«Իմ անունը հաճախ են կապում խաղընկերուհիներիս հետ»․ Կարեն Ասլանյանը՝ նոր տեսահոլովակի, հերոսուհու ընտրության և Ադրիանա Գալստյանի հետ հարաբերությունների մասին

Past.am

Կարեն Ասլանյանի և Ադրիանա Գալստյանի համատեղ լուսանկարները քննարկումների տեղիք տվեցին։ Սակայն դերասանն ավելի ուշ շտապեց տեղեկացնել, որ Ադրիանա Գալստյանն արդեն երկրորդ անգամ նկարահանվել է իր նոր՝ «Յարս չիմանա» երգի տեսահոլովակում։

Հրապարակման մեկնաբանություններում ամենինց հաճախ հնչած անունը դերասանուհի Դիանա Մխիթարյանինն էր, ով Կարենի հետ նկարահանվում է «Անհասցե ծնվածները» հեռուստասերիալում, և ում պրոդյուսերը հանդիսանում է հենց Կարենը։ Դերասանն այս արձագանքը բացատրում է նրանով, որ հեռուստադիտողները սերիալում հասցրել են սիրել իր և Դիանայի կերպարները․ « «Անհասցե ծնվածները» հեռուստասերիալից Դիանա և Բեկ զույգը շատ սիրված է, բնականաբար հեռուստադիտողները ցանկանում էին տեսահոլովակում ևս մեզ միասին տեսնել։ Սակայն չի կարելի ամեն տեղ հանդես գալ նույն մարդկանց հետ։ Սա տեսահոլովակ է և, կարծում եմ, պետք չէր հեռուստասերիալի պատմությունը բերել տեսահոլովակ։ Շատերն են բարձր վարկանիշ ունեցող հեռուստասերիալներից հերոսուհիներ ընտրում և դրանով փորձում են ինչ-որ բանի հասնել։ Տեսահոլովակի սյուժեն պահանջում էր Ադրիանա Գալստյանին, և մենք նրան էլ նկարահանեցինք»։

Կարենի խոսքով՝ շատերն անակնկալի եկան, երբ իմացան, որ տեսահոլովակի հերոսուհին լինելու է Ադրիանա Գալստյանը։ Հերոսուհու ընտրությունը Կարենը բացատրեց այսպես․ «Քանի որ «Ես խանդում եմ» երգիս տեսահոլովակում նկարահանվել էր Ադրիանան, մարդիկ մտածում էին, որ այս անգամ ուրիշ դերասանուհի ենք ընտրելու։ Բայց որոշեցի, որ կրկին հանդես գա նա, որովհետև այս երգն իր թեմայով ասես «Ես խանդում եմ» երգի շարունակությունը լինի և նկարահանեցինք երկրորդ սերիա»։

Համացանցում հրապարակած լուսանկարաները Կարենի երկրպագուներից ոմանց հիմք տվեց կարծելու, թե նա ու Ադրիանան միասին են։ Դերասանի խոսքով՝ դա նորմալ է, և ինքն արդեն սովորել է, երբ իր անունը կապում են խաղընկերուհիների հետ․ «Նորմալ է, երբ չամուսնացած երիտասարդ տղամարդու անունը կապում են չամուսնացած երիտասարդ դերասանուհու հետ։ Մենք շատ լավ ընկերներ ենք, իսկ սոցիալական ցանցերում հայտնված լուսանկարներն էլ նկարահանման հրապարակից են։ Իմ անունը հաճախ են կապում խաղընկերուհիներիս հետ։ Վերջին շրջանում էլ Դիանա Մխիթարյանի անվան հետ կապվեց, սակայն մենք լավ ընկերներ ենք։ Երբ իմ կյանքում որևէ մեկը հայտնվի, ես խոստացել եմ, որ ինքս կհրապարակեմ»։

Վերադառնալով տեսահոլովակին՝ Կարենը նշեց, որ նկարահանումներն արդեն ավարտված են, իսկ տեսահոլովակը՝ մոնտաժային ընթացքի մեջ։ Հոլովակում նկարահանվել են Եվա Բաղդասարյանը, Սարգիս Թաշչյանը, բլոգերներ Էդո Մանուկյանը և Անդրանիկ Բաղդասարյանը։

«Երեք րոպե տևողությամբ հոլովակի մեջ ներառել այսքան հայտնի մարդկանց՝ բավականին պատասխանատու գործ էր։ Մեր տեսահոլովակի նկարահանումներն ուղղակի հիանալի են անցել։ Կան մասսայական տեսարաններ, որոնք մենք նկարահանել ենք առանց տեխնիկական հնարքների։ Իրականում կտեսնեք այնքան մարդ, որքան եղել է։ Ստացել ենք մի բան, որը Հայաստանում դեռ ոչ մի երգիչ չի ունեցել։ Թե՚ երգը, թե՛ տեսահոլովակը տարբերվող են»։

Ըստ Կարենի՝ ինքն այս տեսահոլովակից մեծ սպասելիքներ ունի՝ հաշվի առնելով այն աշխատանքը, որն իրականացրել են։

«Իմ կյանքում խաղացել եմ բավականին շատ հեռուստասերիալներում, թողարկել եմ տեսահոլովակներ, սակայն այս մեկն ինձ համար անչափ սպասելի է։ Մեր շոուբիզնեսում նմանատիպ գործ ինքս դեռ չեմ տեսել։ Եթե մի բան տարբերվում է, այն կա՛մ ունենում շատ մեծ հաջողություն, կ՛ամ՝ հակառակը։ Ինստագրամում ընդամենը 30 վայրկյան տևողությամբ հոլովակ եմ հրապարակել և այն արդեն 200 000 դիտում ունի։ Իմ սպասելիքներն այս տեսահոլովակից և երգից շատ մեծ են»,- ասաց Կարենը։

Երգը հեղինակել է Կարենի պրոդյուսերը՝ Արման Անտոնյանը, գործիքավորումը կատարել է Արթուր Ավետիսյանը, տեսահոլովակի ռեժիսորն ՝ Տիգրան Ավետիսյանը։