Վթար­նե­րը շա­տա­ցել են, վա­րորդ­նե­րը՝ ան­կար­գա­պահ դար­ձել»

Վարչապետ Նիկոլ Փաշինյանն իր ֆեյսբուքյան էջի միջոցով պարբերաբար տեղեկացնում է, որ այս կամ այն ոլորտում դրական փոփոխություններ են առկա: Պատկերը ներկայացվում է վիճակագրական թվերի տեսքով, և բնական է, որ շատ հաճախ հարց է առաջանում՝ իսկ այս թվերն արտացոլո՞ւմ են կոնկրետ ոլորտում առկա պատկերը: Օրերս վարչապետը տեղեկացրեց, որ 2019 թվականի առաջին եռամսյակում նախորդ տարվա նույն ժամանակահատվածի համեմատ ճանապարհատրանսպորտային պատահարների հետևանքով զոհված քաղաքացիների թիվը նվազել է 17,3 տոկոսով, իսկ արագաչափերով և տեսախցիկներով արձանագրված տուգանքները՝ շուրջ 51 հազար հատով:

«Վարորդի ընկեր» հասարակական կազմակերպության համահիմնադիր Սերգեյ Ղահրամանյանը «Փաստի» հետ զրույցում նշում է, որ թվերն ուսումնասիրելուց պետք է հաշվի առնել, որ նախորդ տարվա ապրիլմայիս ամսվա դեպքերից հետո երթևեկությունից դուրս են բերվել առավելագույնը 40 կմ/ժ սահմանափակում ունեցող արագաչափերը: «Երբ այդ արագաչափերը հեռացվում են, բնականաբար, խախտումները չեն արձանագրվում: Դրանք ամենահաճախակի և համեմատաբար փոքր վտանգ ներկայացնող խախտումներն են: Փաստորեն, կարող ենք նշել, որ դրանք չեն արձանագրվում, ինչը, սակայն, չի նշանակում, որ վարորդները խախտումներ չեն անում: Եթե գումարենք առավել հաճախ կրկնվող և չարձանագրված խախտումները, ապա դրանց թիվն իրականում մեծ կլինի: Եթե միայն զոհերի, ինչպես նաև քիչ խախտումների տարատեսակներով արձանագրված խախտումների թվաքանակը համեմատենք նախորդ տարվա ցուցանիշների հետ, բնականաբար որոշակի տարբերություն կունենանք, բայց տեսնում ենք, թե մեր երթևեկության մեջ ինչ է կատարվում: Օրական միջինը 100 պատահար է տեղի ունենում, որոնք արձանագրում են ճանապարհային ոստիկանները: Ընդ որում, սա այն դեպքում, երբ եղանակը լավն է, իսկ անձրևոտ եղանակին վթարների թիվն ամեն օր հասնում է մոտ 150-ի: Վթարներն իրականում շատ են, այդ թվերը հաշվառվում են, և ոստիկանությունը ժամանակ առ ժամանակ ներկայացնում է: Սակայն դրանց նայելով ասել, որ երթևեկության վիճակը լավ է, սխալ կլինի: Երթևեկությունն իրականում բազմաթիվ խնդիրներ ունի, որոնք չեն ներկայացվում այդ թվերի տեսքով», -ասում է Ղահրամանյանը:

Վերջինս նշում է, որ առհասարակ երթևեկության մեջ խնդիրները շատ են:

«Վարչապետը ժամանակ առ ժամանակ գրառումներ անելով՝ փորձում է ցույց տալ, որ ամեն ինչ լավ է, բայց գրառման մեկնաբանություններին մեկ հայացք գցելով՝ պարզ է դառնում, որ քաղաքացիները հիմնավոր պատճառներ ունեն բողոքելու երթևեկությունից: Նախորդ տարվա ապրիլ-մայիս ամիսներից սկսած՝ շատերն արագաչափերը վնասում էին կամ փակում, երթևեկում այնպես, ինչպես իրենց էր հարմար, այլ ոչ օրենքին համապատասխան: Իրավախախտ վարորդներն այս դեպքում կիրառում են «սրա՞ համար ենք հեղափոխություն արել» թևավոր արտահայտությունը՝ դրանով իսկ փորձելով հոգեբանական ճնշում գործադրել ճանապարհային ոստիկանության ներկայացուցիչների վրա: Ինչ-որ առումով կա օրենք և իրավախախտ հակամարտություն, և այդ ամենը «ջարդվում է» ճանապարհային ոստիկանության այն տեսուչի վրա, որը դեմ առ դեմ առնչվում է իրավախախտի հետ: Այսօր ունենք շատ վատ երթևեկություն: Ճանապարհային ոստիկանությունը փորձում է ինչոր լուծումներ կիրառել, սակայն մեզ անհրաժեշտ է բալային համակարգի ներդրում և բարեփոխումներ ճանապարհային ոստիկանությունում: Պետք է իրականություն դառնա պարեկային ծառայությունը, գուցե այս կերպ երթևեկությունը բարելավվի: Ներկայումս վարորդներ կան, որոնք վախենում են պիկ ժամերին երեխաների հետ երթևեկել մեքենայով», - ընդգծում է զրուցակիցս:

«Վարորդի ընկեր» ԻՀԿ նախագահ Տիգրան Քեյանն էլ «Փաստի» հետ զրույցում նշում է՝ կարևոր է, որ երթևեկության կանոնները դասավանդվեն վաղ տարիքից, քանի որ երթևեկության մասնակիցները ոչ միայն վարորդներն են, այլ նաև հետիոտները, որոնք պետք է իմանան իրենց պարտականությունները:

Նա նույնպես անդրադառնում է տուգանքների նվազման վիճակագրությանը. «Նախկինում արձանագրվում էին իրավիճակային խախտումներ, որոնք առհասարակ երթևեկությանը չէին խոչընդոտում և իրենց կատարած զանցանքով վտանգավոր չէին: Դրանց տուգանքները ներկայումս չեն արձանագրվում: Կան մի շարք տուգանքներ, որոնք կանոնների խախտմանն են վերաբերում, սակայն կրկին չեն արձանագրվում, և դրա հետևանքով տուգանքների թիվը նվազել է: Բացի դա, ճանապարհային ոստիկանության հսկողությունն անհամեմատ թուլացել է, իսկ տեսախցիկները վթարների կանխարգելման աշխատանքներ չեն կատարել և չեն կատարում մինչ օրս: Դրանք որոշակի առումով կարող են վարորդներին զսպել, օրինակ՝ խաչմերուկներում կարմիր լույսի տակով չանցնել, բայց մնացած առումով վարորդներին չեն զսպում: Իսկ ոստիկանության առկայությունը վարորդին կզսպի, որպեսզի տվյալ հատվածում օրենքի խախտում չկատարի:

Վթարները շատացել են, քանի որ մեր վարորդները փորձել են օգտվել առիթից, և շատերը սկսել են անկարգապահ երթևեկել: Բացի դա, քչերն են բարձրաձայնում, որ վթարի պատճառ է հանդիսացել ճանապարհի ոչ ճիշտ կահավորանքը և ոչ բարվոք վիճակը, որը, մեքենան շարքից հանելով, ստեղծում է վթարային իրավիճակ: Այդ առումով բողոքները բավականին շատ են, որ վարորդները, փորձելով խուսափել փոսերից, վթարի են ենթարկվել: Այս դեպքում, ըստ էության, վարորդի մեղավորությունն այնքան էլ չկա, քանի որ նա փորձել է խոչընդոտը շրջանցել, և դրա պատճառով վթար է առաջացել: Նման վերլուծություն դեռ չի արվել, և չենք կարող ասել, որ բոլոր վթարները անկարգապահ վարորդների մեղքով են», - ասում է պարոն Քեյանը՝ շեշտելով, որ խնդիրները գնալով կավելանան՝ կապված մեքենաների քանակի ավելացման հետ:

ԼՈՒՍԻՆԵ ԱՌԱՔԵԼՅԱՆ