերեզմանո՞ց է, այս ինչքա՞ն մեքենա են բերում: Բայց ովքե՞ր են բերողները: Եկեք Վրաստան, տեսե՛ք՝ մեր շենքի բոլոր բնակիչներն այնտեղ են: Բոլորը գնում են մեքենա բերելու»: 

Տիգրան Հովհաննիսյանը ևս նշում է, որ մեքենաների պարկը թարմացման կարիք ունի. «Սակայն կառավարությունն ինչ էլ ցանկանա անել, պետք է անի լիցենզավորված ավտոներկրողի հետ: Մարդը պետք է լինի օրինական դաշտում, նրա հետ կառավարությունը պետք է բանակցի: Շուտով ամբողջ ազգին կասեն՝ գնացեք, անձնագրով մեքենա բերեք: Կգնան, կբերեն, հետո էլ կասեն՝ այս ինչքան աղբ են բերում, այս ինչքան մեքենա են բերում: Կրճատե՛ք: Բայց ո՞վ է մեղավոր: Մեքենայի ներկրմամբ զբաղվողնե՞րը: Ո՛չ: Պետությունը պետք է պաշտպանի այդ մարդկանց», - ընդգծում է զրուցակիցս: 

Հովհաննիսյանը փաստում է, որ ավտոներկրման ոլորտը կարգավորելուց հետո միայն կարելի է խոսել մի շարք հարցերի մասին. «Ոլորտը թող կարգավորեն, նոր խոսեն, որ Հայաստանը մեքենաների գերեզմանոց է դառնում: Գերեզման է, որովհետև ամբողջ ազգը մեքենա ներկրող է, թող մարդկանց տարանջատեն, որ իրական գործ անողը տարբերվի, ու այդ ժամանակ Հայաստանը մեքենաների գերեզմանոց չի լինի: Դավիթ Անանյանի համար ի՞նչ կա: Ամբողջ ազգին ասելու է՝ անձնագրո՞վ եք ուզում ներկրում անել: Այո՛, անձնագրով եմ ուզում, բայց պետք է մոտ 300 հազար դրամ դեպոզիտ ունենամ լիցենզիայի համար, որպեսզի միայն ես մեքենա ներկրեմ: Ժողովրդին էլ երաշխիք տամ, մեքենան վաճառեմ, իրենք էլ գոհ լինեն: Շատերը գնում են մեքենա բերելու, խաբվում են, ստացվում է, որ իրենք մեքենայի ներկրմա՞մբ են զբաղվում: Իրական ներկրողները անպիտան մեքենաներ չեն բերում: Եկեք, մեր մեքենաները տեսեք. բոլորը նոր են, ամենաշատը 10 տարվա արտադրության», - եզրափակում է ավտոներկրողների միության նախագահը:

ԼՈՒՍԻՆԵ ԱՌԱՔԵԼՅԱՆ