Դա­սա­խոսը՝ իրեն հե­տապն­դե­լու և դա­վադ­րու­թյան մա­սին. ՇՊՀ նախ­կին ռեկ­տո­րը նոր հայ­ցեր է ներ­կա­յաց­րել

Քաղաքագետ, ՇՊՀ դասախոս Գագիկ Համբարյանը բարձրաձայնում է իր դեմ ներկայացված երկու դատական հայցերի, ինչպես նաև ունեցվածքի վրա արգելանք դնելու ու հետապնդման մասին: «Փաստի» հետ զրույցում Գագիկ Համբարյանը նշեց, որ իր դեմ հայցերը ներկայացրել է ՇՊՀ նախկին ռեկտոր Սահակ Մինասյանը:

Նշենք, որ թե՛ Գ. Համբարյանը, թե՛ բուհի մի շարք դասախոսներ բարձրաձայնում էին բուհում առկա խնդիրների մասին: Նրանք այսօր էլ շարունակում են նախկին ռեկտորին մեղադրել անօրինականության, չարաշահումների և կոռուպցիայի մեջ:

«Հայցը ներկայացվել է պատիվն ու արժանապատվությունը վիրավորելու վերաբերյալ: Սահակ Մինասյանը ընդամենը մեկ տարի առաջ նույն հայցով դիմել էր դատարան, սակայն դատական նիստերին չներկայանալու պատճառով գործը կարճվեց: Հիմա նորից է դիմել՝ երկու առանձին հայցերով, իսկ իր պատիվն ու արժանապատվությունը գնահատել է 6 միլիոն դրամ: Ես արդեն գիտեմ իր խառնվածքը, չեմ զարմանում այդպիսի գործողություններից, այստեղ խնդիրն այն է, թե ինչպես են նրա բոլոր հայցերը հայտնվում նույն այն դատավորի վարույթում, որի անաչառության, կոմպետենտության վերաբերյալ իմ մտահոգությունները դեռ անցած տարի եմ հայտնել: Հիմա շատ զարմանալիորեն այդ «հեքիաթային» համակարգիչը երկու հայցն էլ կրկին ուղարկել է Լիլիթ Խաչատրյան անունով դատավորին: Ես խիստ կասկածներ ունեմ, որ նա սերտ կապեր ունի Ս. Մինասյանի հետ: Ի դեպ՝ նրանք նույն թաղամասից են»,-ասաց Գ. Համբարյանը՝ հայտնելով, որ իր ունեցվածքի վրա արգելանք է դրված:

«Շատ հետաքրքիր է՝ ի՞նչ հիմքերով է դրվել արգելանքը: Զարմանալի է, որ դեռ վճիռ չկա, բայց շատ արագ արգելանքներ են դնում իմ ունեցվածքի վրա: Ես սա դիտարկում եմ որպես հետապնդում՝ իմ անձի ու գործունեության նկատմամբ: Փորձում են նման մեթոդներով ինձ վրա ճնշում գործադրել: Ես ինքնաբացարկ եմ ներկայացնելու սույն տիկնոջը, պատրաստվում եմ նաև բողոք ներկայացնել Բարձրագույն դատական խորհուրդ»,-ասաց նա՝ նշելով, որ իր գործընկերների դեմ ներկայացված հայցերը ևս այդ դատավորի վարույթում են եղել:

«Ծանոթացել եմ ՇՊՀ մեկ այլ դասախոսի՝ Անահիտ Գարմանյանի գործին: Վերաքննիչ դատարանը գործը կրկին Շիրակի մարզի առաջին ատյանի դատարան է ուղարկել՝ նոր քննության, քանի որ ներկայացրել է ապացույցներ, որ գործն ամբողջությամբ սխալ ուղղությամբ է ընթացել»,-նշեց նա:

Գագիկ Համբարյանն իր դեմ ներկայացված հայցը նաև դավադրություն է համարում. «Պարոն Մինասյանի թիկունքում կանգնած անձինք ամեն ինչ անում են, որ իմ բերանը փակեմ: Իրենք ունեն շատ մեծ խնդիր: Քանի դեռ ես և ՇՊՀ դասախոս պարոն Խորիկյանը բարձրաձայնում ենք նրա արարքների մասին, իրենք չեն կարող ծածկադմբոց անել»:

Նշենք, որ ավելի վաղ ՇՊՀ նախկին դասախոսների հաղորդման հիման վրա բուհում «պաշտոնատար անձի կողմից իր պաշտոնեական դիրքը ծառայության շահերին հակառակ օգտագործելու կամ ծառայողական պարտականությունները չկատարելու հատկանիշներով քրեական գործ էր հարուցվել: Հարուցված քրեական գործով Սահակ Մինասյանի կարգավիճակը պարզ էր դառնալու միայն նախաքննության ավարտից հետո:

«Ս. Մինասյանի թիկունքում բավականին հզոր ուժեր են, որոնք շատ սերտ համագործակցում են գործող իշխանությունների հետ: Անօրինականությունները, հանցագործությունները, որոնք տեղի են ունեցել պարոն Մինասյանի թեթև ձեռքով, այնքան բացահայտ են: Բայց թե՛ նախորդ, թե՛ ներկայիս իշխանությունների օրոք դրանք արժանի պատասխան ու արձագանք չեն ստացել: Քանի դեռ պարոն Մինասյանի արարքներն արժանի գնահատական չեն ստացել իշխանությունների կողմից, նա գերակտիվություն է դրսևորելու: Բացի այդ, օգտագործում է իր վաղեմի կապերը, որ ունեցել է իրավապահ համակարգում: Երբ ժամանակին ինձ և պարոն Խորիկյանին կրճատեց, շատ մարդկանց մոտ ասել էր, որ դատարանն իր գրպանում է և խնդիր չունի: Հիմա նույն կարգախոսով է առաջ շարժվում: Երևի հետհեղափոխական շրջանում ցայտնոտային իրավիճակում էր, բայց հիմա ամրացել է ու փորձում է հակահարված տալ և ագրեսիվ մեթոդներով իմ բերանը փակել»,-եզրափակեց Գ. Համբարյանը:

ԱՆՆԱ ԲԱԴԱԼՅԱՆ