«Մաս­նա­գի­տա­կան քննար­կում երկ­րում տե­ղի չի ունե­նում.ձկնոր­սու­թյու­նը հնա­րա­վոր չի լի­նի վե­րահս­կել»

Օրերս հայտնի դարձավ, որ կառավարությունը որոշել է Սևանա լճի սիգի արդյունագործական ձկնորսությունն օրինականացնել: Պատճառաբանությունը սիգի պահածոյի արտադրությունն ու արտահանումը վերահսկողության տակ պահելը և օրինական դարձնելն է: 

Գեղարքունիքի մարզպետ Գնել Սանոսյանն էլ ավելի վաղ հայտարարել էր, որ շրջակա միջավայրի նախարարությունն արդյունագործական ձկնորսություն թույլ տալու կարգ է մշակել, որը սկզբնապես փորձելու են կիրառել պիլոտային՝ 150 տոննա ձկան համար: 

Նշենք, որ 10 տարուց ավելի է՝ Սևանի սիգն արդյունագործական նշանակության ձկնատեսակ չէր, ուստի նախարարության որոշումով որսը մինչ օրս արգելված էր: Այլ հարց է, որ, չնայած այդ արգելքին, շուկաներում, խանութներում ականատես էինք լինում սիգի վաճառքի:

Ձկնորսության կանոնակարգման և Սևանա լճի խնդիրներին պարբերաբար անդրադառնում է «Իմ քայլը» խմբակցության պատգամավոր, ԱԺ տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի նախագահ Վարազդատ Կարապետյանը: Նա նշում է, որ կարևոր է ձկնորսության կանոնակարգումն այնպես կազմակերպել, որ մի կողմից՝ չվնասենք բնությանը, մյուս կողմից՝ հարգենք մարդկանց, ովքեր զբաղված են ձկնորսությամբ։ 

Պատգամավորն ընդգծել էր, որ Սևանա լճում սիգի, նաև մնացած ձկնատեսակների պաշարները ցածր են՝ հավելելով, որ ձկնորսությունը լճում պետք է թույլատրվի, բայց խիստ վերահսկողության պարագայում: 

«Պետք է սահմանենք կանոնները, ափամերձ հատվածի բնակիչներին լճի հետ ապրելու հնարավորություն տանք, մարդիկ պետք է ձկնորսության իրավունք ունենան, բայց դա պետք է լինի խիստ սահմանների մեջ դրված»,-ասել էր Կարապետյանը:

հետ զրույցում նշում է, որ ձկնորսության օրինականացումից ոչ մի լավ բան սպասել չի կարելի: «Օրինականացումը կրկնակի կավելացնի ձկնորսությունը: 

Մարդիկ, որոնք ժամանակին վախենալով, գաղտնի էին ձուկ որսում, հիմա այդ ամենն անելու են օրինական ձևով, և մեծ քանակությամբ ձուկ է դուրս բերվելու Սևանա լճից: Ուզում եմ հասկանամ՝ ինչպե՞ս են իրենք հսկելու, թե որքան ձուկ որսացին: 

Վերահսկման մեխանիզմը չկա: Նշելու են, որ տարեկան թույլ են տալիս այսքան ձուկ որսալ, բայց չեն կարողանալու դա վերահսկել: Դա ուղղակի անհնար է»,ասում է Ադամյանը:

Նա նշում է՝ գիտնականներն ասում են, որ բացարձակ անթույլատրելի է մեծ քանակությամբ արդյունաբերական որսը Սևանա լճում, որովհետև ջրիմուռների ծաղկումը, դրանց քանակի կարգավորումն ուղիղ կապ ունի ձկնապաշարների հետ: 

«Քչացնելով ձկնապաշարները՝ նորից կկանգնենք նույն խնդրի առջև, չնայած, անկախ դրանից, էլի կանգնելու ենք: Գիտնականները զգուշացրել են, որ ամռանը նորից կտեսնենք լճի ծաղկումը: 

Պետք է արգելել ձկան որսը, որպեսզի այն շատանա, լիճն առողջանա, հետո արդեն թույլ տալ, որ մարդիկ որս կատարեն, բայց այսօր տեսնում ենք, թե այդ խնդիրն ինչպես է դրված: 

Ես, որպես քաղաքացի և մարդ, հասկանում եմ, որ լճի մերձակա համայնքների բնակչությունը դրանով է ապրում, բայց ուրեմն պետք է այլընտրանք գտնել այդ հարցում: 

Ի վերջո, սիգի ձկնապաշարները շատ փոքր են, ոչինչ չունենք որսալու»,նշում է մեր զրուցակիցը:

 

Բնապահպանի կարծիքով՝ այսօր բնապահպանության և ընդերքի տեսչական մարմինը չունի այդ ռեսուրսները, միևնույն ժամանակ նաև այդ ցանկությունը վերահսկելու գործընթացը: 

«Օրենքը, որով արգելվում է արդյունագործական որսը, պետք է մնա, միևնույն ժամանակ ուժեղանա տեսչականի վերահսկողությունը: 

Համաձայն եմ՝ էլի կլինի որսագողություն, բայց քանակությունը կլինի ավելի քիչ, եթե վերահսկողությունը ճիշտ կազմակերպվի: 

Ամիսներ առաջ բնապահպանության և ընդերքի տեսչական մարմնի նախկին ղեկավար Արթուր Գրիգորյանն ապացուցեց, որ ձկնագողության խնդիրը վերահսկելի է: 

Գիտե՞ք՝ որքան ձուկ է հանձնվել մանկատներին ու ծերանոցներին: Եթե ցանկություն ունենան, կարող են վերահսկել, իհարկե, ոչ հարյուր տոկոսով, բայց այնպիսի մթնոլորտ ստեղծեն, որ մարդիկ զգաստանան: 

Որպես բնապահպան՝ դեմ եմ այս նախագծին, չնայած մեր կարծիքը որևէ մեկը չի հարցնում: Երբևիցե կողմնակից չեմ եղել որևէ իշխանության, բայց հիմա ակնհայտ տեսնում եմ, որ գոնե այն ժամանակ ուզում էին լսել մասնագետներին: 

Այժմ մասնագիտական քննարկում այս երկրում տեղի չի ունենում, դրա համար խնդիրը չի լուծվում: 

Ի վերջո, պատգամավորներից որևէ մեկը մասնագետ չէ: Այդպիսի պոպուլիստական վերաբերմունքով որևէ բանի չենք հասնի: Երբ պոպուլիզմը վերանա, այն ժամանակ էլ խնդիրները կլուծվեն»,-եզրափակում է Սիլվա Ադամյանը:

ԼՈՒՍԻՆԵ ԱՌԱՔԵԼՅԱՆ