Մեղավոր անձինք պետք է պատասնատվություն կրեն օրենքի ողջ խստությամբ

Past.am

Հայաստանի Հանրապետության զինված ուժերին ռազմամթերքի մատակարարման մրցույթի ձախողման փաստով Հայաստանի Հանրապետության քննչական կոմիտեում ԶԳՔՎ-ում քննվող քրեական գործի առնչությամբ վերջին ժամանակահատվածում հանրապետության զանգվածային լրատվության որոշ միջոցներով տարածվել են գործին վերաբերող, ինչպես նաեւ չվերաբերող, սակայն առնչվող տեղեկատվություն:

Տեղեկատվությունը վերաբերել է ինչպես հիշյալ մրցույթի արդյունքներին, այնպես էլ՝ ռազմամթերքի շուկայում «ՊՐՈՄՏԵԽՆՈԼՈԳԻԱ» ռուսական ընկերության («ОРСИС»-Оружейные системы России» ապրաքային նշան) եւ վերջինիս հայաստանյան գործընկեր «ՕՐՍԻՍ ԱՐՄՍ» ընկերության գործունեությանը:

Ընդգծված հարգանքով վերաբերելով խոսքի ազատությանն ընդհանրապես եւ զանգվածային լրատվությանը մասնավորապես, ստիպված ենք արձանագրել, որ առանձին լրատվամիջոցներում հիշյալ հարցերի շուրջ տարածվել է ոչ լիարժեք ստուգված տեղեկատվություն: Այն, հիմնականում, վերաբերել է «ՕՐՍԻՍ ԱՐՄՍ» ընկերության ստեղծմանը, դրանում ՀՀ ՊՆ պաշտոնատար անձանց դերակատարությանը, վերջիններիս՝ ձեռնարկատիրական գործունեության մասնակցությանը, չհիմնավորված գներով ռազմամթերքի մատակարամանը եւ այլն: Նախ, տեղեկացնենք մեր գործընկերներին, որ «ՊՐՈՄՏԵԽՆՈԼՈԳԻԱ» ընկերության եւ «ՕՐՍԻՍ ԱՐՄՍ» ընկերության համատեղ գործունեությունն իրականացվում է հետեւյալ ձեւաչափով. «ՊՐՈՄՏԵԽՆՈԼՈԳԻԱ» ընկերության կողմից ապահովվում են տնտեսական անհրաժեշտ գործնական պայմանները՝ համապատասխան պայմանագրերը կատարելու համար, այդ թվում՝ ռազմամթերքի արտադրությունը, տեղափոխումը, դրա հանձնում ստացող կողմին, փորձարկումները, հետագա տեխնիկական եւ տեղեկատվական սպասարկումը, իսկ «ՕՐՍԻՍ ԱՐՄՍ» ընկերությունն ապահովում է փաստաթղթերի համապատասխանությունը Հայաստանի Հանրապետության օրենսդրությանը:

Քննվող քրեական գործի նախաքննության շահերից, ինչպես նաեւ ռազմական ու նախաքննական գաղտնիքի պահպանման անհրաժեշտությունից ելնելով հարցերի զգալի մասին այժմ լիարժեք անձնադարձ կատարել չենք կարող եւ կարող ենք նշել միայն, որ «ՊՐՈՄՏԵԽՆՈԼՈԳԻԱ» ընկերության ու վերջինիս հայաստանյան գործընկեր «ՕՐՍԻՍ ԱՐՄՍ» ընկերության համագործակցությունը Հայաստանի Հանրապետության պաշտպանության նախարարության հետ սկսվել է ընդամենը 2017 թվականին, որի ընթացքում Հայաստանի զինված ուժերին կատարվել են անհրաժեշտ, որակյալ ու բարձրակարգ ռազմամթերքի խոշոր մատակարարումներ: Այս իմաստով հատկանշական է, որ «ՊՐՈՄՏԵԽՆՈԼՈԳԻԱ» ընկերության մուտքով հայկական շուկա զենքի եւ ռազմամթերքի որոշ տեսակների ձեռք բերման գները նվազել են շուրջ 2 անգամ, այլ ոչ թե աճել են, որպիսի ակնարկ արվել էր վերջին հրապարկումներում: Ավելին, ուշագրավ է, որ թեեւ «ՊՐՈՄՏԵԽՆՈԼՈԳԻԱ» ընկերությունը հանդիսանում է զենքի եւ ռազմամթերքի անմիջական եւ խոշոր արտադրող, նախկինում զենքի եւ ռազմթերքի համանման տեսակները (հատկապես՝ փամփուշները) Հայաստանի զինված ուժերի կողմից գնվել են ոչ միայն կրկնակի թանկ, այլեւ՝ երրորդ աղբյուրից եւ այնպիսի ընկերություններից, որոնք անգամ ԵԱՏՄ-ում, ԵՄ-ում եւ անգամ ԱՄՆ-ում գրանցված չեն: Հետեւություններն թողնում ենք ընթերցողին: Այս եւ համանման այլ հանգամանքներն ու դրանց պատճառները, մեր կարծիքով, միանշանակ պետք է դարձվեն նախաքննության առարկա: Ինչ վերաբերում է «ՕՐՍԻՍ ԱՐՄՍ» ընկերության ստեղծմանն եւ գործունեությանը ՀՀ ՊՆ պաշտոնատար անձանց առնչությանը, ապա հարկ է նշել, որ «ՕՐՍԻՍ ԱՐՄՍ» ընկերությունը ստեղծվել է 2017 թվականի մայիսի 4-ին: Հիմնադիրների թվում եղել նաեւ ՀՀ ՊՆ գնդապետ Արթուր Գալստյանը, որն այդ իրավունքը ուներ: Նույն օրվա՝ 2017 թվականի մայիսի 4-ի՝ «Բաժնեմասը հավատարմագրային կառավարման մասին» պայմանագրով Ա.Գալստյանը, նպատակ չունենալով զբաղվել ձեռնարկատիրական գործունեությամբ, «ՕՐՍԻՍ ԱՐՄՍ» ընկերությունում ունեցած իր բաժնեմասը գործող օրենսդրության տառին համապատասխան հանձնել է հավատարմագրային կառավարման եւ ընկերության տնտեսական գործունեությանը եւ դրա կառավարմանը որեւէ ձեւով չի առնչվել, այդ թվում՝ չի ստացել շահաբաժին (դիվիդենտ), իսկ սույն թվականի հունիսի 28-ին Ա.Գալստյանն իր բաժնեմասն ընդհանրապես օտարել է այլ անձի եւ այժմ «ՕՐՍԻՍ ԱՐՄՍ» ընկերության հետ առհասարակ որեւէ կապ չունի: Այս իմաստով, վճռականորեն հայտարարում ենք, որ որեւէ մեկի մտքով հանկարծ չանցնի, որ իր նեղ անձնական, շատադիտական դրդումներից համար եւ Հայաստանի զինված ուժերին ռազմամթերքի մատակարարման տապալման խնդիրը քողարկելու կամ դրանից ուշադրությունը շեղելու նպատակով կարող է հարգանք վայելող սպայի մասին թյուր տեղեկատվություն տարածի: Ու դա անի այն մարդու նկատմամբ, որի բացառապես անձնական կապերի շնորհիվ ռուսական արտադրության ռազմամթերքը մեր զինված ուժերին սկսեց մատակարարվել անմիջական արտադրողից, այլ ոչ թե բարդ ու կասկածելի օֆշորային սխեմաներով:

Եթե կային հույսեր, որ, քանի որ խնդիրը վերաբերում է ռազմական գաղտնիքին, «ՊՐՈՄՏԵԽՆՈԼՈԳԻԱ» ընկերությունը, «ՕՐՍԻՍ ԱՐՄՍ» ընկերությունը եւ «ՍԻՐՈՒՆՅԱՆ-ԿԻՐԱԿՈՍՅԱՆ» իրավաբանական գրասենյակը լռելու են, ստիպված ենք հիասթափեցնել. հարուցված քրեական գործով լրիվ, օբյեկտիվ ու բազմակողմանի նախաքննությունը անկասկած ցույց է տալու ով ինչ չափով առնչություն եւ դերակատարություն ունի բանակին ռազմամթերք մատակարարելու հարցում, ով, բառի իսկակական իմաստով, որ բարձրաաստիճան պաշտոնատար անձի ազգականն է, ինչու են ռազմամթերքի՝ «ՊՐՈՄՏԵԽՆՈԼՈԳԻԱ» ընկերության գները տարբերվում նախկինում գոյություն ունեցող գներից եւ որն է պատճառը, որ Հայաստանի զինված ուժերին ռազմաթերք մատակարարելուն առնչվում են օֆշորային ընկերությունները, որոնք, ընդ որում, Հայաստանի հարկատու չեն, ինչու էր ռուսական արտադրության ռազմամթերքը Հայաստանի զինված ուժերին մատակարարելու համար մինչեւ վերջերս գնվում ոչ ՌԴ-ից եւ այլն: Ու, ինչպես իր հայտնի ելույթում հայտարարել է Հայաստանի Հանրապետության վարչապետը, որեւէ մեկը չի պլստալու: Ասվածը չի վերաբերում ԶԼՄ-ներին, խոսքի ազատությունը սուրբ հասկացություն է: Այն վերաբերում է խնդրով հետաքրքրված այն անձանց, որոնք առնչվում են մրցույթի տապալմանը, նախկինում ուռճացված գներով բանակին ռազմամթերքի մատակարարմանը եւ որոնք հիշյալ տեղեկավական «արտահոսքերում» հանդես են եկել որպես «ՊՆ-ին մոտ կանգնած աղբյուր»: Մրցույթի տապալման եւ ռազմաթերքի մատակարարման ձախողման մեջ մեղավոր անձինք պետք է պատասնատվություն կրեն օրենքի ողջ խստությամբ, իսկ նոր Հայաստանի ցանկացած քաղաքացի իրավունք ունի իմանալ ողջ ճշմարտությունը: Հավատացած եղեք, որ թե՛ «ՊՐՈՄՏԵԽՆՈԼՈԳԻԱ» ընկերությունը, թե՛ «ՕՐՍԻՍ ԱՐՄՍ» ընկերությունը եւ թե՛ «ՍԻՐՈՒՆՅԱՆ-ԿԻՐԱԿՈՍՅԱՆ» իրավաբանական գրասենյակը այդ ամենի կգործադրեն բոլոր ջանքերն ու միջոցները: Ընդ որում՝ միայն օրենքով սահմանված կարգով: Հիշյալ հարցերին վերաբերող բոլոր փաստաթղթերը «ՍԻՐՈՒՆՅԱՆ-ԿԻՐԱԿՈՍՅԱՆ» իրավաբանական գրասենյակում առկա են:

Հարգանքով՝ «ՊՐՈՄՏԵԽՆՈԼՈԳԻԱ» եւ «ՕՐՍԻՍ ԱՐՄՍ» ընկերությունների ներկայացուցիչ, «ՍԻՐՈՒՆՅԱՆ-ԿԻՐԱԿՈՍՅԱՆ» իրավաբանական գրասենյակի տնօրեն, դոցենտ Ալեքսանդր Սիրունյան: