2020 թվա­կա­նին Լու­սին ար­բա­նյակ ուղար­կե­լու հայ­տա­րա­րու­թյունն ավե­լի տրա­մա­բա­նա­կան կլի­ներ, քան աղե­տի գո­տում անօ­թև­ան­նե­րի խնդի­րը հիմ­նո­վին լու­ծե­լը

«Հայաստանի Հանրապետությունը նախատեսում է 2021 թվականը դիմավորել առանց «աղետի գոտու շահառու» հասկացության», հուլիսի 1-ին, ամփոփելով պաշտոնավարման 100 օրը, հայտարարեց քաղաքաշինության պետական կոմիտեի նախագահ Վահագն Վերմիշյանը: «Կառավարության որոշման համաձայն՝ 2008-2020 թվականներին պետք էր 5396 ընտանիքի տեղավորել բնակարաններում:

2008-2017 թվականներին բնակարանով է ապահովվել 4839 ընտանիք, պետբյուջեից դրա համար ծախսվել է մոտ 65 միլիարդ դրամ: 2018 թվականին բյուջեից հատկացվել է 460 միլիոն դրամ, և ապահովվել է բնակարանով 44 ընտանիք: 2019 թվականի բյուջեով նախատեսված է 560 միլիոն դրամ, բնակարանով կապահովվի 60 ընտանիք: Որպեսզի մինչև 2020 թվականը մնացած 453 ընտանիքն ապահովվի բնակարանով, այդ տարի պետք է հատկացվի 3 միլիարդ դրամ: 2021 թվականին պետք է վերանա «աղետի գոտու շահառու» հասկացությունը»,- ասել էր Վերմիշյանը:

Այս հայտարարությանը հաջորդող մի քանի ժամերին լրատվամիջոցներում համանման վերնագրերով նյութեր հայտնվեցին, որ 2021 թվականին այլևս աղետի գոտի չենք ունենալու: «Քաղաքացիական պայմանագիր» կուսակցության անդամները, ԱԺ պատգամավորները, կառավարության անդամները ևս սկսեցին տարածել այս տեղեկատվությունը՝ «ավետելով» բարի լուրը: Չենք սխալվի, եթե ասենք, որ այս թվերը երկմտելու առիթ տվեցին շատերին. աղետի գոտում 457 ընտանի՞ք է սպասում բնակարանի իր հերթին և տնակային պայմաններից ազատվելուն:

Վերմիշյանի հայտարարությանն արձագանքեց Շիրակի մարզպետ Տիգրան Պետրոսյանը՝ սոցիալական ցանցի իր էջում գրելով. «Քաղաքաշինության պետական կոմիտեի նախագահ Վահագն Վերմիշյանի խոսքերը՝ 2020 թվականին 3 մլրդ դրամով աղետի գոտու անօթևանության խնդրի մեկընդմիշտ լուծման մասին, վերաբերում է հիմնականում գյուղական համայնքներում պետության կողմից տարիներ առաջ շահառու ճանաչված խմբին միայն, մոտ 450 ընտանիք։

Վարչապետի հանձնարարությամբ ստեղծված աշխատանքային խմբի կողմից միայն Գյումրի քաղաքում այս պահի դրությամբ քարտեզագրվել է մոտ 2450 ժամանակավոր բնակեցված կացարան, որտեղ բնակվողների հարցի հետ պարոն Վերմիշյանի հայտարարության այդ մասն առնչություն չունի, սակայն որոշ լրատվամիջոցների կողմից թյուրիմացաբար ներկայացվում է որպես անօթևանության խնդրի ամբողջական լուծում», գրել էր Պետրոսյանը:

«Շիրակ կենտրոն» հ/կ-ի նախագահ Վահան Թումասյանը «Փաստի» հետ զրույցում նշում է՝ տարակուսանք է առաջացնում թե՛ Վերմիշյանի այդ հայտարարությունը, թե ՛ ՔՊ-ի կողմից այդ լուրի ակնթարթային տարածումը, թե՛ որոշ լրատվամիջոցների վերնագրերը, որ «2021 թվականին Շիրակի մարզում որևէ անօթևան չի լինելու»: «Եթե հայտարարվեր, որ 2020 թվականին արբանյակ ենք ուղարկելու Լուսին, տրամաբանական կհամարեի, բայց 2021 թվականին անօթևանների խնդիրը հիմնովին լուծելն անիրական է: Չեմ հասկանում՝ հասկացողությա՞ն հետ խնդիրներ կան, թե՞ դիտավորյալ ակցիա է: Եթե դիտավորյալ է, ի՞նչ է դա տալու», - ասում է Թումասյանը:

Նա խոսում է այս հայտարարության վտանգների մասին: «Երեկ մեր բազմաթիվ գործընկերներից, որոնք արտերկրում են բնակվում, նամակներ եմ ստացել: Հովանավորները, որոնք ներդրումներ են անում անօթևանության ոլորտում, ուղարկում են ինձ այս հայտարարությունը: Նրանք մարդիկ են, որոնց օգնությամբ մի քանի ընտանիք շուտով բնակարանամուտ է նշելու: Հետո զանգում են շահառուները՝ իրենց խնդիրներով: Մի քանի օրից «Հայաստան» համահայկական հիմնադրամը տեղային մարաթոն է հայտարարել Ամերիկայում՝ Գյումրիում երկու շենք վերականգնելու համար: Այս հայտարարություններն ազդելու են նվիրատուների վրա: Կասեն՝ ձեր իշխանությունները պատրաստվում են մոտ ժամանակները լուծել այդ խնդիրը: Եթե փիառի խնդիր կար, ապա շատ վնասակար և անհաջող փիառ էր, ոչինչ չտվող, հատկապես՝ իշխանություններին»,նշում է մեր զրուցակիցը:

Նա պարզաբանում է, թե ինչի մասին է Վերմիշյանի հայտարարությունը: «Իշխանությունների հաշվումներով՝ ամբողջ աղետի գոտում մոտ 8000 ժամանակավոր կացարան կա, չհաշված վթարային շենքերը, նախկին գործարանային հանրակացարանը և այլն (հունիսի 14-ին Վահագն Վերմիշյանը վարչապետին զեկուցել է, որ կատարված աշխատանքների արդյունքում աղետի գոտու տարածքում հաշվառվել է 6 հազար 536 տնակ, որոնք օգտագործվում են որպես բնակարան: Դրանցից 3500-ը գտնվում է Շիրակի մարզում, 2845-ը՝ Լոռիում, 51-՝ը Արագածոտնում- խմբ.): Եթե 3 միլիարդով հնարավոր լիներ ամբողջ աղետի գոտու բնակարանային խնդիրը լուծել, ապա մեր կազմակերպությունն էլ դա կաներ: 

Իրականում՝ 2012 թվականին 453 ընտանիք ճանաչվել էր շահառու, նրանց բնակարանով ապահովելու համար պետությունն ամեն տարի մաս-մաս գումար էր փոխանցում, հիմա որոշվել է այդ գումարը միանգամից փոխանցել, որ այս շահառուների բնակարանային խնդիրը վերջնական լուծվի: Խոսքը հիմնականում Լոռու մարզի գյուղական համայնքների բնակիչների մասին է: Սա իշխանությունների՝ աղետի գոտու վերականգնման նոր հայեցակարգի, ռազմավարության հետ որևէ աղերս չունի», - ասում է Թումասյանը:

Հիշեցնենք, որ կառավարությունը նախաձեռնել էր աղետի գոտում առկա ժամանակավոր կացարանների, անօթևան ընտանիքների նոր հաշվառում, որով պետք է պարզ դառնար՝ երկրաշարժից 31 տարի անց ի՞նչ պատկեր ունենք: Թումասյանից հետաքրքրվում ենք նաև այս հաշվառումից: «Սահմանված ժամկետում հանձնաժողովն իր աշխատանքը կատարել է: Առաջարկությունների փաթեթն ու ամբողջ տեղեկատվությունն ուղարկվել է կառավարություն: Մեր կազմակերպության առաջարկությունների փաթեթը ևս այնտեղ տեղ է գտել:

Պետք է սպասել, որպեսզի խնդիրը լուծելու համար կառավարությունը հասկանա իր հնարավորությունները, առաջիկայում ծրագիր և դրանից բխող որոշումներ ընդունի», - եզրափակում է Վահան Թումասյանը:

ԼՈՒՍԻՆԵ ԱՌԱՔԵԼՅԱՆ