ՀՅԴ հայ­տը՝ որակապես նոր իրավիճակում

Այսօր երեկոյան ՀՅԴ-ն անցկացնելու է հանրահավաք, որն ուշագրավ իրադարձություն է մի քանի տեսանկյունից։

Նախ՝ խորհրդարանական արտահերթ ընտրություններում կրած պարտությունից հետո սա ավանդական կուսակցության, այսպես ասած, քաղաքական վերադարձն է՝ նոր կարգավիճակով, նոր ղեկավարությամբ, ու հավանաբար՝ նոր ասելիքով։ Հանրահավաքն ինքնին բացահայտելու է, թե ՀՅԴ-ն ինչ հետևություններ է արել անցած քսանամյակից ու, որ ավելի կարևոր է, ինչպիսի օրակարգով է ներկայանում հասարակությանը։

Մյուս կողմից՝ ընդդիմադիր ցանկացած ուժի հանրահավաքը կարևոր իրադարձություն է հետհեղափոխական Հայաստանում։ Բանն այն է, որ հեղափոխության հաղթանակից հետո՝ տևական մի շրջան, ընդդիմադիր ուժերն ու հասարակության բողոքավոր շերտերը ձեռնպահ էին մնում կտրուկ ընդդիմադիր շեշտադրումներով հանդես գալուց, էլ չասենք՝ հանրահավաքներ անցկացնելու նախաձեռնություններից, անգամ Երևանի ավագանու և խորհրդարանական արտահերթ ընտրությունների քարոզարշավների ժամանակ նկատելի էր, որ, չնչին բացառություններով, քաղաքական ուժերը փորձում էին սահմանազատվել ակնհայտ ընդդիմադիր կարգավիճակից։ Նման իրավիճակն ուներ իր բացատրությունը՝ չափազանց բարձր էր վարչապետի վարկանիշը, ու քաղաքական ուժերը չէին ցանկանում թիրախավորվել հասարակության կողմից՝ հընթացս արժանանալով նաև «հակահեղափոխականի» ու «սևի» պիտակավորմանը։

Հիմա, ըստ ամենայնի, որակապես իրավիճակ է փոխվել, ու վարչապետի վարկանիշի տեսանելի անկման փուլում այլևս չի գործում «սևերի» ու «սպիտակների» հակադրության իռացիոնալ, արհեստական բանաձևը։ Դա տեսանելի դարձավ նաև դատարանների «պաշարման» ակցիայից հետո, երբ ակնհայտ դարձավ, որ վարչապետի կոչին հասարակությունը, մեղմ ասած, ոգևորությամբ չի արձագանքել։ Այլ խոսքով՝ հասարակության տրամադրությունների բնական սեգմենտացիա է տեղի ունեցել, ինչի հետևանքով քաղաքական ուժերն ինքնադրսևորման հնարավորություն են ստացել՝ ձերբազատվելով հեղափոխության հարուցած բարդույթներից։

Իհարկե, նոր իրավիճակը փորձություն է իշխանությունների համար ևս, ու հետաքրքիր է՝ արդյո՞ք ժողովրդավարության անշրջելիության մասին խոսող թիմը պատրաստ է լսել քննադատություն, նույնիսկ՝ խիստ ընդդիմադիր խոսք, թե՞ դարձյալ «հեղափոխական» «ինքնագործ» խմբեր են հայտնվելու, որոնք փորձելու են խանգարել ՀՅԴ հանրահավաքը կամ՝ ագրեսիվ հակաքարոզչություն իրականացնել դրա դեմ։ Այս հարցերի պատասխանները թերևս կստանանք այսօրվա հանրահավաքից հետո։

յուս կողմից՝ հանրահավաքը հետաքրքիր է նաև բովանդակային առումով, որովհետև այն հաջորդում է վարչապետ Նիկոլ Փաշինյանի վերջին սկանդալային նախաձեռնությանն ու ելույթին ու տեղի է ունենալու, ըստ ամենայնի, հենց այդ օրակարգով։ Կասկածից վեր է, որ ՀՅԴ-ն քննադատելու է Փաշինյանին, սակայն շատ ավելի կարևոր է, որ մենք լսենք ավանդական կուսակցության նաև այընտրանքային, համախմբող մոտեցումները։

Այնուամենայնիվ, դրական է, որ Հայաստանում տրվել է նոր ընդդիմության ձևավորման գործընթացի մեկնարկը, ու ՀՅԴ հանրահավաքը հենց այդ համատեքստում է։

ՍՈՒՐԵՆ ՍՈՒՐԵՆՅԱՆՑ