«Կո­յու­ղագ­ծի կա­ռուց­ման հստակ ժամ­կետ­ներ առայժմ չեն նշվում»

Դեռևս տարեսկզբին «Փաստն» անդրադարձել էր խնդրին, որն առկա է Շենգավիթ վարչական շրջանում գտնվող Նորագավիթ թաղամասում: Ավելի կոնկրետ՝ թաղամասի 13-րդ և 14-րդ փողոցներում գտնվող սեփական տները կոյուղի չունեն։

 Կեղտաջրերը կուտակվում են բնակելի տների տակ։ Դա մի կողմից կարող է հանգեցնել հակասանիտարական վիճակի, մյուս կողմից՝ թուլանում են տների հիմքերը։ Թաղամասի բնակիչները մեզ հետ զրույցում նշել էին, որ արդեն մի քանի տարի է՝ դիմում են պետական տարբեր գերատեսչությունների խնդրին լուծում տալու նպատակով։ 

Գերատեսչություններն էլ իրենց հերթին նշել էին՝ հետամուտ են խնդրի լուծմանը, կատարվելու են նախագծային աշխատանքներ և հաշվարկներ, հիմնական խնդիրը կապված է նաև ֆինանսների հետ: Բնակիչներն անգամ համաձայն էին ամեն ինչ կատարել սեփական միջոցներով, բայց այդ դեպքում պետք է ունենալ գերատեսչությունների պաշտոնական թույլտվությունը՝ հետագայում խնդիրներից խուսափելու համար: 

Ստացվում է, որ բնակիչներին խնդիրը լուծելու հարցում չեն մերժում, պատշաճ կարգով պատասխանում են բոլոր նամակ-դիմումներին, սակայն «սայլը տեղից չի շարժվում»։

 

Դեռ այն ժամանակ մեր հրապարակմանն օպերատիվորեն արձագանքեց Շենգավիթ վարչական շրջանի աշխատակազմը, մասնավորապես՝ նյութի հրապարակումից անմիջապես հետո բնակիչների հետ կապ էին հաստատել աշխատակազմից։ 

Հավաստիացրել էին՝ խնդիրը շարունակում է մնալ վարչական շրջանի ղեկավարի ուշադրության կենտրոնում, որը գործուն քայլեր է կատարում դրան լուծում տալու համար։ 

Տեղեկացրել էին նաև, որ արդեն իսկ թաղամասում սկսվել են նախապատրաստական աշխատանքներ, կատարվում են չափումներ, իսկ բուն աշխատանքները, ինչպես բնակիչներին տեղեկացրել են վարչական շրջանի կոմունալ բաժնից, կմեկնարկեն այս տարվա գարնանը։ Բնակիչներին տրվել է բանավոր խոստում, որ թաղամասում այս տարի արդեն կգործի կոյուղի։ 

Օրերս, սակայն, հերթական ահազանգն ենք ստացել թաղամասի բնակիչներից, որոնք կրկին հուսահատության գիրկն են ընկել: Տեղացող անձրևները նրանց կրկին անելանելի դրության մեջ են գցել: Ողջ կոյուղաջուրը լցվել է նկուղները, ստիպված են եղել սեփական ուժերով մաքրել դրանք կամ էլ վճարել անհատներին՝ այդ աշխատանքը կատարելու համար: Նույն պատկերը կրկնվում է ամեն անգամ, երբ հորդառատ անձրևներ են տեղում: «Փաստի» հետ զրույցում բնակիչները նշում են՝ լիահույս էին, որ գարնանը կսկսվեին որոշակի աշխատանքներ, հասկանում են նաև, որ կորոնավիրուսային համաճարակն իրար խառնեց նախատեսված բոլոր ծրագրերը, սակայն այս օրերին տեսնում են, որ թե՛ իրենց, թե՛ մյուս համայնքներում կատարվում են ասֆալտապատման կամ էլ այլ բնույթի աշխատանքներ՝ պահպանելով անվտանգության կանոնները: 

Նրանք նշում են՝ հերթական զանգերը Շենգավիթ վարչական շրջանի աշխատակազմ անպատասխան չեն մնում, սակայն իրենք չեն ստանում հստակ պատասխան հատկապես մեկ հարցի՝ կա՞ն կոնկրետ ժամկետներ, թե երբ են իրենց թաղամասում սկսվելու օրհասական խնդրի լուծմանն ուղղված աշխատանքները: 

«Փաստը» խնդրի մասին պարզաբանում ստանալու համար դիմեց Շենգավիթ վարչական շրջանի աշխատակազմին, որտեղ նշեցին, որ տվյալ հարցերով պետք է դիմենք Երևանի քաղաքապետարանին: Երևանի քաղաքապետարանին ուղղված մեր հարցերում հիմնական շեշտադրումները հետևյալն էին`ի՞նչ փուլում են կոյուղու գծագրման աշխատանքները, կատարվել են արդյո՞ք նախապատրաստական աշխատանքներ, ինչպես նաև կարո՞ղ են նշել աշխատանքների մեկնարկի հստակ ժամանակացույց, և թե մոտավոր հաշվարկներով ե՞րբ բնակիչները կունենան կոյուղի:

Երևանի քաղաքապետարանը մեր այս հարցադրումներին ի պատասխան նշել է հետևյալը. «Երևանի քաղաքապետարանի և «Էտալոն Գրուպ» ՓԲԸ-­ի միջև 2020 թվականի փետրվարի 17-ին կնքվել է Նորագավիթ 13-րդ փողոցի կոյուղագծի կառուցման նախագծանախահաշվային փաստաթղթերի կազմման աշխատանքների կատարման վերաբերյալ պայմանագիր: 

Միաժամանակ հայտնում ենք, որ նշված հասցեի նախագծանախահաշվային փաստաթղթերն ընդունելուց հետո կքննարկվի նաև Նորագավիթ 13-րդ փողոցի կոյուղագծի կառուցման շինարարական աշխատանքների համար համապատասխան գնման գործընթաց իրականացնելու հնարավորությունը: Հետագայում կքննարկվի նաև Նորագավիթ 14րդ փողոցի մասով նմանատիպ ծրագիր իրականացնելու հնարավորությունը, ինչի վերաբերյալ կտրվի լրացուցիչ պարզաբանում»: 

Հ.Գ. Ակնհայտ է, որ ստեղծված իրավիճակը ստիպեց որոշակի ծրագրեր հետաձգել՝ հաշվի առնելով երկրի տնտեսական վիճակը, ակնհայտ է, սակայն, որ կան խնդիրներ, որոնց լուծումը խիստ հրատապ է:

ԼՈՒՍԻՆԵ ԱՌԱՔԵԼՅԱՆ