«Եթե ունեք Windows 7, արդեն վտանգի տակ եք». «Փաստ»

INTERVIEW 17 January, 2020 11:54

«Փաստ» թերթը գրում է․

Հունվարի 14-ից «Մայքրոսոֆթ» ընկերությունն այլևս չի սպասարկելու Windows 7 օպերացիոն համակարգը։ Այս մասին ընկերությունը հայտարարել էր դեռևս նախորդ տարեվերջին։

Ընկերության պաշտոնական հաղորդագրության մեջ նշվում է, որ օգտատերերն այլևս չեն կարող դիմել ընկերությանը տեխնիկական օգնություն ստանալու նպատակով, ինչպես նաև թարմացնել ծրագիրը, հետևաբար ավելանալու է վիրուսների հարձակման սպառնալիքը։

Ընկերությունը հիշեցնում է, որ Windows 7-ը գործարկվել է դեռևս 10 տարի առաջ և այլևս չի կարող համապատասխանել անվտանգության ժամանակակից պահանջներին։

Պետք է ընդգծել, սակայն, չնայած նրան, որ օպերացիոն համակարգը չի թարմացվելու, դա չի նշանակում, որ Windows 7-ը կդադարի գործել, ուղղակի, ինչպես փաստում են փորձագետները, կարող են խնդիրներ առաջանալ կապված անվտանգության հետ։

Այդ պատճառով Windows 7-ի օգտատերերին խորհուրդ է տրվում հրաժարվել դրանից՝ ներբեռնելով Windows 10 տարբերակը։

«Մայքրոսոֆթ» ընկերությունից տեղեկացնում են, որ այս համակարգի դեպքում կիբեռանվտանգության խնդիրներին հատուկ ուշադրություն է դարձվել, ուստի այն պետք է արդյունավետորեն պաշտպանի օգտատերերին բարդագույն կիբեռսպառնալիքներից։ Գաղտնիք չէ, որ ոչ բոլորն անմիջապես ձեռնամուխ կլինեն համակարգերի՝ մեկը մյուսով փոփոխմանը։

Կաշխատեն դրանով այնքան, քանի դեռ չառաջանան լրջագույն խնդիրներ կամ էլ սպառնալիքներ։ Բայց օրերս մեդիափորձագետ Սամվել Մարտիրոսյանը սոցցանցի իր էջում ահազանգ հնչեցրեց՝ օգտատերերին խորհուրդ տալով պարտադիր տեղադրել Windows-ի վերջին թարմացումը՝ նշելով, որ կրիտիկական վտանգ կա չթարմացված համակարգիչների համար։

«Փաստը» Մարտիրոսյանից այս հարցի առնչությամբ մեկնաբանություն խնդրեց՝ պարզելու, թե ի՞նչ վտանգի մասին է խոսքը։ Մեդիափորձագետը նշում է. «Ինձ թվում է, որ տեխնիկական մանրամասները կարևոր չեն։ Խնդիրն այն է, որ հայտնաբերվել է խոցելիություն, որը կապ ունի Windows օպերացիոն համակարգի ամենաներքին պաշտպանողական հատվածի հետ, և այդ խոցելիությունն օգտագործելով, չարագործները կարող են, օրինակ՝ վիրուսային ծրագիր ներդնել համակարգչի մեջ։ Համակարգը կընդունի այն որպես հարազատ և անվնաս ծրագիր։

Այսինքն՝ հնարավոր է շրջանցել, խաբել պաշտպանողական համակարգին»,-ասում է Մարտիրոսյանը։ Նա կարևորում է այն, որ օգտատերերը պետք է մշտապես ակտիվացրած պահեն ծրագրային թարմացումները։

Բացի դա, ընդգծում է՝ Հայաստանում այսօր շատ համակարգիչներ ավելի հին Windows տարբերակով են աշխատում։ «Այժմ Windows 7-ի առօրեական թարմացումները «Մայքրոսոֆթ» ընկերությունը պարզապես դադարեցրել է։

Այսինքն՝ եթե ունեք Windows 7, արդեն վտանգի տակ եք։ Պետք է այն փոխարինել Windows 10-ով։ Խնդիր է նաև այն, որ մեր երկրում օգտագործվում է հիմնականում Windows-ի ոչ լիցենզիոն տարբերակը, և մարդիկ հաճախ թարմացումներն անջատում են, որպեսզի համակարգը չհայտնաբերի, որ այն ոչ լիցենզիոն է։

Միևնույն ժամանակ, ոմանք թարմացումներն անջատում են, որովհետև դրանք ազդում են իրենց նյարդային համակարգի վրա և այլն։

Բայց թարմացումները պետք է միշտ միացված լինեն և մշտապես կատարվեն, որովհետև դրանք հենց այնպես չեն ստեղծվել։

Լինում են այնպիսի խոցելիություններ, որոնց հետևանքով համակարգը կարող է լուրջ հարձակումների ենթարկվել, ընդ որում, ոչ մի անտիվիրուս կարող է չօգնել։ Էլ չեմ ասում այն մասին, որ անտիվիրուսներն էլ շատ անգամ չեն թարմացվում»,-եզրափակում է «Փաստի» զրուցակիցը։

Մանրամասները՝ «Փաստ» թերթի այսօրվա համարում։

«Եթե ունեք Windows 7, ար­դեն վտան­գի տակ եք». «Փաստ»

«Եթե ունեք Windows 7, արդեն վտանգի տակ եք». «Փաստ»